Ezekiel 42

Sotho 1951 (BIBELE)

← Chapter 41 Jump to: Chapter 43 →

1A nkiša lapeng le ka ntle la thoko ya leboa phapošing tše di bataganego le lapa la moagong wa thoko ya leboa.

2Ka mo pele botelele bja wona e be e le meelo e lekgolo; mojako o le ka thoko ya leboa; bophara e le meelo e masome a mahlano.

3Lapa la ka gare, le e bego e le la meelo e masome a mabedi, le le bataganego le lebato la lapa la ntle le be le dikologilwe ke mathudi a a hlatlaganego gararo.

4Mo mejakong ya diphapoši tša gona go be go le lebato la go itshepelela la bophara bja meelo e lesome, le na le madutudu wa moelo o tee. Mejako ya gona e be e lebile thoko ya leboa.

5Diphapoši tša ka godimo di be di pitlagane, di fetwa ke tša tlase le tša gare; di be di fokotšwa ke mathudi a gona.

6Ka gobane di be di hlatlagane e le tše tharo, di se na dikokwane bjale ka tšela tša malapeng a mangwe. Ke tšona di hlokišitšego diphapoši tša gare le tša godimo sebaka.

7Ge e le morako wa ka ntle, o šikago le diphapoši o lebile lapeng la ka ntle botelele bja wona e be e le meelo e masome a mahlano.

8Le diphapoši tše di lokologanego di bapetše le wona di lebile lapeng la ka ntle, e be e le meelo e masome a mahlano, molokoloko wola o lebanego le Ntlokgethwa e be e le meelo e lekgolo.

9Mojako wa go tsena o be o le ka tlase ga diphapoši tšeo tša ka thoko ya bohlabela, ge motho a tsena gona a etšwa lapeng la ka ntle.

10Le ka mathoko a lapa le go be go gona le diphapoši mo morakong, di lebile mo lapeng le moagong wa ka ntle.

11Di be di na le lebato la go itshepelela, di swana le diphapoši tšela tše dingwe di lebilego thoko ya leboa ka botelele le ka bophara le ka mejako le ka mamati le ka moagelo.

12Le yona mejako ya diphapoši e be e le bjalo, e lebile borwa. Mo tsela ya mathudi e felago, go be go na le mojako o išago lapeng o lebile bohlabela, mo go tsenwago ka gona.

13A mpotša a re: Diphapoši tša ka thoko ya leboa, le tša ka thoko ya borwa, tše di dikologilego lapa leo, ke diphapoši tše kgethwa, mo baperisita ba ba batamelago Morena ba jelago tše kgethwakgethwa gona. Ke mo go bolokwago tše kgethwakgethwa, le dibego, le dineo, le didimo, le dilefa; ka gobane ke felo gokgethwa.

14Baperisita ge ba tsena, ka gobane ge ba tšwa Ntlongkgethwa ga ba dumelelwe go fo tšwela lapeng la ka ntle. Diaparo tša mediro ya bona ba di apola mo; ba di boloka mo; gomme ba apare diaparo tše dingwe, ba tsebo tšwela mo go lego batho ba bangwe.

15Ya re ge a feditše go ela meago ya ka gare, a ntšhetša ntle ka tsela ya kgoro e lebilego bohlabela. Bjale a ela lehlakore leo ka moka.

16Lehlakore leo la thoko ya bohlabela a le ela ka lehlaka lela; botelele ka moka ya ba dihlaka tše makgolo a mahlano.

17A ela thoko ya leboa ka lehlaka leo, botelele ka moka ya ba dihlaka tše makgolo a mahlano.

18A ela thoko ya borwa ka lehlaka; botelele ka moka ya ba dihlaka tše makgolo a mahlano.

19A boa a ela thoko ya bodikela ka lehlaka, ya ba dihlaka tše makgolo a mahlano.

20A ela thoko tše nne ka mokgwa woo. Felo mo go agilwego Ntlokgethwa go be go dikologilwe ke morako wo o bego o elwa ka dihlaka tše makgolo a mahlano thoko tšohle, morako e be e le wa go aroganya felo gokgethwa le tše di ilago.

← Chapter 41 Jump to: Chapter 43 →