Ezekiel 16 — Sotho 1951 (BIBELE)

2Ngwana motho! Anegela motse wa Jerusalema mabohlola a wona,

3O re: Morena Mong wa bohle o bolela le Jerusalema o re: O hlolegile nageng ya Kanana. O tswaletšwe mo go yona. Tatago ke Moamoro; mmago ke Mohethe.

4Matswalong a gago, mola o belegwe, ga wa ka wa pongwa, ga wa ka wa hlapišwa wa tšwa, ga wa ka wa šidilwa ka letswai, ga wa ka wa phuthelwa ka mašela.

5Go be go se e a go bonego a go gaugela a go dira tšeo. O be o lahlilwe molaleng, o nyadiwa mola o belegwe.

6Nna ka feta ka go bona o tenekana, o tletše madi. O le mo mading a gago ka re: Phela! Ka realo o sa le mading a gago, ka re: Phela!

7Ka go atiša bjalo ka mabjang a naga, wa ata, wa gola, wa fihla botseng bjo bo phethegilego, wa hupuga matswele, meriri ya gago ya gola: fela o be o sa apara, o fela.

8Ka feta, ka go bona, ka hwetša o le wa go ka tšewa. Ka go apeša kobo ya ka wa apara; la go enela, ka dira kgwerano le wena, wa ba wa ka. O realo Morena.

9Ka go hlapiša ka meetse; ka go hlatswa madi; ka go tlodiša ka makhura.

10Ka go apeša seaparo sa botšhephi; ka go rweša dieta tše botsana; hlogong ka go rweša šela la motwatwa, ka go apeša silika.

11Ka go hlama ka tša botšhephi; ka go rweša maseka mabogong, le pheta molaleng.

12Ka go rweša lengina la nko, le mangina a ditsebe, le mphaphahlogo wo o phadimago.

13Wa itlhama ka gauta le ka silifera, wa apara šela la motwatwa, le silika, le kobo ye e logilwego ka mabalabala. Wa ja dinkgwana tša bupi bjo bo tokilwego, le dinose, le makhura, wa ba yo botse kudukudu, bogoši bja go atla.

14Wa tuma gare ga ditšhaba ka bjona botse bja gago, ka gobane e le botse bo tletšego ka botšhephi bjo ke go apešitšego ka bjona. O realo Morena.

15Mme wena wa kganthša botse bja gago; wa re: O tsebja, wa dira bootswa, wa itahla wa ba seotswa le bohle ba ba fetilego, wa ba wa bona.

16Wa tšea diaparo tšago, wa itirela matsaka a madulo a mmotong, wa ba seotswa moo ka mokgwa o sešogo wa bonwa.

17Wa tšea dihlamo tša gago tše botse tša botšhephi, tša gauta ya ka le tša silifera ya ka, tše ke go neetšego tšona, wa itirela diswantšho tša banna, wa dira bootswa le tšona.

18Wa tšea diaparo tšela tša mabalabala wa apeša tšona, wa iša makhura a ka, le diorelo tša ka, wa di bea pele ga tšona.

19Dijo tša ka, tše ke go neetšego tšona tša bupi bjo bo tokilwego, tše ke go soletšego tšona, le makhura le dinose, o ipegile ka tšona go diswantšho tšeo, wa re di natefelwe ke monko o bose. Ke tšona tše o di dirilego. O realo Morena.

20Wa ba wa tšea le barwa ba gago le barwedi ba gago, ba o ntswaletšego bona, wa ba hlaba wa re e be dijo tša medimo e šele. A o re bootswa bja gago e be e le bjo bonyenyane,

21Ge o bile o hlaba bana ba ka, wa ba dira didimo tša yona medimo yeo?

22O le mo mabohloleng a gago ka moka, le mo mabootsweng a gago, ga wa ka wa gopola tša mehla yela o sa le e mofsa, o sešo wa apara, o le fela, o tenekana o tletše madi.

