Joshua 20

Sukuma 2019

← Chapter 19 Jump to: Chapter 21 →

1Hūna ū SEEBA ūng'wīla ū Yoshwa gīkī,

2“Bawīlage a Baisilaeli basolanhye mizengo ya kūpeelela, gīt'ūmo nakakūlagīla mu nzīla ya ng'wa Musa;

3wilonge būpeelelo, ūlū munhū ūmūlaga munhū ūngī wa kūhūbīla, ūbiza atītile wa makaala apandīke ha kūpīlīla, atizūbūlagwa na maji wa shiilī.

4Akūpeelela mu nzengo gūmò gwa mizengo yenīyo, ūūkashika wīmīīla ha mita gwa kwingīlīla ū mu nzengo, ūsomboola ī mihayo yakwe ū kū banamhala ba nzengo gwenūyo. Nabo bakūng'wanukūla wingīle ū mu nzengo gwabo, bang'winhe ha kwikala, iikale ng'wenūmo hamò nabo.

5Ū maji wa shiilī ūlū ūnkūūbīja, yaya ū kūmfunya ū mūlagi ng'wenūyo na kūntūūla mu nkono gwakwe ū maji wa shiilī; nguno wamūlagaga ū nzenganwa ng'wiye mu kūhūbīla, walī atang'wikanilwe.

6Ū munhū ng'wenūyo akwikala ū mu nzengo gwenūyo kūshisha wīmīīle kū būtongi w'ibanza, īlolwe chiza ī mihayo yakwe; hūna akwikala ng'wenūmo kūshisha ache ū ngabīji ntaale ūyo asugile ī shikū jenījo. A henaho hū adūgije kūshoka ū kū nzengo gwa ng'wawe ūko wapeela.

7Na ng'hana būsolanhya mizengo; ū mu sī ya magūlya ya banhū ba lūganda lwa ng'wa Nafutali, būsola nzengo gwa Kedeshi mu Galilaya. Ū mu sī ya magūlya ya banhū ba lūganda lwa ng'wa Efulaimu, būsola Shekemu; hama ū mu sī ya magūlya ya banhū ba lūganda lwa ng'wa Yuda būsola Kiliati-alaba (h'ī Hebuloni).

8Ū kū lwandī lwa kīya ya Yolodani ya Yeliko, būsola Beza, nzengo gwa ng'witogolo lya kū magūlya ga sī ya banhū ba lūganda lwa ng'wa Lubeni, na Lamosi mu sī ya Gileadi, sī ya banhū ba lūganda lwa ng'wa Gadi; na Golani mu sī ya Bashani, sī ya banhū ba lūganda lwa ng'wa Manase.

9Ng'wisilaeli ose ose, nūūlū ngeni ūyo akwikalaga hamò nabo ūlū ūbūlaga munhū wa kūhūbīla, walī azunīlījiwe kūpeelela mu nzengo gose gose ū mu yenīyo, atizūbūlagwa na maji wa shiilī aho ataalī kwīmīīla kū būtongi w'ibanza kūdegelekwa.”

← Chapter 19 Jump to: Chapter 21 →