Ezekiel 40 — Sotho 1951 (BIBELE)

1Ka la lesome la kgwedi ya pele ya ngwaga wa masome a mabedi a metšo e mehlano wa bothopša bja rena, go fedile ngwaga wa lesome la metšo e mene wa ge motse o thubilwe, ka tlelwa ke seatla sa Morena, sa nkiša gona kua.

2A nkiša nageng ya Isiraele ka dipono tša Modimo, a mpea thabeng e telele gagolo, ye ka thoko ya yona ya borwa e bego e ke go agilwe motse.

3A mphihliša gona moo, ka bona monna wa lebopo le e kego ke la mphiri, a swere lenti le le logilwego, le lehlaka la go ela; a ema kgorong.

4Monna eo a bolela le nna a re: Ngwana motho! Lebelela ka mahlo a gago, o theetše ka ditsebe tša gago, o ele hloko tšohle tše ke tlogo go bontšha tšona; ka gobane o tlišitšwe fa gore o bontšhwe, gore tšohle tše o di bonago o di anegele ba moloko wa Isiraele.

5Ka bona morako o dikologile Ntlo ka ntle. Lehlaka le monna eo a bego a le swere, botelele bja lona e be e le meelo e selelago, yeo moelo ka o tee o oketšwago ka bophara bja seatla. A ela bophara bja morako, ya ba lehlaka letee, le boemo ya ba lehlaka letee.

6A ya kgorong e lebago bohlabela, a rotoga ka manamelo, a ela serepodi sa kgoro, ya ba lehlaka letee, le serepodi sengwe ya ba lehlaka letee.

7Phapoši ya moletakgoro e be e le lehlaka letee bophara, le botelele e be e le lehlaka letee; sebaka sa mo gare ga diphapoši, e be e le meelo e mehlano; le botelele bja direpodi tša kgoro mathuding e be e le lehlaka letee.

8A ela bophara bja mathudi a kgoro ya ka gare, lehlaka letee.

9A ela le mathudi a mangwe a kgoro, meelo e seswai; dikokwane tša ona, meelo e mebedi; mathudi ao a be a le ka sa teng.

10Diphapoši tša kgorong e lebilego bohlabela e be e le tše tharo ka thoko ye le ka thoko ye; di be di lekana tšohle tše tharo, le dikokwane tša tšona ka moka di be di lekana.

11A ela go ahlama ga mojako wa gona wa go tsena, meelo e lesome la metšo e meraro.

12Pele ga diphapoši go be go na le modutudu wa moelo o tee ka thoko ye le ka thoko ye; diphapoši di be di na le meelo e selelago ka thoko ye le ka ye.

13A ela yona kgoro, a thoma dirulelong tša diphapoši tša thoko yeno a fihla dirulelong tša ka thoko yela, meelo e masome a mabedi a metšo e mehlano. Mejako e be e lebane.

14A dira dikokwane, meelo e masome a selelago; dikokwane di be di dikologile lapa la kgorong yeo ka thoko tše go fela.

15Go tloga mo matsenong a kgoro, go fihla matsenong a kgoro ya ka gare, e be e le sebaka sa meelo e masome a mahlano.

16Go be go na le mašoba a diphapoši mathuding a kgorong ka thoko tše go fela ka gare ga dikokwane. Dikokwane di be di tlokilwe dihlare tša molala.

17A nkiša lapeng la ka ntle; moo go be go go na le diphapoši le lebatho la mathudi a a diretšwego lapa ka moka thoko tšohle. Mathuding go be go na le phapoši tše masome a mararo.

18Lebato leo le be le batagane le dihlakore tša kgoro, le namile le botelele bja kgoro, le lona lebato la tlase.

19A ela bophara bja lapa a etšwa kgorong ya ka tlase, a fihla kgorong ya ka gare, ya ba meelo e lekgolo thoko ya bohlabela le ya leboa.

20Kgoro e lebilego thoko ya leboa ya lapeng la ka ntle, le yona a e ela botelele le bophara.

21Diphapoši tša gona ka thoko ye le ka thoko ye e be e le tše tharo. Dikokwane tša gona, le mathudi a gona, di be di lekana le tša kgorong ya pele; botelele bja tšona e be e le meelo e masome a mahlano; bophara e be e le meelo e masome a mabedi a metšo e fetšago seatla.

22Le mašoba a gona, le dihlare tša melala, di be di lekana le tša kgoro yela ya bohlabela. Go iwa go yona ka manamelo a kgato tše šupago. Mathudi a gona a be a lebile ka gare.

23Go be go na le mojako o išago lapeng la ka gare; o be o lebane le mojako wa thoko ya leboa, o swana le wa thoko ya bohlabela. A ela a thoma mojakong, a fihla go o mongwe, ya ba meelo e lekgolo.

24A tloga le nna ra leba thoko ya borwa; ka hwetša go na le kgoro e lebilego thoko ya borwa; a ela dikokwane le mathudi a gona, a hwetša di lekana le tšela.

25Le mašoba a be a le gona mathuding a gona a ka thoko tšohle; a be a swana le mašoba ala a mangwe; botelele e be e le meelo e masome a mahlano, bophara e le meelo e masome a mabedi a metšo e mehlano.