23Gomme ya re ge o ile le mabobe ao a gago ka moka, joo, joo! O realo Morena Mong wa bohle,

24Wa ikagela meboto, wa itirela madulo a rokametšego melaleng ka moka.

25Le mo magahlanong a ditsela ka moka wa bea madulo ao, wa senya botse bja gago, bohle ba ba fetago o ba kanolela dirope, wa atalatša mabootswa a gago.

26O otswitše le Baegipita ba o neanago mellwane le bona, bona bao ba mebele ye e tiilego, wa nthumola ka go atalatša mabootswa.

27Ka ba ka akga letsogo ka lwa nago, ka fokotša kabelo ya gago, ka go gafela diatleng tša ba go hloilego ba go dira se ba se ratago; e lego barwedi ba Bafilisita ba ba bego ba bile ba lewa ke dihlong ka mekgwa ya gago ya ditšhila.

28Wa otswa le Baasuri; ka gobane o be o sešo wa kgodišwa; wa dira bootswa le bona, wa se be wa re: Go lekane!

29Wa atalatša mabootswa a gago mo nageng ya Kanana, go fihla kua Kaladea; le gona wa se be wa re: Go lekane!

30Pelo ya gago e be e hlakišwa ke eng, o realo Morena, ge o dira dilo tšeo tšohle, ditiro tša mosadi wa seotswa sa ruri?

31Ge o bopa meboto mo magahlanong ka moka a ditsela, o itirela madulo a a phagamilego melaleng ka moka, mola o sa etše seotswa sa ruri sa go galala moputso,

32O le seotswa ruri, o amogela banna ba šele bakeng sa monna wa gago.

33Wa se etše diotswa tše dingwe tše di tšeago moputso. Ge e le wena wa reka baratwa ba gago, wa ba goka ka dineo, ba tla go wena ba etšwa thoko tšohle, ba dira bootswa le wena.

34Wena bootsweng bja gago o be o sa swane le basadi ba bangwe ba diotswa. O be o se na e a go nyakago; ke wena o bego o ntšha meputso, go se na e a go neago. Tše o di dirilego di a šola.

35Bjale kwaa se Morena a se bolelago, wena seotswa tena!

36Morena Mong wa bohle o re: Ke lefetša ge o tšitlantše mefiri ya gago, wa apola bofela bja gago, o otswa le baratwa ba gago; ke lefetša madi a bana ba gago ba o ba gafetšego medimo yeo.

37Tefetšo še; Ke rapa baratwa ba gago ka moka ba o bego o ba kgahla, le bohle ba o bego o ba rata, le bao o bego o ba hloya. Ke tlo ba rapa ba go tlela ba etšwa mathoko ohle, ka go apola bofela bja gago ba le gona, ba go bonela bofela bja gago ka moka.

38Ka tsebo go otla ka kotlo e swanetšego mosadi wa seotswa le mothulamadi, ka go gafela mading le go tlo dirwa ka bogale le sehlogo.

39Ke tlo go gafela matsogong a bona. Ba tlo phušola meboto ya gago; madulo a gago a a rokametšego ba tlo a uša; ba tlo go apola diaparo; ba tlo go amoga dipheta tše o tšhephilego ka tšona, ba go tlogela o hlobotše o le fela.

40Ba tlo kgobela pitšo ba go thuma ka maswika, ba go hlabaka ka marumo a bona.

41Ba tlo tšhuma nywako ya gago ka mollo; ba tlo go dira tše di go loketšego, o bonwa ke basadi ba bantši. E tlo ba gona go kgaotša bootswa bja gago, wa se sa tlo bo reka.

42Ke gona ge ke tlo ba ke phohlišitše bogale bja ka, lehufa la ka la go tlogela, ka ikhomolela, ke se hlwe ke befelwa.

43E tlo ba go lefetša ge o lebetše mehla yela ya ge o sa le ngwana o mpefela ka dilo tšeo ka moka. Mekgwa ya gago yohle ke e bušetša hlogong ya gago, gore bohlotlolo bja gago o se tlo bo tlaleletša ka a mangwe mabohlola. O realo Morena.

