Ezekiel 31

Sotho 1951 (BIBELE)

← Chapter 30 Jump to: Chapter 32 →

1Ka la pele la kgwedi ya boraro ya ngwaga wa lesome la motšo o tee, ke tletšwe ke lentšu la Morena, la re:

2Ngwana motho! Bolela le Farao kgoši ya Egipita, o re: Bogolo o re o ka mang?

3O ko lebelele. Asuri o be a etša sehlare sa morokwana Libanoni, sa makala a ditsoro, sa mahlare a go teteana, a moriti; a matelele; ntlha ya sona e be e fihlela kua marung.

4Se be se medišitšwe ke meetse, se godišitšwe ke madiba; mo se šemilwego gona se be se dikologwa ke dinoka, tša go iša meelana dihlareng ka moka tša naga.

5Ke ka tšeo ge sehlare se se feta hlare ka moka tša naga ka bogolo, sa tšwa thabe tše di ntši, le makala a matelele, ka ge meetse e le a mantši ge se hloga.

6Dinonyana tšohle tša mo sebakeng tša tla tša aga dihlaga tša tšona ka mo makaleng a sona; le diphoofolo ka moka tša naga tša tla tša tswalela bana moriting wa sona; le ditšhaba tše dikgolo tša khuta moo.

7E be e le se se botse, le ka botelele bja makala, ka gobane se be se namile medu mo go lego meetse a mantši.

8Dihlare tša merokwana tša tšhemo ya Modimo di be di sa se ukametše moriti; le megobogobo e be e sa lekane le makala a sona; le yona metholo e be e sa lekane nao. Tšhemong ya Modimo go be go se more o kakago hlare seo ka botse.

9Ke nna ke se thakgilego ka boati bja makala; dihlare ka moka tša Edene tša tšhemo ya Modimo, tša se pelokgolela.

10Mme Morena Mong wa bohle a re: Ke lefetša boikgantšho, ge se kgantšha botelele, mme sa iša ntlha ya sona marung, pelo ya sona ya ikgodiša ka legolo;

11Ke se gafela diatleng tša yo maatla ditšhabeng; gore a se dire ka mo go se loketšego. Nna ke se lahlile.

12Se tlo rengwa ke ba šele ba setšhaba sa sehlogo, ba se uša; mme makala a sona a tlo wela dithabeng le mo meeding ka moka ya lefase; mme ditšhaba tšohle tša lefase di tlo tloga mo moriting wa sona tša se šia.

13Dinonyana tšohle tša mo sebakeng di tlo aga mo thitong ya sona e wilego; makaleng a sona go tlo dula diphoofolo ka moka tša naga.

14E tlo ba go lemoša hlare tšohle tša meetseng gore di se kgantšhe botelele, di se iše dintlha kua marung; tše e lego tše dikgolo mo go tšona, di se eme di itheta ka bogolo, mola meetse di enwa tšohle, le go išwa kua nageng ya fasefase, le bohle bana ba batho ba go fologela moleteng.

15Morena Mong wa bohle o re: Mohla o fologela kua bodulabahu, ke tšweleditše sello, bodiba bja hloboga, ka pšheša dinokana tša gona, ka thiba meetse a mantši, ka apeša Libanoni pilo; mere ka moka ya naga ya hlafa ka baka la wona.

16Ka tšhoša ditšhaba ka modumo wa ge se ewa, ge ke se fološetša kua bodulabahu le ba go kodumela moleteng; mme meremehlaolwa ya Edene, le yona e botse ya kua Libanoni, yohle ya go nwa meetse, ya wa pelo e le kua nageng ya fasefase.

17Le yona e fologetše kua bodulabahu le sona sehlare seo; e ile go ba ba bolailwego ka marumo, bona ba e bego e le maatla a sona, ba dutše moriting wa sona gare ga ditšhaba.

18Ka bokwala le bogolo o be o ka bapetšwa le sehlare sefe sa Edene? Mme wa fološetšwa kua nageng ya fasefase, o na le mehlare yeo ya Edene, wa yo rapalala gare ga mašoboro a bolailwego ka lerumo, yena Farao le mašaba agwe ohle. O realo Morena Mong wa bohle.

← Chapter 30 Jump to: Chapter 32 →