bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Joshua 10
Joshua 10
Sukuma 2019
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 11 →
1
Ū ntemi Adoni-zedeki wa Yelusalemu nang'hwe akigwa gīkī ū Yoshwa wagūdiimile ū nzengo gwa Ai, nīyo ūgūkenaagūla gete. Ū nzengo gwenūyo nū ntemi waago ūgwītīla gīt'ūmo walī wagwītīla nzengo gwa Yeliko na ntemi waago; wigwa nī gīkī a bana Gibeoni baabeegije ilagane lya mhola na a Baisilaeli, na bakwikalaga būūbbihī hamò nabo.
2
Ū mhayo gwenūyū gūkankoya no ū Adoni-Zedeki na a banhū bakwe, nguno ū nzengo gwa Gibeoni gwalī na būdūla būtaale, gīt'ūmo īlī mizengo ya batemi ba nguzu, nīyo gwalī ntaale kūtinda ū gwa Ai. Hama nīyo a bagosha baamo pye baalī bagosha ba mbagashūūla.
3
Kūlwa yenīyo, ū ntemi Adoni-Zedeki wa Yelusalemu ūtūma banhū kūlī Hohamu ntemi wa Hebuloni, na Pilamu wa Yalimuti, na Yafia wa Lakishi, na Debili wa Eguloni.
4
Ūbitana alīhaya, “Nzūgi munigunanhe tūntūle ū ntemi wa Gibeoni, nguno walaganile nū Yoshwa hamò na a Baisilaeli, gīkī ībize ho mhola a ha gatī yabo.”
5
Hūna a batemi ba Baamooli būtaano wabo benabo būdiimana; ū ntemi Hohamu wa Hebuloni, nū Pilamu wa Yalimuti, nū Yafia wa Lakishi, hamò nū Debili wa Eguloni. Būūgasanja a mabità gabo, hūna būja nago a gose būūkakoma ng'hambī, bandya kūndumīla ū ntemi wa Gibeoni.
6
A Bagibeoni būtwaala nhūng'wa ū kū ng'hambī ya Giligaali ū kūlī Yoshwa; būhaya, “Ūtizūbalekanīja a basese bako, twangūhīlage wize ūtūgune. Tūgunage nguno pye a batemi ba Baamooli ba kū sī ja magūlya baadiimanile kwilwisha būlūgū nise.”
7
Ng'hana ū Yoshwa ūbūūka ī Giligaali, ūlinha ajile nī libità lya bashilikale bakwe, ūbajaana na a bashilikale abo walī abasanije gete.
8
Ū SEEBA ūng'wīla ū Yoshwa, “Yaya ū kūbogoha a benabo, nguno namalaga kūbatūūla mu nkono gwako. Atīho nūūlū ūmò wabo ūyo adūgije kūkwīmīla.”
9
Ū Yoshwa wīnga ī Giligaali ūshimīza būjikū pe, ūūkabisanganīja batamanile.
10
Ū SEEBA ūbinha ng'holò mhambūku, būyūbapeela sagala dūhū a Baisilaeli. A Baisilaeli būbapyeena a banishi babo benabo mu būpyeeni būtaale no ī Gibeoni. A Baisilaeli būboolomya nhambo kūīlīīla Beti-holoni, būja balībabūlaga nzīla ngima, kūjūshika Azeka na Makeda.
11
A banishi benabo aho balībapeela a Baisilaeli, ū mu nzīla ū kūfuma ī Beti-holoni kūja Azeka, ū SEEBA akabagwisīja mbula ya mawe mataale kūfuma ng'wilunde, bīngī babo yūbabūlaga. Abo īkababūlaga ī mbula ya mawe yenīyo bakakwīīla kūtinda abo bakabūlagwa na a Baisilaeli mu būlūgū.
12
Ū lūshikū lwene ū SEEBA wabatūūlaga a Baamooli mu makono ga Baisilaeli, ū Yoshwa akayomba ū kūlī SEEBA hape hape mu būtongi wa Baisilaeli bose; ūhaya gīkī, “Bebe muna līīmi īmīīlaga ī Gibeoni, ooye ū kūsegeja; nū bebe muna ng'weeji ū mu mbūga ya Ayaloni.”