44Anthe bahlabi ba diema ba be ba era tše o di dirilego tše ge ba re: Ngwanenyana ke moetšammagwe.

45Le wena o etša mmago ka go lahla monna le bana. Le gona o etša bana beno ka go hlala banna le bana. Mmaweno e be e le Mohethe. Tataweno e be e le Moamoro.

46Mogolwago ke Samaria le metsana ya gona e bataganego nago ka thoko ya la ntsogošo. Monnago ke Sodoma wa ka thoko ya tlase le metsana ya gona.

47Ge e le wena, ga wa ka wa latela bona, ga wa ka wa dira mabohlola a bona; o hweditše e le a manyenyane, wa napa wa dira tše di fetišago tšeo, o befiša ditsela tša gago ka moka.

48Morena Mong wa bohle o re: Ka bophelo bja ka! Sodoma ngwaneno le metsana ya gagwe ga ba ka ba dira tše wena o di dirilego le metsana ya gago.

49Tsebang, bokgopo bja Sodoma ngwaneno e be e le boikgogomošo le bohori; le ge a iketlile gagolo le metsana ya gagwe, o be a sa thuše badiidi le bahloki.

50O be a fela a ikgogomoša, ka mmona a dira mabohlola; Nna ka mo fediša ke bone tšona tšeo.

51Samaria, le yena ga a ka a dira dibe tše di lekanago le tša gago. A gago makgapha a feta a gagwe kgolekgole. Ge ke le bapetša, ke bona eke baneno bala ba go phala ka go loka, ge ke bona mabohlola a wena o a dirilego.

52Bjale rwala kgobogo ya gago; o hlatlola bana beno molato ka ge o dirile makgapha a mantši wa fetiša bona, bona ba go phala ka go loka. Ke gona, rwala kgobogo, o lewe ke dihlong, o role bana beno.

53Mathopša a bona ke tlo a buša, mathopša a Sodoma le a metsana ya gona, le mathopša a Samaria le a metsana ya gona, le a gago a a lego mo gare ga bona.

54Gore o lewe ke dihlong, o goboge ka tšohle tše o di dirilego, ge wa bona molato o nyenyefala ka wa gago.

55Ngwaneno Sodoma a ka boela madulong a gagwe le metsana ya gagwe, le ngwaneno Samaria a ka boela madulong a gagwe le metsana ya gagwe; gona le wena o tlo boela madulong a gago le metsana ya gago.

56A fa ngwaneno Sodoma mehla yela o sa ikgodiša, o be o sa mmolele?

57Ke mola bobe bja gago bo sešo bja utollwa boka mehleng yeno, o sešo wa kwerwa ke banana ba Siria le ba mathoko ao, le banana ba Bafilisita ba sešo ba go nyatša ka gohle.

58Bjale gomme o rwele mabohlola le makgapha. O realo Morena Mong wa bohle.

59Gobane Morena Mong wa bohle o re: Ke tlo go dira tše o di dirilego, wene mosenyakeno, mohlalakgwerano.

60Ge e le nna, yona kgwerano yeo ye ke e dirilego le wene mehleng ya ge o sa le e mofsa, nka se e lebale; kgwerano le wene ye ke e tiišago ke ya neng le neng.

61Ke mo o tlogo gopola ditsela tša gago, wa nyama ge o tlo amogela bomogolwago le banyanana ba gago. Bona bao ke tlo ba dira bana beno e se go ya ka kgwerano ye ke e dirilego le wena.

62Kgwerano yela ye ke e dirilego le wena ke tlo e tiiša, wa tlo tseba ge Morena e le nna,

63Wa se sa tlo lebala, wa ba le dihlong, wa se sa ahlama ge o ipona kgobogo, mohla nna ke go lebalela tšohle tše o di dirilego. O realo Morena Mong wa bohle.