Ezekiel 17

Sotho 1951 (BIBELE)

← Chapter 16 Jump to: Chapter 18 →

1Lentšu la Morena le ntletše la re:

2Ngwana motho! Kaela ba moloko wa Isiraele sefela le seema, o re:

3Morena Mong a bohle o re: Nong e kgolo ya phego tše kgolo le phofa tše telele tša mabalabala ya tla ya tsokama Libanoni, ya kga lehlašana la ntlheng ya morokwana.

4Ya le thena mahlogedi, ya le iša kua nageng ya bašabi, motseng wa babapatši,

5Ya tšea le dihlašana tše dingwe tša naga yeo, ya ya ya di šema, ya di hloma mo go lego meetse a mantši;

6Tša hloga, tša nama; bjalo ka morara wo o raranego fase, wa makala a go teteana a boela mo go wona, o tsemile medu.

7Ye nngwe nong e kgolo, ya phego tše kgolo, ya phofa tše ntši, le yona e be e le gona. Morara mme wa lebišetša medu mo go yona; le thabe tša wona tša nama di lebile yona nong, di re: Re nošetše di le mo di medilego.

8Mola di medile mo tšhemong e botse, mo go lego meetse a mantši; mo di hlogilego, tšona thabe tša bea dienywa, morara o tsoro.

9Bjale Morena yena Mong a bohle o re: Botšiša, morara woo a o ka letlega? A medu ya wona e ka se rapollwe? Dienywa tša wona, a di ka se hlohlorege, tša pona le mahlogedi ka moka? Ge o tomolwa le medu ya wona, go ka se hlwe go nyaka seatla se maatla, goba batho ba bantši.

10Sedio ge! Morara o šemilwe. A o tlo letlega? Ge o tiwa ke diphefo tša bohlabatšatši, a o ka se omelele ruri? -- O tlo omelela felo mo o šemilwego gona.

11Gomme lentšu la Morena la ntlela la re:

12Bolela le moloko wo o sa kwego wo, o re: Tše ke di bolelago a le a di lemoga? Le tseba gore kgoši ya Babele o kile a tla Jerusalema a swara kgoši ya gona, le bakgomana ba gona, a ya nabo Babele.

13A hlaola e mongwe wa moloko wa kgoši, a tlema molaka le yena, a mo eniša. Ge e le bagolo ba naga yeo o ba tlošitše.

14O dirile ka mokgwa woo, gore bogoši bo dule e le bjo bo potlana, bo se tsoge, bo fele bo dula bo tlemilwe ka molaka wola.

15Fela, kgoši yeo e mo hlanogetše, ya roma batseta ba ya Egipita, gore ba mo nee dipitsi le batho ba bantši. A fa go ka mo kgonegela? E a senyago molaka a fa a ka phologa?

16Morena Mong a bohle o re: Ka bophelo bja ka, o tlo hwela kua Babele, motseng wa yona kgoši yeo e mmeilego, ye a nyaditšego keno ya yona, a senya kgwerano ya yona.

17Farao yola a ka se ke a mo tlatša ntweng ka madira a mantši le ka setšhaba se sentši, mohla a rakeletšwe ke manaba, a mo dikologa ka merako le ka dibo, ge go bolawa batho ba bantši.

18A ka se tšwe moo ka gobane a nyaditše keno, a sentše kgwerano ye a e dirilego le kgoši ya Babele, ba ba ba fana diatla, mme a ya a dira tšeo ka moka.

19Bjale Morena Mong a bohle o re: Ka bophelo bja ka, ke keno ya ka ye a e nyaditšego, le kgwerano ye a e sentšego ke ya ka. Ke tlo di bušetša hlogong ya gagwe.

20Ke tlo mo rea ka lokwa la ka; ke tlo mo tanya ka manti a ka, ka mo iša Babele, ka yo išana nae tshekong, ka baka la ge a hlanoga a hlanogela nna.

21Ba go tšhaba nae le ba ba mo emelago, ba tlo tekolwa ke lerumo; matopana a bona a tlo tšitlanyetšwa thoko tšohle. Ke mo le tlogo lemoga ge go boletše nna Morena.

22Morena Mong a bohle o re: Ke tlo tšea ntlha ya sehlare sa morokwana sona se setelele, ka se šema. Ke tlo kga lehlogedi le lenanana mo ntlheng yeo, ka le šema godimo ga thaba e telele e phagamilego.

23Ke tlo se šema godimo ga thaba e telele ya Isiraele, gore le le moo le hloge matlakala, le bee dienywa, e tle e be sehlare se tsoro sa morokwana; mo go sona go tle go dule dinonyana tša mehutahuta, tša aga moriting wa makala a sona.

24Ke mo dihlare tša naga di tlogo tseba ge nna Morena ke kokobeditše sehlare se setelele, mme sehlare se senyenyane ka se godiša. Ke omeleditše sehlare se meetse, ka hlogiša se se bego se omile. Nna Morena ke boletše; ke tlo di dira.

← Chapter 16 Jump to: Chapter 18 →