13
Na ng'hana ī līīmi lyīmīīla, lyoya ū kūsegeja; nū ng'weji gūlembeela, kūshisha ī lihanga lyūmala shiilī ū kū banishi baalyo; gīt'ūmo handīkilwe mu shitabo sha ng'wa Yasha gīkī, “Ī līīmi līkīmīīla ha gatī gatī ya igūlū, lyoya ū kūsegeja;” lītihuutile ū kūgwa, lyīmīīla gītī lūshikū lūgima.
14
Lūtaalī kwilonga lūshikū lūngī gītī lwenūlo, nūūlū lūūtaliilonga lūshikū lūngī lwa mbika yenīyo, lwa ng'wa SEEBA kūndegeleka munhū gīko. Ū SEEBA wabalwīlīīlaga ng'hana a Baisilaeli!
15
Hūna ū Yoshwa ūshoka na a Baisilaeli a bose kū ng'hambī ya Giligaali.
16
A batemi būtaano wabo baalī baapeela būkingīla ng'wipilinga lya Makeda bibanda ng'wenūmo.
17
Ū Yoshwa aho wawīlwa gīkī a batemi a ba taano baabonagwa bibandile ng'wipilinga lya Makeda,
18
ūbawīla gīkī, “Pilingītījagi mawe mataale a ha nyango gwipilinga, muleke ho na banhū ba kūlang'hana.
19
Alīyo a bing'we yaya ū kūdīīla henaho, bakūūbījagi a baanshi bing'we, ng'ūbabūlaga ūlū ng'wabapandīka; yaya ū kūbaleka bingīle mu mizengo yabo. Nguno ū SEEBA Mulungu wing'we wabatūūlaga mu makono ging'we.”
20
Ū Yoshwa na a mabità ga Baisilaeli bakababūlaga no a banishi babo, kwenda kūbamala pyī gete; būsaaga bageehu dūhū abo bakapeelela mu mizengo yabo īyo īpīndīlījiwe ndugu.
21
Hūna ī libità ī lyose lyūshoka ū kūlī Yoshwa a ha ng'hambī ī Makeda; atilongile nūūlū ūmò wa kūbakuuma mhayo gose gose a Baisilaeli.
22
Hanuma ū Yoshwa ūhaya, “Aligūlugūlagi lūūlū ū nyango gwipilinga munenhele aha a batemi a bataano benabo.”
23
Būbafunya a batemi benabo būtaano wabo ū ng'wipilinga, walīmo ntemi wa Yelusalemu, wa Hebuloni, wa Yalimuti, wa Lakishi, na wa Eguloni.
24
Aho babeenha ū kūlī Yoshwa a batemi benabo, hūna ūbitana pye a Baisilaeli, ūbawīla a bataale ba mabità abo baalī biza hamò nang'hwe, “Egeelagi aha mupande na magūlū ging'we a ha nhingo ja batemi benaba.” Biza būpanda na magūlū gabo a ha nhingo jabo.
25
Ū Yoshwa ūbawīla gīkī, “Īnjagi ū boobà, yaya nūūlū kūhanahana; timbyagi ng'holò gete. Handīkīīlagi mujaashe. Nguno ū SEEBA akūbīītīla gīko pye a banishi abo mulilwishe nabo mu būlūgū.”
26
Na lūūlū ū Yoshwa ūbabūlaga a batemi benabo būtaano wabo, būnungelejiwa mu mitī ītaano; būlekwa banungeelile ū mu mitī yenīyo kūshisha mhīndī.
27
Aho lyasalalīja ī līīmi, ū Yoshwa ūlagīja bīnjiwa ū mu mantī ūmo baalī banungelejiwa, būponejiwa ū ng'wipilinga ūmo baalī bibanda. A ha nyango gwipilinga lyenīlo būchiba ho mawe mataale; nī lelo īyī gataaalī galīho hoi.
28
Ū lūshikū lwenūo ū Yoshwa ūgūdima ū nzengo gwa Makeda; ūgūkenaagūla wa līlūshū pye ū nzengo hamò nū ntemi wabo; ūbamala kūbabūlaga pye a banhū, atalekeelile mpanga nūūlū ūmò. Ūng'wītīla ū ntemi wa Makeda ūmo walī wang'wītīla ntemi wa Yeliko.
