Ezekiel 45

Sotho 1951 (BIBELE)

← Chapter 44 Jump to: Chapter 46 →

1Mohla le tlogo arolelana naga le fana magae, le arolele Morena karolo ya sebego, e tlo go ba karolo e kgethwa ya naga ya Morena. Botelele bja yona e be hlaka (40:5) tše dikete tše masome a mabedi a metšo e mehlano; bophara e be hlaka tše dikete tše lesome. E be yona e kgethwa ka moka ga yona.

2Mo go yona go tšwe karolo ya Ntlokgethwa ya botelele bja hlaka tše makgolo a mahlano; bophara e be hlaka tše makgolo a mahlano; e dikologwe ke sebaka sa bophara bja meelo e masome a mahlano.

3Karolong yeo le kgaole naga ya meelo e dikete tše masome a mabedi a metšo e mehlano botelele, le ele bophara meelo e dikete tše lesome, e be ya Sekgethwa le Sekgethwakgethwa.

4E tlo ba yona karolo e kgethwa ya naga; e tlo ba ya baperisita ba go dira modiro wa Sekgethweng, ba ba batamelago go hlankela Morena. E tlo ba ya dintlo tša bona, madulo a kgethetšwego Ntlokgethwa.

5Le Balefi ba go direla Ntlo, ba newe naga ya botelele bja meelo e dikete tše masome a mabedi a metšo e mehlano, le bophara bja meelo e dikete tše lesome; e be ya bona e tlo go ba le metse e masome a mabedi.

6Motse le o arolele naga ya bophara bja meelo e dikete tše tlhano le dikete tše masome a mabedi a metšo e mehlano botelele; e bapele le naga ya sebego se sekgethwa; e be ya bohle ba moloko wa Isiraele.

7Ge e le kgoši, e newe naga ya yona mo e bataganego le ya sebego se sekgethwa ka thoko e nngwe, le ya motse ka thoko e nngwe, mo e lebanego le dinaga tšeo ka thoko ya bodikela le ya bohlabela. Botelele bja yona e šike le karolo e tee ya moloko mellwaneng e tlogago bodikela go ya bohlabela bja naga.

8Naga ye e tlo ba karolo ya kgoši mo nageng ya Isiraele, gore dikgoši tše ke di beago di se ke tša hlwa di hlakiša setšhaba sa ka, di nee setšhaba sa Isiraele naga ka go ya ka meloko ya bona.

9Morena Mong wa bohle o re: Go hwetše, lena dikgoši tša Isiraele. Lahlang bošoro le megabaru, le ahlolele batho ka molao le ka toko. Tlošang bahlakodi ba lena setšhabeng sa ka! O realo Morena Mong wa bohle.

10Bang le moeloelo ge le diriša seelaboima, ge le ela ka Efa le ka Bathe.

11Efa le Bathe di ye ka kelo e tee. Homere e tlale ka Bathe tše lesome, goba ka Efa tše lesome; moelelo o ye ka Homere.

12Ge e le Sekele e be Gera tše masome a mabedi; Sekele tše masome a mabedi, le tše masome a mabedi a metšo e mehlano, le tše lesome, le tše tlhano, ge di hlakanywa e be Mina ya lena.

13Dibego tše le tlogo ipega ka tšona šidi: Go Homere ya mabele go tšwe saboselela sa Efa e tee; le go Homere ya leotša go tšwe sa boselela sa Gera.

14Ge e le sebego sa makhura sese: Go Kore, e lego Homere ya makhura, le ntšhe sa lesome sa Bathe, ka gobane Homere ke Bathe tše lesome.

15Go mohlape wa dinku tše makgolo a mabedi tša mafulo a manana a Isiraele. Le ntšhe nku e be sedimo sa neo ya dijo, goba sehlabelo, goba seleboga, goba seboelanyi. O realo Morena Mong wa bohle.

16Setšhaba sa naga ka moka se ntšhetše kgoši dibego.

17Kgoši yona e tlo ntšha didimo le dibego, le dibego tša menyanya ka dikgwedi le ka disabatha, le tša mabaka a ge ba moloko wa Isiraele ba phuthega; yena a tliše didimo tša diboelanyi, le dibego, le dihlabelo, le dileboga, le sedimo sa poelano sa setšhaba.

18Morena Mong wa bohle o re: Ka la pele la kgwedi ya pele le ntšhe namane ya powana e se nago bosodi, e be ya go hlatswa Sekgethwa.

19Moperisita a tšee madi a sehlabelo sa dibe a fetše dijakwana tša Ntlo ka ona le dikhutlo tše nne tša modutudu wa aletare, le dijakwana tša kgoro ya ka gare.

20Le boeletše ka la go šupa la kgwedi yeo, ka baka la e a arogilego le e a šaeditšego; e be go direla Ntlo poelano.

21La lesome la metšo e mene la kgwedi yeo ya pele e be la Paseka, la monyanya woo wa lena wa matšatši a šupago; go lewe dinkgwa tše di sa omelwago.

22Ka lona, tšatši leo kgoši e tliše powana ya sehlabelo sa dibe; e be sa gagwe le sa setšhaba ka moka.

23Ka matšatši a šupago a monyanya a ntšhetše Morena sehlabelo sa dipowana tše di šupago, le dikgapana tše di šupago tše di se nago bosodi, le phoko ya selefa; e be didimo tša ka mehla ka matšatši a monyanya.

24A tliše le sebego sa Efa ya bupi ka phokwana, le Efa ka kgapana, le sebego sa lefišwana la makhura ka Efa.

25Le ka la lesome la metšo e mehlano la kgwedi ya go šupa ka monyanya wa mešaša kgoši a dire ka mokgwa woo wa monyanya wa matšatši a šupago, ka go ntšha sehlabelo sa dibe le sa go fišwa, le dibego tša dijo le tša makhura.

← Chapter 44 Jump to: Chapter 46 →