bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Joshua 8
Joshua 8
Sukuma 2019
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 9 →
1
Hanuma ya henaho ū SEEBA ūng'wīla ū Yoshwa, “Ūtizogoha nūūlū ūtizūtawa tawa. Līsolage pyī ī libità lya bashilikale ūje ūkagūdumīle ū nzengo gwa Ai. Nguno nantūūlile mu nkono gwako ū ntemi wa Ai na a banhū bakwe, nū nzengo gwakwe, pyī nī sī yakwe.
2
Ū nzengo gwa Ai nū ntemi wago ūkūgwītīla nago gīt'ūmo walī wagwītīlile nzengo gwa Yeliko nū ntemi wago. Gwike ī shisonzwa nī mitugo ja mu Ai, shose shenīsho mukūsola jibize sabo jing'we. Ū nzengo ūkūgwibandīīla kū numa yago.”
3
Na lūūlū ū Yoshwa ūbūūka nabo pye a bashilikale bakwe, būja kwīdumīla ī Ai. Ūsolaanhya banhū shihūmbī makūmi adatū ū mu bashilikale bakwe a babūdūla gete, ūbatūma būja ko makanza ga būjikū.
4
Ūbalagīja alībawīla, “Degelekagi chiza, mukūgwizīīla ū nzengo kūfuma kū numa yaago, hūna ng'wibande pye a bose mu masaka; alīyo yaya ū kūbiza kūle nago.
5
Hūna ū nene na a bashilikale abo nakūbiza nabo, tūkūgūdumīla ū nzengo kūfuma kū būtongi; a banhū baamo ūlū būtūbona bakūtwihuutīīla gīt'ūmo bakīītīla ī kwandya, nise tūkūbapeela.
6
Bakūtūpeeja batūkūūbīgije kūshisha tūbasegendeje ū kū nzengo, nguno bakwiwīla gīkī, ‘Baabo baatūpeela hangī gīt'ūmo bakīītīla kwandya.’ Na lūūlū ū ng'wikanza lya kū tūpeeja,
7
a bing'we mukūpuluka kūfuma aho ng'wibandaga mugūdime ū nzengo. Ū SEEBA Mulungu wing'we akūgūtūūla mu makono ging'we.
8
Ūlū ng'ūgūdima ū nzengo gwenūyo gūtiimagi moto. Ītagi gīt'ūmo SEEBA alagīlile, ū nene nang'winha ī shilagīlo; ning'we mukwīdīīlīīla lūūlū ī yīngī.”
9
Hūna ū Yoshwa ūbaleka būja; nabo ng'hana būja ū kwipandī īlo lyigeleelilwe, būkibanda bbihī bbihī kwenūko, ha gatī ya Beeteli nī Ai. Alīyo ū wei ū Yoshwa ū būjikū wenūbo ūkeeyūla alī hamò na a banhū a bose.
10
Kū ntondo dilū ū Yoshwa ūbūūka ūbahela chiza a bashilikale bakwe; ū wei na a batongeeji ba Baisilaeli būtongela ū kū būtongi aho bajile ī Ai.
11
Ī libità ī lyoise īlo lyalī hamò nang'hwe būshimīza bajile ū kū nzengo, aho beegeela ū kū būtongi waago būtūūla ng'hambī kū lwande lwa sukuma ya Ai; a ha gatī yabo nū nzengo gūbiza ho ntubīlo gwa mbūga.
12
Hūna ū Yoshwa ūsola banhū gītī shihūmbī shitanò, ūbalagīla kwibanda ha gatī ya Beeteli na Ai, kū ng'weli ya nzengo.
13
A bashilikale a bose būhelwa chiza, būlī bene mu mapandī gabo; bamò baalī kū ng'hambī sukuma ya nzengo, na bangī bibanda kū ng'weli yaago ū nzengo, pye būmalīīla. Ū būjikū wenūbo ū Yoshwa ūja ūūkakeeyula kū ntubīlo gwa mbūga.
14
Ū ntemi wa Ai aho wabona gīko, ū wei na a banhū bakwe a bagosha ba mu nzengo gwenūyo būbūūka wangū wangū ītaalī dilū, būja kwamba būlūgū na a Baisilaeli kū ntulumenho gwa kūīlīīla kwitogolo lya Alaba. Alīyo walī atamanile ī gīkī baalīho banhū bang'wibandīīlile ū kū numa ya nzengo.
15
Ū Yoshwa na a Baisilaeli a bose būzunya ū kūpeejiwa balīshoshiwa kū numa; būpeela bajile kū nhogolo jaape.
16
A bagosha ba mu nzengo gwa Ai pye a bose bitanwa kūbakūūbya; būnkūūbya ū Yoshwa nī libità lya bashilikale bakwe, gashinaga balīdutwa kūsegenejiwa ū kū nzengo gwabo.
17
Pye gete a bagosha būfuma ū mu nzengo, atasaagile nūūlū ūmò ū mu mizengo ya Ai nī Beeteli, ū wa kūleka kūbapeeja a Baisilaeli. Būgūleka ng'waje ū nzengo būpeela kūbakūūbīja a Baisilaeli.