29
Hanuma ya henaho, ū Yoshwa wīnga ī Makeda hamò na a Baisilaeli bose; būsegeja bajile kū nzengo gwa Libna, būūkagūdumīla.
30
Ū SEEBA ūgūtūūla nū nzengo gwenūyo hamò nū ntemi waago mu makono ga Baisilaeli. Nū gwene ū Yoshwa ūgūtūla na līlūshū, hamò na a biikaji baamo a bose; ūbamala pye atalekeelile mpanga nūūlū ūmò. Ū ntemi waago ūng'wītīla gīt'ūmo walī wang'wītīla ntemi wa Yeliko.
31
Ū Yoshwa na a Baisilaeli a bose bīnga nī Libna, būja Lakishi būūkatūūla ng'hambī kūgūpīndya, hanuma būgūdumīla.
32
Nū gwene ū SEEBA ūgūtūūla mu nkono gwa Baisilaeli; ha lūshikū lwa kabīlī yaho ū Yoshwa ūgūdima. Ū nzengo ū gose na a banhū baamo pye a bose ūgūtūla na būūgī bo līlūshū gīt'ūmo akagwīītīla nzengo gwa Libna.
33
Ū mu shikū jenījo ntemi Holani wa Geza, ūsangwa wizile kūbagunanha a bana Lakishi, alīyo ū Yoshwa ūmpyena nī libità lya bashilikale bakwe. Ūbamala kūbabūlaga pye, atalekeelile mpanga nūūlū ūmò.
34
Ū Yoshwa na a Baisilaeli a bose bīnga nī Lakishi, būja Eguloni; būūkatūūla ng'hambī kūgūpīndya, hama bandya kūgūdumīla.
35
Būgūdima lūshikū lwenūlo dūhū, būgūtūla na būūgī bo līlūshū, būbamala pye a banhū ba ng'wenūmo, gīt'ūmo baalī baagwītīla nzengo gwa Lakishi.
36
Ū Yoshwa na a Baisilaeli a bose bīnga ī Eguloni būja Hebuloni būūkagūdumīla;
37
nago būgūdima, būgūtūla na būūgī bo līlūshū hamò nū ntemi waamo, na a magūngūli gaago na a banhū ba ng'wene pye a bose. Batalekile banhū bapanga bose bose, bakabamala pye gete gīt'ūmo baalī bīītīla Eguloni.
38
Hanuma ū Yoshwa na a Baisilaeli a bose būgalūka bajile kū nzengo gwa Debili, nū gwene būūkagūdumīla.
39
Būūgūsola hamò nū ntemi waamo, pye na a magūngūli gaago; a bazengi baamo būbatūla pye na būūgī bo līlūshū būbabūlaga; batalekeelile mo mpanga nūūlū ūmò. Būūgwītīla nago ū nzengo gwa Debili hamò nū ntemi waamo gīt'ūmo bakagwītīla gwa Libna hamò na ntemi waamo, nū gwa Hebuloni.
40
Na lūūlū ū Yoshwa ūbiza wīdima pyī ī sī yenīyo, nī sī ja magūlya, nī Negevu, na a mabbaala ga mbūga, nī sī ja mitubīlo, hamò na a batemi baajo pye a bose. Atalekile mo bapanga nūūlū hado; akabamala kūbabūlaga pye abo bakesheemhaga, gīt'ūmo SEEBA Mulungu wa Baisilaeli walī walagīla.
41
Ū Yoshwa ūbapyeena pye pye pye gete, kwandīja Kadeeshi-balinea kūjūshika Gaza, nū kwandīja mabbaala ga Gosheni kūja Gibeoni.
42
A batemi bose benaba ū Yoshwa ūbapyena ng'wikanza līmò dūhū, nguno ū SEEBA Mulungu wa Baisilaeli wabalwīlīīlaaga a Baisilaeli.
43
Hanuma ya henaho ū Yoshwa ūshokanya Giligaali kū ng'hambī, hamò na a Baisilaeli a bose.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24