Ezekiel 5

Sotho 1951 (BIBELE)

← Chapter 4 Jump to: Chapter 6 →

1Gomme wene ngwana motho, tšea tšhoša e bogale, o e dire legare la baboodi, o ipoole hlogo le maledu; gomme o tšee meriri o e dire diphuthaphuta.

2Sephutha setee o se tšhume ka mollo gare ga motse, ge go šetše go phethegile matšatši a thakelelo. Se sengwe sephutha o se tie ka tšhoša o se dikološe le motse. Sa boraro sephutha o se gašanye se tloge le phefo. Ke bona ba ke tlogo ba khwamolela tšhoša ka ba hlomarela.

3Mo go moriri o tše o sego kae, o o phuthele ka ntlheng ya kobo ya gago.

4Moo o tšee o mongwe o o lahlele mollong, o o fiše ka mollo. Mo go wona moloko wohle wa Isiraele o tlo tšwelwa ke mollo.

5Morena Mong wa bohle o re: Motse wa Jerusalema ke o beile gare ga ditšhaba, o dikologwe ke dinaga thoko tšohle.

6Fela, o hlanogetše melao ya ka a fetiša bantle ka go dira bobe, a senya mekgwa ya ka a fetiša ba dinaga tša mathoko ohle; ka gobane ba nyaditše melao ya ka, ba se ye ka ditaelo tša ka.

7Bjale Morena Mong wa bohle o re: Ka gobane le fetiša bantle ba mathoko ka go se kwe, le sa ye ka melao ya ka, le sa dire se nna ke se laelago, mola tše le di dirago e se go dira ka mekgwa ya bantle ba mathoko,

8Gona Morena Mong wa bohle o re: Ke nna e, ke lwa nago; ditšhaba tše o lego gare ga tšona di tlo bona ge ke go sekiša.

9Ke tlo go dira se ke sešogo ka ka ke se dira, tša nka se kego ka hlwa ke di dira gape, ke lefeletša makgapha ohle a gago.

10Molato ke wona woo ge mo go lena botatago bana ba tlo ja bana ba bona, mme bana ba tlo ja botatabo, ya tlo ba gona go le ahlolela ge ke phatlalatša mašalela a lena ke a tšitlanyetša thoko tšohle.

11Molato ke wona woo ge Morena Mong wa bohle a re: Ka bophelo bja ka, ke tlo le gerula; leihlo la ka le ka se hlwe le go kwela bohloko le go go setša, ka gobane le tšhilafaditše sekgethwa sa ka ka makgapha a lena ka moka le ka ditšhila tša lena ka moka.

12Mo go ba bararo ba lena o tee o tlo hwa ka dinkhu le ka tlala; wa bobedi o tlo tekolwa ke lerumo le dikilwe; wa boraro e tlo ba wa go rakwa ke mo khwamoletše tšhoša ke mo hlomarela. Le tlo fela ka mokgwa woo.

13E tlo ba gona go phethega ga bogale bja ka, ge ke feletša pefelo ya ka go bona, ka tsebo khutša; ke mo ba tlo go lemoga gobane nna Morena ke boletše ke befetšwe, ka ba ka feletša kgalefo ya ka mo go bona.

14Gomme ke tlo go dira lešope, wa tlo ba segoboga gare ga ditšhaba, le go bohle ba ba fetago ba go bona.

15Mohla ke go sekišago ka bogale le ka pefelo le ka dikotlo tše di šiišago, o tlo ba wa go kwerwa, wa go gobošwa, wa seeletši le wa setšhošetšo mo go bantle ba mathoko. Nna Morena ke di boletše.

16Mohla ke tlogo ba betša ka mesebe ya tlala ye e befilego, ye e tlo go ba sebolai se ke se romago, tlala yeo e tlo ba e kgolo ke thokgile thito ya bogobe mo go bona.

17Ke tlo roma tlala le dibata tše mpe, tša le tlela; le dinkhu le madi di tlo le wela. Le lerumo ke tlo le tliša go lena. Nna Morena ke boletše.

← Chapter 4 Jump to: Chapter 6 →