bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Exodus 40
Exodus 40
Sukuma 2019
← Chapter 39
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
1
Hūna ū SEEBA ūng'wīla ū Musa gīkī,
2
“Ū mu lūshikū lwa kwandya lwa ng'weji gwa kwandya, ī lipandī lya kwikala ūkūlīzenga, lyīmīīle.
3
H'ūmo ūkūlītūūla ī lisandīko īlo līlī na shilagīlo ikūmi, hama ī lisandīko ūlīshīkīje itundubaali ī lya h'isenge.
4
Hanuma ūkūyenha ī meza, ūshitūūla ho ī shikolo īsho shiigelile kūbiza ho. Hanuma ya henaho nī likīndīkīlo lya talà ūkūlyenha ūjitūūle ho ī talà jaho.
5
Ū ng'walīlò gwa zahabu ū gwa kūzuukīja būbbani ūkūgūtūūla kū būtongi w'isandīko lya būkaanīji, hūna ūlītūūla ho nī litundubaali lya ha nyango gwa kwingīla ng'wipandī lya kwikala.
6
Ū ng'walīlò gwa shitambò sha kūpemva ū gwene ūkūgūtūūla a ha būtongi bo nyango gwa kwingīlīla ng'wipandī lya kwikala, ī liheema lya kwibilingīla.
7
Ī shiseme sha kūkalabīla ī shene ūkūshitūūla ha gatī y'iheema nū ng'walīlò, hūna ūtūūle mo minzī.
8
Hanuma ūkūlwīmīlīja ū lūūba lwa kūlīpīndya ī lipandī lya kwikala, ūlītūūla nī litundubaali lya ha mita gwa kwingīla ū mu gwalūgwa.
9
Hanuma ya henaho ūkūgasola a maguta, a ga kūbitīīla batūmami hamò na shitūmamīlo, ūlīseeseebele ī lipandī lya kwikala nī shikolo shalyo ī shose, lyeele hamò nī shiseme shalyo pye.
10
Ū ng'walīlò gwa shitambò sha kūpemva ūkūgūbila maguta, nī shiseme shago ī shose; ū ng'walīlò gwenūyo ūkūgweja gūbize ng'wela no no no.
11
Nī shiseme sha kūkalabīla ūkūshibila a maguta, hamò nī likīndīkīlo lyasho, shibize sheela.
12
Hūna ū Alooni na a bitūnja bakwe, ūkūbenha a ha nyango gwa kwingīlīla ng'wiheema lya kwibilingīla, ūbooje na minzī.
13
Hanuma ya henaho ū Alooni ūkūnzwalīkīja ī shizwalo ī sheela, ūng'witīīle na maguta ga kūng'weja, abize wa kūnitūmamīla nīmo gwa būgabīji.
14
Na a bitūnja bakwe ūkūbenha ūbazwalīkīje ī shadi jabo.
15
Nabo ūkūbitīīla maguta gīt'ūmo ūlang'wītīle ū saabo, babize batūmami bane ba nīmo gwa būgabīji. Ū kwitīīlwa kwabo kwa maguta kūkūbingīja mu nīmo gwa būgabīji ūbo būkūbiza bo shibyalīlwe shose na shose īsho shiliza.”
16
Ū Musa akīīta būlī mhayo gīt'ūmo SEEBA walī wanagīīlīla.
17
Na lūūlū ī lipandī lya kwikala lyūzengwa ng'hana, lyīmīīla mu lūshikū lwa kwandya lwa ng'weji gwa kwandya, ng'waka gwa kabīlī.
18
Ū ng'wikanza lya kūlīzenga na kūlyīmīlīja ī lipandī lya kwikala, ū Musa akashitūūla ī shidako shalyo aho shalī shiigeleelilwe kwīma, na a mīīmīlīkījo ūgatūūla, nī mbawa ja magito ūjitūūla; nī ng'hīngī jaho ūjikīndīka jīmīīla.
19
Hanuma ya henaho ū Musa ūlyamba ī likundīkījo a higūlya y'ipandī lya kwikala, hūna nī likundīkījo lya higūlya yaho ūlītūūla, gīt'ūmo SEEBA walī wanagīīlīla.
20
A mawe ayo gaalī na būkaanīji ūgasola ūgatūūla ū ng'wisandīko; hūna ī lisandīko lyenīlo ūlītūūlīla nī mitī ya kūlībūūkīja, hama nī lisumbī lya shigongo ūlītūūla a higūlya y'isandīko.
