Ezekiel 14

Sotho 1951 (BIBELE)

← Chapter 13 Jump to: Chapter 15 →

1Go kile gwa tla banna ba bangwe ba bagolo ba Isiraele, ba dula pele ga ka.

2Nna ka tlelwa ke lentšu la Morena la re:

3Ngwana motho! Banna ba dipelong tša bona ba beile medimo ya diswantšho, ba dula ba lebeletše dikgopišo tšeo tša bokgopo bja bona. A o re, nka botšišwa ke bona?

4Bjale bolela le bona o re: Morena Mong wa bohle o re: Mang le mang wa moloko wa Isiraele e a beilego medimo ya diswantšho pelong ya gagwe, mme a tla go moporofeta, nna Morena ke tlo mo fetola ka le le swanetšego bontši bjoo bja medimo ya gagwe,

5Gore ba moloko wa Isiraele ke ba sware ka dipelo tša bona, ka gobane ba ntlhanogetše bohle ka yona medimo yeo ya diswantšho.

6Bjale bolela le ba moloko wa Isiraele o re: Morena Mong wa bohle o re: Boang! Le tlogele medimo ya lena ya diswantšho, le nyenye mabohlola ao a lena ka moka.

7Gobane mang le mang wa moloko wa Isiraele, le ge e le modiiledi e a diiletšego go Isiraele, e a ikaroganyago le nna, a bea medimo ya diswantšho pelong ya gagwe, a dula a lebeletše kgopišo yeo ya bokgopo bja gagwe, ge a etla go moporofeta, a re a mpotšiše tša gagwe, o tlo fetolwa ke nna Morena ka noši.

8Yena motho eo nna ke tlo lwa nae, ka mo dira seeletši le sekwero, ke tlo mo ripa ka mo ntšha setšhabeng sa ka, gore le tsebe ge Morena e le nna.

9Ge moporofeta a ka hlehla, a bolela lentšu, nna Morena ke tlo mo hlehliša, ka mo emišetša letsogo la ka, ka mo fediša a tšwa mo setšhabeng sa ka sa Isiraele.

10Ba tlo rwala molato wa bokgopo ka bobedi bja bona, mmotšiši eo le moporofeta eo.

11Gore ba moloko wa Isiraele ba se ke ba ntlhanogela ba itšhilafatša ka dikarogo tša bona ka moka. Ke mo ba tlogo ba setšhaba sa ka, nna ka ba Modimo wa bona. O realo Morena Mong wa bohle.

12Lentšu la Morena le ntletše la re:

13Ngwana motho! Ge naga e nthumola, ge e ntlhanogela, mme nna ka akga letsogo ka thokga thito ya bogobe, ke roma tlala ya tla, ka fediša batho le dikgomo mo go yona,

14Ge mo nageng yeo go ka ba le banna ba bararo ba, Noage le Daniele le Jobo, bona bao ka go loka ga bona ba ka be ba ka fo phološa meoya ya bona e nnoši. O realo Morena.

15Le mohla ke tliša dibata tše di šiišago nageng, tša hlakola batho bana, naga ya šala le marope, e sa hlwe e sepelwa ka baka la dibata,

16Le ge nageng yeo go ka ba le banna ba bararo bao, Morena Mong wa bohle o re: Ka bophelo bja ka ba be ba ka se phološe barwa le barwedi ba batho; go ka be go phološwa bona, naga yona ya šala e le ya marope.

17Goba ge nka tliša lerumo nageng, ka re: Lerumo! Ralala le naga! Ka fediša batho le dikgomo mo go yona,

18Le ge nageng yeo go ka ba banna ba bararo bao, Morena Mong wa bohle o re: Ka bophelo bja ka ba be ba ka se phološe barwa le barwedi ba batho; go ka be go phološwa bona fela.

19Goba ge nka roma dinkhu nageng, ka e thenolela kgalefo ya ka ka madi, ka fediša batho le dikgomo mo go yona,

20Le ge go yona go ka be go na le Noage le Daniele le Jobo, Morena Mong wa bohle o re: Ka bophelo bja ka, ba ka se phološe barwa le barwedi ba batho, ba ka be ba phološa bophelo bja bona bo nnoši ka go loka ga bona.

21Gobane Morena Mong wa bohle o re: Le ge nka roma kotlo tša ka tše nne tše bohloko tše, lerumo, tlala, dibata, dinkhu, gore go fedišwe batho le dikgomo motseng wa Jerusalema.

22Le tsebe gore go tlo šala ba ba phedilego, barwa le barwedi ba lena, ba ba tlo tlišwa fa go lena, la tlo bona mekgwa le mediro ya bona; gomme le ka se hlwe le lla ka baka la bošula bjo ke bo tlišitšego bja wela motse wa Jerusalema, ke ra tšohle tše ke o tletšego ke tšona.

23Ba tlo le homotša ge le bona mekgwa ya bona le mediro ya bona. Ke mo le tlogo bona ge tše ke di dirilego e se tša lefela. O realo Morena Mong wa bohle.

← Chapter 13 Jump to: Chapter 15 →