26Manamelo a gona e be e le a dikgato tše di šupago, a be a iša mathuding a gona. Dikokwane di be di tlokilwe ka mehlare ya melala ka thoko ye le ka thoko ye.

27Le gona go be go na le mojako o išago lapeng la ka gare la thoko ya borwa. A le ela a thoma mojakong ka thoko ya borwa a fihla mojakong o mongwe, ya ba meelo e lekgolo.

28A ntsenya ka yona kgoro yeo ya thoko ya borwa, a nkiša lapeng la ka gare. A ela mojako wa gona, wo o bego o lekana le yela e mengwe.

29A ela diphapoši tša gona, le dikokwane tša gona, le mathudi a gona, tše di bego di lekana le tšela tše dingwe. Go be go na le mašoba le mathudi a go swana le ala a go dikologa thoko tšohle; botelele e be e le meelo e masome a mahlano, bophara e be e le meelo e masome a mabedi a metšo e mehlano.

30Mathudi a be a le gona thoko tšohle; botelele bja ona e be e le meelo e masome a mabedi a metšo e mehlano, bophara e be e le meelo e mehlano.

31Le ka thoko ya go leba lapeng la ka ntle go be go na le mathudi a dikokwane tše di tlokilwego mehlare ya melala; manamelo a gona a be a na le dikgato tše seswai.

32A nkiša lapeng la ka gare la thoko ya bohlabela; a ela mojako, o bego o lekana le yela e mengwe.

33A ela le diphapoši tša gona, le dikokwane tša gona, le mathudi a gona; di be di lekana le tšela tše dingwe. Le moo go be go na le mašoba le mathudi thoko tše go fela. Botelele e be e le meelo e masome a mahlano; bophara e be e le meelo e masome a mabedi a metšo e mehlano.

34Go be go na le mathudi a go leba lapeng la ka ntle, a bego a na le dikokwane tše di tlokilwego melala, di eme thoko ye le ye; manamelo a gona a be a na le dikgato tše seswai.

35A nkiša kgorong ya thoko ya leboa, a ela mojako, o bego o lekana le yela e mengwe.

36A ela le diphapoši, le dikokwane, le mathudi. Le mašoba a be a le gona thoko tšohle. Botelele bja ona e be e le meelo e masome a mahlano, bophara e le meelo e masome a mabedi a metšo e mehlano.

37Dikokwane tša gona di be di lebile lapeng la ka ntle, di tlokilwe mehlare ya melala ka thoko ye le ye. Manamelo a gona a be a na le dikgato tše seswai.

38Gona moo go be go na le phapoši ye mojako wa yona o bego o tšwela mathuding a kgorong; e be e le mo ba bego ba hlatswetša dihlabelo gona.

39Moo mathuding a kgorong go be go beilwe medutudu, e mebedi ka thoko ye le ka ye; ke mo go bego go hlabelwa didimo le dibego.

40Le ka thoko ya ka ntle, mo go namelwago kgorong ya thoko ya leboa, go be go na le medutudu e mebedi; le ka thoko e nngwe ya mathudi go be go na le medutudu e mebedi.

41E be e le medutudu e mene ka thoko ye, le e mene ka thoko yela ya mojako; ka moka e be e le medutudu e seswai, e bego e le ya go hlabelwa mo go yona.

42Medutudu yeo ya go hlaba dihlabelo mo go yona e be e le ya maswika a a betlilwego. Botelele bja modutudu le bophara bja wona e be e le moelo o tee le seripa; boemo e be e le moelo o tee. E be e na le mo go bewago mefaka le dibjana tša go hlaba dihlabelo.

43Mo medutudung go be go dirilwe merumo e lekanago le bophara bja seatla, e le mo go fela ka ngwakong. Dinama tša dihlabelo di be di bewa medutudung.

44Mojako wa ka gare o be o bapetšwe ke phapoši tše pedi tša ba go leta kgoro ya ka gare, di lebile thoko ya borwa; phapoši e bapetšego le kgoro ya thoko ya bohlabela e be e lebile thoko ya leboa.

45A bolela le nna a re: Phapoši yeo e lebilego borwa ke ya baperisita ba go leta Ntlokgethwa.

46Phapoši e lebilego thoko ya leboa ke ya baperisita ba go lotola aletare; ke ya barwa ba Tsadoko, e lego bona Balefi ba go batamela Morena ba mo direla.

47A ela lapa, botelele ya ba meelo e lekgolo, le bophara ya ba meelo e lekgolo; dihlakore tše nne tša lona di be di lekana. Aletare yona e be e eme pele ga mojako wa Ntlo.

48A nkiša mathuding a Ntlokgethwa, a ela dikokwane tša ona; bokoto bja dikokwane e be e le meelo e mehlano go ya ka thoko ye le ye; mojako go ahlama e be e le meelo e lesome la metšo e mene; maboto a mojako e be e le meelo e meraro ka thoko ye le ka thoko ye.

49Botelele bja mathudi ao e be e le meelo e masome a mabedi, bophara e le meelo e lesome la motšo o tee. Go be go iwa ka manamelo a kgato tše lesome. Dikhutlong go be go na le dikokwane ka thoko ye le ka thoko ye.