Ezekiel 33

Sotho 1951 (BIBELE)

← Chapter 32 Jump to: Chapter 34 →

1Lentšu la Morena le ntletše la re:

2Ngwana motho, bolela le ba setšhaba sa geno, o re: Ge nka tliša lerumo nageng; mme setšhaba sa naga yeo sa hlaola monna wa gabo, mme sa mmea mohlapetši;

3Mme yena mohlapetši e, ge a bona lerumo le tlela naga, o tlo letša phalafala ya go sebela batho manaba.

4Bjalo ge go ka ba le motho e a kwago phalafala yeo, a e kweša mme a nyatša; bjalo ge lerumo le tla la mo tšea, yena eo, molato wa madi e tlo ba wa gagwe,

5Ka gobane a kwele mollo wa phalafala, mme a nyatša. Molato wa madi o na nae; ge e ka be a se nyatše, a ka be a phologile.

6Fela ge mohlapetši a ka bona lerumo le etla, a se letše phalafala, setšhaba se se sebelwe manaba, mme lerumo la tla la tšea e mongwe wa bona, yena yo, le ge a hwetše dibeng tša gagwe, madi a gagwe ke tlo a latiša go mohlapetši.

7Bjale wene ngwana motho, ke go beile mohlapetši wa moloko wa Baisiraele, gore lentšu le o le kwago le etwa molomong wa ka, o ba botše lona o romilwe ke nna.

8Ge nka bolela le yo mobe ka re: Wene motho mobe, o tlo hwela ruri! Mme wena wa lesa go bolela le go mo eletša gore a lahle tsela ya gagwe, yena mosenyi eo o tlo hwela molato wa gagwe; fela, madi a gagwe ke tlo a latiša go wene.

9Bjale, ge mosenyi eo o mo eletša wa re a lahle tsela ya gagwe, mme yena a gana go e lahla, yena eo o tlo hwela molato wa gagwe, mme wena wa phologa.

10Bjale wene ngwana motho, bolela le ba moloko wa Baisiraele, o re: Le bolela taba ge le re: Dikarogo tša rena, re felela ka tšona. Re tlo phologa bjang?

11Ka bophelo bja ka -- go bolela Morena Modimo Mong wa bohle -- ruri ga ke kgahlwe ke lehu la modiradibe. Se se nkgahlago ke modiradibe a boa, a lahla tsela yeo ya gagwe, a phela. Boang! Boang! Le lahle ditsela tša lena tše mpe. Le hwelang, lena ba moloko wa Isiraele?

12Bjale, wene ngwana motho! Bolela le ba setšhaba sa geno o re: Toko ya moloki ga e phološe mong mohla a hlanogile; bobe bja yo mobe bo ka se uše mong mohla a lahlile bobe bja gagwe. Moloki a ka se phologe ka toko ya gagwe, mohla a senyago.

13Le ge moloki ke mmoditše ka re: O tlo phela! Mme yena, a holofetše toko ya gagwe, a dira bokgopo, gona toko ya gagwe ka moka e ka se gopolwe; o tlo hwela bokgopo bjo a bo dirilego.

14Le ge yo mobe ke mmoditše ka re: O tlo hwa! Mme yena a lahla dibe tša gagwe, a dira ka molao le ka toko.

15A bušetša tša tshwarelelo, a bušetša tše a di utswitšego, a ya ka molao wo o phedišago a se hlwe a dira tše bokgopo, yena eo o tlo phela; a ka se ke a hwa.

16Dibe tša gagwe ka moka tše a sentšego ka tšona, a ka se hlwe a gopolwa ka tšona. O dirile ka molao le ka go loka; gomme o tlo phela.

17Ge ba setšhaba sa geno ba re: Tsela ya Mong wa bohle ga e a loka; ye e sa lokago ke ya lena tsela.

18Ge moloki a lahlile toko ya gagwe a dira bokgopo, o tlo hwa ka tšona tšeo.

19Ge yo mobe a ka lahla bobe bja gagwe, a dira ka molao le ka go loka, o tlo phela ka tšonatšeo.

20Ge le re: Tsela ya Mong wa bohle ga e a loka; gona lena ba moloko wa Isiraele, le tsebe gore mang le mang ke tlo mo ahlolela ka tsela tša gagwe.

21Ka la bohlano la kgwedi ya lesome ya ngwaga wa lesome la metšo e mebedi re le bothopša, go tlile monna e phonyokgilego a etšwa Jerusalema, a re: Motse o thopilwe.

22Ge e le nna, ka mantšiboa, mophonyokgi a sešo a fihla, ke ge seatla sa Morena se šetše se ntletše sa mpula molomo; ka moswana ge go fihla monna eo, sa mpula molomo, ka se hlwe ke le semuma.

23Lentšu la Morena la ntlela la re:

24Ngwana motho! Ba ba agilego maropeng ala a naga ya Isiraele, ba re: Aborahama e be e le motho o tee ge a newa naga ye ya ba ya gagwe; mme rena re ba bantši; re filwe naga ye ya ba ya rena.

25Ba botše ge o re: Morena Mong wa bohle o re: E ka ba naga ya lena bjang, ge le ja dinama di na le madi, mahlo a lena ge a lebeletše medimo ya lena e šele, ge le thula madi?

26Ge le ikokotlela ka marumo a lena, ge le dira tša makgapha, monna ge a senya mosadi wa wa gabo, a le re e ka ba naga ya lena?

27Bolela le bona o re: Morena Mong wa bohle o re: Ka bophelo bja ka! Ba ba agilego kua maropeng ba tla fela ka lerumo; ba ba lego ntle molaleng, ba tlo gafelwa dibata ba lewa ke tšona; ba ba lego mo dibong le mo mefomeng ba tlo hwa ka dinkhu.

28Naga yeo ke tlo e dira ya marope fela; go tlo fela maatla a ba bego ba ikogomoša ka ona; mme dithaba tša Isiraele e tlo ba hlaga e sa tsenwe ke motho.

29Ke mo ba tlogo tseba ge Morena e le nna; ge naga yeo ke e dirile ya marope le ya hlaga e le go lefetša mabohlola ohle a ba e dirilego.

30Wene ngwana motho! Ba setšhaba sa geno ba go bolela ba eme mabotong le mejakong ya nywako; ba botšana ba re: A re yeng hle, re kwe se lentšu la Morena le se bolelago!

31Ba tla go wene ka mokgwa wa setšhaba, ba dula pele ga gago eke ke setšhaba sa ka, ba kwa tše o di bolelago; fela, ga ba di dire; ba ratega ka melomo; ge e le dipelo tša bona di ile le megabaru.

32Tseba ge! Mo go bona o koša ya baratwa, o ka sereti le sebini; ba fo kwa mantšu a gago; fela ga ba dire tše o di bolelago.

33Fela, mohla di tlago, -- gomme di etla, -- ke mo ba tlogo tseba gobane ba be ba na le moporofeta.

← Chapter 32 Jump to: Chapter 34 →