Ezekiel 25

Sotho 1951 (BIBELE)

← Chapter 24 Jump to: Chapter 26 →

1Ka tlelwa ke lentšu la Morena la re:

2Ngwana motho! Lebišetša sefahlogo go Baamoni, o ba porofetele.

3O bolele le Baamoni o re: Kwang lentšu la Morena Mong wa bohle. Morena Mong wa bohle o re: Ke lefetša tša mola le re: Kgonenee! Le era Ntlokgethwa ya ka mola e gobošwa, le era naga ya Isiraele mola e thosanywa, le era ba moloko wa Juda mola ba išwa bothopša.

4Ke nna e! Ke lefetša tšona tšeo ge ke go gafela diatleng tša bona ba bohlabela bao gore ba tle ba go amoge naga, ba hlome mešaša ya bona go yona, ba age meago ya bona go yona. Bona bao ba tlo ja dienywa tša gago, ba tlo nwa maswi a gago.

5Motse wa Raba ke tlo o e dira bohutamo bja dikamela, naga ya Amoni ke tlo e dira maraka a dinku, gore le tle le lemoge ge Morena e le nna.

6Gobane Morena Mong wa bohle o re: Ke lefetša tšona tšela ge o opa magoswi o tiba fase, o thaba ka pelo ka moka le ka lenyatšo, ge o bona se se dirwago naga ya Isiraele.

7Ke ka baka leo ke akgago letsogo la ka ke elwa nago, ka go gafela diatleng tša bantle, wa ba dithebola tša bona, ka go fediša gare ga ditšhaba, ka go senya dinageng, ka go dira naga ya marope, gore o tsebe ge Morena Mong wa bohle e le nna.

8Morena Mong wa bohle o re: Ke lefetša tša Moaba le Seire ge ba re: Sedio! Moloko wa Juda o swana le ditšhaba tšohle!

9Ke ka baka leo ke tlo go kgaola lehlakore la Moaba, ka mo amoga metse ya kua magomong a gagwe, lona lešofo la naga go fihla Bethejesimothe le Baalimaone le Kiryathaima.

10Ka le nea ba bohlabela, ya ba naga ya bona boka naga ya Baamoni, gore Baamoni ba se hlwe ba tsebja gare ga ditšhaba.

11Bamoaba ke tlo ba dira ka molao, ba tle ba tsebe ge Morena Mong wa bohle e le nna.

12Morena Mong wa bohle o re: Ke lefetša tša ge Edomo a dirile ka lehloyo, a hloile ba moloko wa Juda. O ikobetše molato ka go dira ka lehloyo.

13Ke ka baka leo Morena Mong wa bohle a rego: Edomo ke tlo go akgela letsogo, ka fediša batho ba gona kua, le dikgomo, ka go dira naga ya marope go tloga ka Themana gwa fedišwa ka lerumo go fihla Dedane.

14Mme tefetšo ya ka ya go lefetša Edomo ke tlo e bea seatleng sa setšhaba sa ka sa Baisiraele. Bona ba tlo dira Edomo tše di lekanego pefelo ya ka le kgalefo ya ka, ba tseba gore go lefetša nna. O realo Morena Mong wa bohle.

15Morena Mong wa bohle o re: Ke lefetša tše Bafilisita ba di dirilego ka lehloyo, ba dira ka lehloyo le ka sehlogo, le ka bonaba bja kgale bjo bo ratago go fediša.

16Ke ka baka leo Morena Mong wa bohle a rego: Ke nna e! Bafilisita ke ba akgela letsogo gore ke fediše bona Bakeretha bao, ke senye mašalela a bona mo lešing la lewatle.

17Ke tlo ba dira ka lehloyo le legolo ka dikotlo tše thata, gore mohla ke ba gafetše go lefetšwa, ba tsebe ge Morena Mong wa bohle e le nna.

← Chapter 24 Jump to: Chapter 26 →