Ezekiel 10

Sotho 1951 (BIBELE)

← Chapter 9 Jump to: Chapter 11 →

1Ka re ke sa lebeletše ka bona mo sebakeng sa ka godimo ga Bakerubi go bonala se e kego ke leswika la talamatala, se bonala eke ke sedulo sa bogoši.

2Morena a bolela le monna yola wa seaparo sa leokodi, a re; Tsena ka moo gare ga maotwana a a rwelego Bakerubi, o gamare magala a mollo a moo gare ga Bakerubi, o a gaše godimo ga motse. Monna eo ka mmona a tsena moo.

3Bakerubi ba be ba eme ka thoko ya le letona ya Ngwako, ge monna eo a tsena; gomme lapa la ka gare la tlala leru.

4Letago la Morena la tloga moo go Bakerubi la tla serepoding sa Ngwako; Ngwakô wa tlala leru, le lapeng gwa tlala phadimo ya letago la Morena.

5Modumo wa diphego tša Bakerubi wa kwala le lapeng la ka ntle eke ke lentšu la Modimo Ramaatlaohle ge a bolela.

6Mme monna yola wa seaparo sa leokodi e a boditšwego a thwe a tšee mollo mo gare ga maotwana a ka tlase ga Bakerubi, a tla a ema hleng ga leotwana.

7Mokerubi e mongwe a le gare ga Bakerubi, a ntšha letsogo a le iša mollong wa ka gare ga bona Bakerubi, a o tšea a o bea diatleng tša monna yola wa seaparo sa leokodi; yena a o swara a tšwa.

8Mo go Bakerubi, seatla se e kego ke sa notho se be se bonala se etšwa ka tlase ga diphego tša bona.

9Ge ke lebeletše ka bona maotwana ala a mane a hleng ga Bakerubi leotwana letee le le hleng ga Mokerubi wa lona, a phadima bjalo ka leswika la talamatala.

10Maotwana, bone bja ona a swana, a bonala eke leotwana le tsenane le leotwana.

11Ge a sepela a lebile thoko tše nne tša ona, a be a sa retologe, mo a yago a be a latela yeo a bego a le pele, a ya a sa retologe.

12Gomme mo gohle mebeleng ya bona, le mekokotlong, le matsogong, le mo diphegong, le mo maotwaneng a bona, go be go tletše mahlo, maotwaneng a mane ao a bona.

13Maotwana ona, ka kwa ka ditsebe tša ka, ge go thwe ke “Disesedi”.

14Bakerubi bohle ba be ba na le difahlogo tše nne tše nne. Sefahlogo sa pele e be e le sa Mokerubi; sa bobedi e be e le sa motho; sa boraro e be e le sa tau; sa bone e be e le sa lenong.

15Gomme Bakerubi ba hlatloga. Ke tšona diphedi tše nkilego ka di bona nokeng ya Kebara.

16Ge bona Bakerubi ba sepela, le ona maotwana a be a sepela a bapetše le bona. Ge Bakerubi ba phurolla diphego ba hlatloga ba gatoga lefase, maotwana a be a sa tloge hleng ga bona.

17Ge Bakerubi ba ema, le ona maotwana a be a ema; ge ba hlatloga le ona a kukega, gobane moya wa diphedi le go ona maotwana o be o le gona.

18Gomme letago la Morena la tloga moo serepoding sa Ngwako, la ya la ema ka godimo ga Bakerubi.

19Bakerubi ba na ba phurolla diphego tša bona ba hlatloga ba gatoga lefase, ka ba bona ba tloga, maotwana a le hleng ga bona; ba ya ba ema mojakong wa kgoro ya Ngwako wa Morena e lebilego bohlabela, ba ukametšwe ke letago la Modimo wa Isiraele.

20Ke tšona diphedi tšeo nkilego ka di bona nokeng ya Kebara, di le ka tlase ga Modimo wa Isiraele; ka tseba gore ke bona Bakerubi bala.

21Ba be ba na le difahlogo tše nne le diphego tše nne; gomme ka tlase ga diphego tša bona go be go le tše e kego ke diatla tša motho.

22Le lebopo la difahlogo tša bona e be e le lona lela ka go le bona kua nokeng ya Kebara. Lebopo la bona, le bona ka noši, e be e le bona bala. Ba sepela ba ya mo difahlogo tša bona di lebilego gona.

← Chapter 9 Jump to: Chapter 11 →