bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Exodus 37
Exodus 37
Sukuma 2019
← Chapter 36
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 38 →
1
Ū Beezaleli ūlībeeja ī lisandīko lya mbawa ja ntī gwa ng'wininga, lya būlīhu bo sentimita igana n'ikūmi, ū būgalī galī sentimita makūmi mpungatī, nū būgūngūhu sentimita makūmi mpungatī.
2
Ū mu gatī na a h'igūlya ūlībila zahabu niza; hūna ū mu mhelo mhelo ūlīpīndīlīja būlenji bo zahabu ībūmbile chiza.
3
Ūsula na matendele anè ga zahabu, ūgadimanya ū kū mhembe jalyo ja ha sīlīlī īj'inè; abīlī ipandī līmò nī lipandī ī līngī abīlī.
4
Hanuma ūbeeja mitī ībīlī ya ng'wininga wībila zahabu.
5
Ī mitī yenīyo wīyingīja ū mu matendele ayo gadaamīlījiwe a ha isandīko, kūlwa kūyūlībūūkīja.
6
Hanuma ūtūmamīla zahabu niza kūbeeja isumbī lya shigongo, lya būlīhu bo sentimita igana n'ikūmi, ū būgalī galī walyo sentimita makūmi mpungatī.
7
Hama ūbeeja na makelubi abīlī ga zahabu ya kūsula, gūbiza a higūlya y'isumbī lya shigongo, ū kū mhelo būbīlī wajo.
8
Ikelubi līmò ū kū lwandī ūlū, nū kū lwandī ū lūngī ikelubi līmò. Ūgīīta gadimanile nī lisumbī lya shigongo ū kū mhandī būbīlī wajo.
9
A makelubi genayo gaalī na manana gagagoloolile a higūlya, gūlīfīīgīja ī lisumbī lya shigongo na manana gago; hūna gilogeja ū būshū, hanuma gūlola a hisumbī lya shigongo.
10
Hūna ūbeeja na meza ya ntī gwa ng'wininga, ya būlīhu bo sentimita makūmi kenda, ū būgalī galī sentimita makūmi atanò, ū būgūngūhu wayo sentimita makūmi mpungatī.
11
Wībila zahabu, ū mu mhelo mhelo wīpīndīlīja būlenji bo zahabu ībūmbile chiza.
12
Hūna wīpīndīlīja na lūgala lo būgalī galī bo kūbiza gītī shiganza sha munhū, nalo ū lūgala lwenūlo ūlūtūūlīla būlenji bo zahabu lūbeegije chiza.
13
Hūna ī meza wībeegeja matendele anè ga zahabu, ūgakūbanīja ū kū magūlū gayo būnè wago.
14
A matendele genayo gaalī ga nīmo gwa kūbītīja mo ī mitī ya kwībūūkīja ī meza; akagatūūlīla higūlya bbihī nū lūgala.
15
Ī mitī ya kwībūūkīja ī meza yalī ya ng'wininga, hūna yūbilwa zahabu.
16
Ūbeeja na shiseme sha ha meza, sahani, shijiko, nungū na mabakuli kūlwa kūsaamya shitambò; ī shose shenīshi shikabeejiwa kūfuma mu zahabu niza.
17
Hūna ūbeeja n'ikīndīkīlo lya talà, lya zahabu yawiza; ī shidako shalyo ūshibeeja sha kūsula, pyī nū nshigītī gwalyo. Lyalī na būlenji wa shikombe shibange bonji, na shitūlī na būlabo; ī shose shenīshi shalī shidimanījiwe nalyo bo kūshisulanīja haho.
18
Matambī atandatū gaalī gafumile a ha nshigiti gw'ikīndīkīlo lya talà, adatū ī lipandī ī līmò, nī lipandī ī līngī adatū.
19
Ī litambī ī līmò lyūbiza na shikombe shidatū shibange bonji wa ntī gwa mulozi, na shitūlī na būlabo, nī lya kabīlī lyūbiza nasho shidatū, pye na a gangī; kūshisha a gose būtandatū wago ayo gafumile a ha nshigit gw'ikīndīkīlo lya talà.
20
Lelo ū nshigiti gw'ikīndīkīlo lya talà, ū gwene gūbiza na shikombe shinè shibange bonji wa mulozi, hamò na shitūlī na būlabo.
21
A ha sīlīlī ya būmanhījo bo matambī gaalyo a ga kwandya, shūbiza ho shitūlī shimò, na a ha sīlīlī ya matambī a ga kabīlī shitūlī, na a ha sīlīlī ya matambī a ga kadatū; pye a matambī būtandatū wago gūtang'anhīla.
22
Ī shitūlī na a matambī shikabeejiwa sha zahabu yawiza, gūsulanījiwa hamò nī likīndīkīlo lya talà, shūbiza shikolo shimò.
23
Hanuma ya henaho ūtūmamīla zahabu niza, ūjibeeja ī talà jaho ījo mpungatī, na a majimījo nī sahani jaho.
24
Īkatūmama zahabu niza ya būdito bo talanta īmò, ū kūlībeeja ī likīndīkīlo lya talà lyenīlo nī shikolo shaho ī shose shenīsho.
25
Hūna ūbeeja ng'walīlò gwa ntī gwa ng'wininga, kūlwa kūzuukīja būbbani. Ūgwīta ū būlīhu nū būgalī galī wago būlenganīlile, sentimita makūmi atanò būlī lwandī, ū būgūngūhu sentimita makūmi kenda; ūgwītīla mapembe gadimanījiwe ho, gūbiza shikolo shimò nago.
26
Ūgūbila zahabu pyī ū gose, a higūlya nū mu kabazu, na a mapembe gūbiza na zahabu; ū mu mhelo mhelo ūgūpīndīlīja būlenji bo lūgala lo zahabu lūbeegije chiza.
27
A ha sīlīlī ya lūgala ūtūūla matendela abīlī ga zahabu, ū kū lwandī ūlū līmò nū lwandī ū lūngī līmò; kūlwa kwībītya mo ī mitī ya kūgūbūūkīja.
28
Nī mitī yenīyo akībeeja ya ng'wininga, hanuma bībila zahabu.
29
Na a maguta meela a ga kūbitīīla batūmami h'ikanza lya kūtūūlwa ha nīmo būgabeeja, nū būbbani ū wa ng'waso gwawiza; ī shose shenīshi shūsanja sanjiwa na koolī wa nīmo gwenūyo.
← Chapter 36
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 38 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40