Ezekiel 20

Sotho 1951 (BIBELE)

← Chapter 19 Jump to: Chapter 21 →

1Ka la lesome la kgwedi ya bohlano ya ngwaga wa go šupa, go tlile ba bangwe ba bagolo ba Isiraele go nna go botšiša Morena; ba dula fase pele ga ka.

2Nna ka tlelwa ke lentšu la Morena, le re:

3Ngwana motho! Bolela le bagolo ba ba Isiraele, o re: Morena Mong wa bohle o re; A fa le tlile go mpotšiša? Ka bophelo bja ka, nna ga ke botšišwe ke bolena. O realo Morena Mong wa bohle.

4Napo ba sekiše! Wene ngwana motho! Napo ba sekiše! Ba tle ba lemoge mabohlola a botatabo.

5Bolela nabo o re: Morena Mong wa bohle o re: Mohla wola ke hlaola Isiraele, ke emišitše atla sa ka ka baka la mohuta wo wa moloko wa Jakobo, gore ba ntsebe ba le kua nageng ya Egipita; ka emiša letsogo la ka ka baka la bona ka re: Ke nna Morena Modimo wa lena.

6Mohla woo ke ba enetše ka re ke tlo ba ntšha nageng yeo ya Egipita, ka ba iša nageng ye ke ba hlaoletšego yona, e elago maswi le dinose, e lego yona e botse mo go dinaga tšohle.

7Ka ba laya ka re: Ka moka lahlang makgapha a le a bonego, le se itšhilafatše ka medimo ya Egipita; Modimo wa lena ke nna Jehofa.

8Bona ba mpeela mereba, ba gana go nkwa, bohle ba se lahle makgapha a ba bego ba a lebeletše, ba se kgaogane le medimo ya Baegipita; Nna ka ba ka re ke tlo thenolela bogale bja ka godimo ga bona, ka feletša pefelo ya ka mo go bona, ba le moo Egipita.

9Ka direla ina la ka, gore ke se le nyatšiše mo ditšhabeng tše ba agilego le tšona, tše di bonego ge ke iponatša mo go bona ka re ke tlo ba ntšha Egipita.

10Ka ba ntšha moo, ka ba iša lešokeng.

11Ka ba nea ditaelo tša ka; ka ba ruta molao wa ka, wo e rego ge motho a eya ka wona a phele.

12Ka ba nea le disabatha tša ka, gore e be seka mo go bona le bana ba bona, sa go re ba kgethilwe ke nna.

13Fela, ba moloko wa Isiraele ba le lešokeng ba mpeetše mereba. Ba ganne go ya ka molao wa ka; ba nyaditše ditaelo tša ka, tše e rego ge motho a eya ka tšona a phele; ba sentše disabatha tša ka wa go befa, ka ba ka re ke thenolela kgalefo ya ka godimo ga bona gona moo lešokeng gore ke ba fedišetše ruri.

14Fela, ke diretše ina la ka gore le se gobošwe ke ditšhaba tše di bonego ge ke ba khuduša.

15Le gona ka emiša letsogo la ka moo šokeng ka baka la bona, ka re nka se ba fihliše mo nageng ya ka ba neilwego yona, e elago maswi le dinose, e lego yona e botse mo go dinaga ka moka.

16Ka realo ka ge ba nyaditše ditaelo tša ka, ba gana go ya ka melao ya ka, ba goboša disabatha tša ka, ka gobane dipelo tša bona di be di latela medimo ya bona.

17Ka fela ke ba lebelela ke ba kwela bohloko, ke se ba senye, ke se ba fediše lešokeng.

18Gona moo šokeng ka bolela le bana ba bona ka re: Le se ke la latela mekgwa ya botataweno, le se ke la ya ka melao ya bona, le se ke la itšhilafatša ka medimo ya bona.

19Modimo wa lena ke nna Jehofa; latelang melao ya ka, gomarelang mekgwa ya ka, le dire yona.

20Kgethang disabatha tša ka e be seka sa go re ke na le kgwerano le lena, le tsebe gore Modimo wa lena ke nna Morena.

21Fela, le bana ba bona ba mpeela mereba, ba se latele melao ya ka, ba se ye ka ditaelo tša ka, tše e rego ge motho a eya ka tšona a phele. Ba sentše disabatha tša ka; ka ba ka re ke thenolela bogale bja ka godimo ga bona, gore ke feletše kgalefo ya ka mo go bona gona moo lešokeng.

22Fela, ka gomiša seatla sa ka, ka dira gore ina la ka le se gobošwe ditšhabeng tše di bonego ka mahlo ge ke ba khuduša.

23Fela, gona mo lešokeng ke emišitše seatla ka ena ka re ke tlo ba tšitlanyetša ditšhabeng, ka ba gašanya le dinaga.