21
Hūna ī lisandīko ūlyenha ng'wipandī lya kwikala; hanuma ūlītūūla ī litundubaali lya kūshīkīja, ūlīshīkīja ī lisandīko lya būkaanīji, gīt'ūmo SEEBA walī wanagīīlīla.
22
Ū Musa wītūūla ī meza ū ng'wiheema lya kwibilingīla, lwande lwa sukuma ū ng'wipandī lya kwikala, kūnze y'itundubaali ly'isenge.
23
Nī migatī wīhela a ha meza, kū būtongi bo ng'wa SEEBA, gīt'ūmo SEEBA walī wanagīīlīla.
24
Ī likīndīkīlo lya talà ūlītūūla ng'wiheema lya kwibilingīla, kū lwandī lwa dakama ū ng'wipandī lya kwikala, lyūbiza bbihī nī meza.
25
Nī talà jaho ūjigolanya kū būtongi bo ng'wa SEEBA, gīt'ūmo SEEBA walī wanagīīlīla.
26
Ū Musa ūgūtūūla ū ng'walīlò gwa zahabu ū ng'wiheema lya kwibilingīla, kū būtongi w'itundubaali ly'isenge;
27
hūna a higūlya yago ūpemba būbbani bo ng'waso nsoga, gīt'ūmo SEEBA walī wanagīīlīla.
28
Hanuma ya henaho ūlītūūla ī litundubaali lya ha nyango gwa h'ipandī lya kwikala.
29
Hama ū ng'walīlò gwa shitambò sha kūpemva ūgūtūūla hihī nū nyango gwa kwingīla ng'wipandī lya kwikala, ī liheema lya kwibilingīla; hūna ūfunya ho shitambò sha kūpemva, na shitambò sha būsu, gīt'ūmo SEEBA walī wanagīīlīla.
30
Ī shiseme sha kūkalabīla ūshitūūla ha gatī gatī y'iheema lya kwibilingīla na ng'walīlò, hanuma ūtūūla mo minzī ga kūkalaba na kooja mhambala.
31
Ū Musa nū Alooni hamò na a bitūnja ba ng'wa Alooni būkalaba ng'wenūmo, booja nī mhambala jabo.
32
A minzī genayo gūbiza ga kūtūmamīla gwa gwa gwa kwiyooja gīko, būlī ikanza lya kwingīla ū ng'wiheema lya kwibilingīla; nūūlū balegeela ha ng'walīlò, gīt'ūmo SEEBA walī wanagīīlīla ū Musa.
33
Hanuma ya henaho ūlūkilima nū lūūba lwa gwalugwa, kūlīpīndīlīja ī lipandī lya kwikala nū ng'walīlò, ūlītūūla nī litundubaali lya ha nyango gwa kwingīlīla ū ng'wipandī lya kwikala. Ū Musa lūūlū ūbiza wagūmala ū nīmo.
34
Hūna ī lilunde lyūlīkundīkīja ī liheema lya kwibilingīla, ī likūjo lya ng'wa SEEBA lyokala pa ū ng'wipandī lya kwikala.
35
Ū Musa ūlemeelwa ū kwingīla ū ng'wiheema lya kwibilingīla, nguno ī lilunde lyalī lyalembeela a higūlya yalyo, nī likūjo lya ng'wa SEEBA lyalī lyookala ū ng'wipandī lya kwikala.
36
Ū mu ng'endo jabo ī jose a Baisilaeli, būlī ikanza ī lilunde ūlū lyīnga a h'ipandī lya kwikala lyasegeja kūja kūngī, ī likanza lyenīlo nabo yabigeleelagwa kwandya lūgendo.
37
Alīyo ī lilunde ūlū lītīngile, nabo baalī batīngaga ho kūja hose hose, kūshisha lūshikū lwa kūbūūka ī lilunde na kwīnga ho.
38
Na lūūlū pyī ū mu shikū ja lūgendo lwabo, a makanza ga līīmi ī lilunde lya ng'wa SEEBA likalaga līlembeelile a higūlya y'ipandī lya kwikala, ī būjikū gwabakaga moto ū ng'wilunde lyenīlo, kūlwa kūbaakīla pye a banhū ba numba ya ng'wa Isilaeli.
← Chapter 39
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40