Ezekiel 32

Sotho 1951 (BIBELE)

← Chapter 31 Jump to: Chapter 33 →

1Ka la pele le kgwedi ya lesome la metšo e mebedi ya ngwaga wa lesome la metšo e mebedi, lentšhu la Modimo le ntletše la re:

2Ngwana motho! Tsoša sello sa Farao kgoši ya Egipita, o re: Ba re o ka tau ya ledumaedi gare ga ditšhaba; fela, o ka kwenakgolo mawatleng: O gaša meetse ka dinko tša gago, o a biloša ka maoto ago, o kgotlela dinoka tša gago.

3Morena Mong wa bohle o re: Ke tlo go tanya ka lokwa la ka, ka madira a ditšhaba tše dintši, ka go goga ka dithapo tša ka.

4Ke tlo go lahlela mo go omilego, ka go rapalatša molaleng, wa hlorangwa ke manong ka moka a sebaka, ka go dira mojo wa dibata tša lefase lohle.

5Nama yago ke tlo e lahlela dithabeng, ka tlatša meedi ka toto sa gago.

6Naga ke tlo e nošetša ka motshotshomo wago, wa madi a gago, ge a goma ka dithaba, meela ya tlala wena.

7Mohla o tlogo tima boka mollo, ke tlo šira legodimo, ka fifatša dinaledi ka apeša letšatši ka maru; le ngwedi o ka se hlwe o taga.

8Ke tlo go fifaletša dietša tšohle tše di phadimago kua legodimong, ka ribegetša naga yago ka leswiswi. O realo Morena Mong wa bohle.

9Ke tlo tlaletša pelo tša ditšhaba tše dintši, ge ke iša phoko ya thobego yago go bantle, dinageng tša ba sa e tsebego.

10Ke tlo gakantšha tšhaba tše dintši tša gago; mme magoši a tšona a tlo rekologa ge a bona ge ke retha rumo la ka. Mohla go wago wena, ba tlo roromela ba boifa tše di kago wela bona.

11Gobane Morena Mong wa bohle o re: Lerumo la kgoši ya Babele le a go tlela.

12Mašaba a gago le tlo a tekola ka marumo a bagale, a bona ba e lego ba sehlogo ditšhabeng; ke bona ba tlogo senya boipoti bja Egipita, ba fetša mašaba a gona.

13Le dikgomo tša gona ka moka ke tlo di fediša gona moo go lego meetse a mantši, a ka se kego a kgotlelwa ke lwao la motho le ka tlhako ya seruo.

14Ke mo ke tlogo sekiša meetse a bona, ka ediša noka tša bona bjalo ka makhura. O realo Morena Mong wa bohle.

15E tlo re, naga ya Egipita ke e dirile ya mašope, e senyegetšwe ke mahumo a yona, ke bolaile bohle ba ba agilego mo go yona, ke mo ba tlogo tseba ge Morena e le nna.

16Ke sona sello se se tlogo llwa; e tlo ba sona sefela sa bana ba bantle, ge ba llela Egipita le mabotho a gona ka moka. O realo Morena Mong wa bohle.

17Ka la lesome la metšo e mahlano la yona kgwedi yeo ya ngwaga wa lesome la metšo e mebedi, ke tletšwe le Lentšu la Morena la re:

18Ngwana motho! Lla sello sa mabotho a Egipita. Bona le banana ba ditšhaba tše maatla, o ba fološetše kua nageng ya fasefase le ba go fologela moleteng.

19O phala mang ka botse? Fologa, o yo alelwa le mašoboro.

20Ba tlo rapalala gare ga ba fedilego ka marumo. Lerumo le swerwe; ba gogeng le mabotho ohle a bona.

21Bagale ba dinatla, ba ba lego kua gare ga bodulabahu, ba tlo go bolela le Farao, le ba ba bego ba mo tlatša, ba re: Ologang, le rapalale, lena mašoboro a go bolawa ka lerumo.

22Asuri, le mašaba a gagwe, o šetše a le gona moo; o dikologilwe ke mabitla a gabo, a bohle ba go fela ba tekotšwe ke lerumo.

23Ke yena wa go fiwa mabitla a gabo gona kua fase moleteng. Lebitla la gagwe le dikologilwe ke madira a gagwe; a bolailwe ohle ke lerumo, bona bao ba bego ba šiiša mola ba sa le nageng ya ba phelago.

24Elama le yena o gona kua le mašaba a gagwe; ka moka ga ona a dikologile lebitla la gagwe. Ba bolailwe ba tekolwa ke lerumo; ba fologetše kua nageng ya fasefase e le mašoboro, bonabao ba ba bego ba šiša mola ba sa le nageng ya ba phelago. Bjale ba rwele nyatšego ya bona le ba go fologela moleteng.

25Ba mo aletše malao gare ga ba bolailwego, le mašaba a gagwe ka moka; o dikologilwe ke mabitla a bona. Ke mašoboro ka moka ga bona; ba bolailwe ke lerumo, ka gobane ba be ba šiiša mola ba sa le nageng ya ba phelago; bjale ba rwele nyatšego ya bona le ba go fologela moleteng, ba beilwe gare ga ba ba bolailwego.

26Le Meseke le Tubala ba gona kua le mašaba a bona, ao mabitla a ona a ba dikologilego; ke mašoboro ka moka ga bona, ba bolailwe ke lerumo; bona bao ba bego ba šiiša mola ba sa le nageng ya ba phelago.

27A ba se ke ba latšwa le bagale bao ba bolailwego; ba phalwa ke mašoboro ao a go fologela kua bodulabahu ba na le ditlhamo tša ntwa, ba samišitšwe hlogo ka marumo a bona. Molato wa bona o mo go marapo a bona, ka gobane bagale ba šiiša nageng ya ba phelago.

28Le wena o tlo robaganywa gare ga mašoboro ao, wa tlo rapalala le ba ba bolailwego ke lerumo.

29Le Edomo o gona kua, le magoši a gagwe; le bakgoma ba gagwe ka moka. Bona bao, le ge e le bagale, ba išitšwe go ba ba bolailwego ke lerumo; ba laditšwe le ona mašoboro, le ba go fologela moleteng.

30Dikgoši tša leboa di gona kua ka moka ga tšona; le bohle ba Sidone, ba fologetše moo le ba ba bolailwego; ba lewa ke dihlong ka ge ba kile ba šiiša ka bogale bja bona. Ba rapaletše le ba ba bolailwego ke lerumo e le mašoboro; ba rwele nyatšego ya bona le ba go fologela moleteng.

31Farao o tlo ba bona a wa pelo, a se hlwe a llela mašaba a gagwe ka moka. Farao le madira a gagwe ke ba go fela ka lerumo. O realo Morena Mong wa bohle.

32Gobane ke be ke mmeile go šiiša a sa le nageng ya ba phelago; ke gona a tlo go latšwa le mašoboro ao a go bolawa ke lerumo, yena Farao le mašaba a gagwe ka moka. O realo Morena Mong wa bohle.

← Chapter 31 Jump to: Chapter 33 →