24Ya tlo ba go ba otla ge ba sa dire ka molao wa ka, ge ba nyatša ditaelo tša ka, ge ba goboša disabatha tša ka, ge ba lebiša difahlogo medimong ya botatabo.

25Ka ba ka ba gafela melaong e sego botse, le mekgweng ye e sa phedišego.

26Ka lesa ba itšhilafatša ka dibego tša bona, ge ba fiša bana ba bona ba dithakaletswalo ka mollo; ya ba gore ke ba šwalalanye, ba tle ba tsebe ge Modimo e le nna Morena.

27Bjale wene ngwana motho, bolela le ba moloko wo wa Isiraele, o re: Morena Mong wa bohle o re: Botataweno ba nnyaditše ka go fela ba ntlhanogela.

28Mehleng yela ke ba tlišitše nageng ye ke emišitše letsogo la ka, nageng ye ke enetšego botatabo ka re ke tlo ba nea yona, ba ile ba re go bona mmoto o phagamile, le ge e le sehlare se tletše matlakala, ba ya ba iša dibego tša bona, ba ipega gona ka dineo tša go rumola nna, ba tupiša diorelo tša bona, ba tšhela ditšhelo.

29Nna ka ba botšiša ka re: Madulo ao a phagamilego, a le yago go ona ke ang? Ke ka baka leo le nankhono a sago fela a thwe: Ke ang.

30Bjale botša ba moloko wa Isiraele o re: Morena Mong wa bohle o re: Ge le lena le sa itšhilafatša ka mekgwa ya botataweno, le sa latela makgapha a bona a bootswa.

31Le sa itšhilafatša le lehono le ka dibego tša lena, le ka go fiša bana ba lena ka mollo, le ka medimo ya lena ya diswantšho, a le re nka botšišwa ke lena ba moloko wa Isiraele? -- Ka bophelo bja ka, nka se dumele go ka botšišwa ke lena. O realo Morena Mong wa bohle.

32Tše di lego dipelong tša lena, di ka se ke tša ba tša direga, ge le re: Re tlo etša bantle, ra swana le ba mehuta e mengwe, ra hlankela kota le maswika.

33Morena Mong wa bohle o re: Ka bophelo bja ka, ke tlo le buša ka seatla se se tiilego, ke le akgela letsogo, ke le tšhollela kgalefo.

34Ke tlo le ntšha ditšhabeng, ka le phutha dinageng tše ke le tšitlanyeditšego go tšona, ke emišitše letsogo, ke tšholla kgalefo.

35Ke tlo le iša lešokeng la ditšhaba, ke tlo le sekiša gona re lebane ka difahogo.

36Ke tlo le sekiša boka mola ke sekiša botataweno lešokeng la naga ya Egipita O realo Morena Mong wa bohle.

37Ke tlo le goroša ka lepara, ka le kgopeletša ka ditlemo tša kgwerano yela.

38Ba ba mpeelago mereba ke tlo ba tloša mo lena; ba ba ntlhanogelago ke tlo ba ntšha mo nageng ya madiilelo a bona; fela, ba ka se hlwe ba etla mo nageng ya Isiraele; ke mo le tlogo lemoga ge Morena e le nna.

39Bjale lena ba moloko wa Isiraele, Morena Mong wa bohle o re: Le ka no ya la hlankela medimo ya lena ya diswantšho! Ka morago le tlo ba la kwa nna, la se hlwe le goboša ina la ka ka dibego tša lena, le ka medimo ya lena ya diswantšho.

40Morena Mong wa bohle o re: Ke mo le tlogo tla thabeng e kgethwa ya ka, thabeng ye e phagamilego ya Isiraele, le bohle ba ba lego nageng, ba tlo hlankela nna; gona moo ba tlo nkgahla ka amogela dibego tša lena le dithakangwaga, tše le tlogo di tliša e le tše kgethwa.

41Ke tlo le thabela boka monko o bose mohla ke le ntšha ditšhabeng, ke le phutha le etšwa dinageng tše le gašanyeditšwego go tšona, ka ba Mokgethwa wa lena, bantle ba di bona.

42Ke mo le tlogo lemoga ge Morena e le nna, ge ke le iša nageng ya Isiraele, nageng ye ke e enetšego botataweno ka re ke tlo ba fa yona.

43Gona moo le tlo gopola ditsela tša lena ka moka, le mediro ya lena ka moka, ye le itšhilafaditšego ka yona, la tlo ba la inyenya ka baka la mabobe ka moka a le a dirilego.

44Ke mo le tlogo lemoga ge Morena e le nna, le gore ke le dirile tše di amanago le leina la ka, e sego le ditsela tše mpe tša lena, le mediro ya lena ye e senyegilego ya ba moloko wa Isiraele. O realo Morena Mong wa bohle.

← Chapter 19 Jump to: Chapter 21 →