18
Hūna ū SEEBA ūng'wīla ū Yoshwa gīkī, “Līnunjage ng'wigūlya ī lichimu lyako īlo ūlībūūkije mu nkono gwako, ūlyolote kūlola Ai, nguno ū nzengo gwenūyo nakūgūtūūla mu nkono gwako.” Ng'hana ū Yoshwa ūlīnunja ng'wigūlya ī lichimu lyakwe kūlīloleja ī Ai.
19
Aho wīta dūhū ī gīko, a banhū abo baalī bibanda būpuluka wangū wangū; būpeela bajile ū kū nzengo, būkingīla mo būgūdima, hama būgūtiima moto ī likanza lyenīlo.
20
A banhū ba Ai aho bikībūka būlībona ī lyochi linunga kwigūlya kū malunde; alīyo būgayiwa ī lipandī ī lya kūpeelela kūlwa kwipīja, a Baisilaeli abo baabapeelaga kūīlīīla kwitogolo būbagalūkīla a bapeeja babo.
21
Nguno ū Yoshwa na a Baisilaeli a bose abo wapeelaga nabo aho babona gīkī abo baalī bibanda bagūsola ū nzengo, nī lyochi līlīdundumūka kūfuma ū kū nzengo gwenūyo, bakabagalūkīla a bana Ai bandya kūbabūlaga.
22
A bashilikale abo bakagūpemba moto ū nzengo nabo būbasanga; būbiza banyamanījiwa ha gatī; būlī lwandī būbiza ko Baisilaeli. A Baisilaeli bakababūlaga no, batalekeelile mpanga nūūlū ūmò, na atigelile wa kūpūlūgūka gīkī apeele.
23
Alīyo ū ntemi wa Ai ū ng'wene būndima alī mpanga gīko, būntwaala kūlī Yoshwa.
24
A Baisilaeli aho bamala ū kūbabūlaga a bana Ai abo baalī kū malaale na kū matogolo ūko baalī babakūūbīja, aho bamalwa kūbūlaaagwa pye a bose, a Baisilaeli būshoka ū kū nzengo gwa Ai, būkababūlaga pye abo baalīmo.
25
Ū lūshikū lwenūlo būcha banhū shihūmbī igana na makūmi abīlī, bagosha na bakīma; pye a banhū ba mu nzengo gwa Ai.
26
Nguno ū Yoshwa atagwikije ū nkono gwakwe ūyo gwalī gwalīnunja ng'wigūlya ī lichimu, kūshisha būshila pye gete a bikaji ba mu nzengo gwa Ai.
27
Alīyo ī chene a Baisilaeli bakasola mitugo na shikolo shingī, kūbiza shisonzwa shabo kūfuma ū mu nzengo gwenūyo, gīt'ūmo SEEBA walī wanagīīla ū Yoshwa.
28
Na lūūlū ū Yoshwa ūgūpemba moto ū nzengo gwa Ai, ūgwīta kūbiza itūūgo lya būsoso ilalī, ipandī lītī lya kwikalīlwa na banhū kūshisha lelo īyī.
29
Ū ntemi wa Ai ūnungeleja ha līntī kūshisha mhīndī; aho lyasalalīja ī līīmi, ū Yoshwa ūlagīja gwīnjiwa ū mimba gwenūyo ū mu līntī, gūponyiwa ha mita gwa kwingīlīla mu nzengo. Hūna būtūlīīla ho ilūndo itaale lya mawe, īlo nī lelo īyī lītaalī līlīho hoi.
30
Hanuma ya henaho, ū Yoshwa ūzenga ng'walīlo mu lūgūlū lwa Ebaali kūlwa nguno ya ng'wa SEEBA Mulungu wa Baisilaeli,
31
gīt'ūmo Musa ntūmami o ng'wa SEEBA walī wabalagīīla a Baisilaeli. Akagūzenga kūlenganīla nū mumo handīkīlilwe ū mu shitabo sha shilagīlo sha ng'wa Musa, ng'walīlo gwa kūzengwa na mawe gatabeegelejilwe na munhū, ayo gatakuumiwe na shitūmamīlo sha chūūma shose shose. A higūlya yaago būmfunīja ū SEEBA shakwinha sha kūpemva; būfunya ho na shitambò sha būsangī.
32
Aho balī kwenūko, ū Yoshwa ūshandīka būpya ha mawe ī shilagīlo sha ng'wa Musa, īsho walī washandīka; ūshandīka a Baisilaeli balolile;
33
Baisilaeli bose, bageni na a baana byalwa, hamò na a banamhala babo, na a bagunanhi na a balamuji babo; bose benaabo baalī ū kū mhandī būbīlī wajo ī j'isandīko lya ng'wa SEEBA ī lya būlagane, baalī bīmīīla būlolela ū kū banhū abo baalī balībūūkije, a bagabīji ba lūganda lwa Lawī. Nusu ya banhū baalī bīmīīla kū būtongi wa lūgūlū lwa Gelizimu, ī nusu ī yīngī kū būtongi wa lūgūlū lwa Ebaali, gīt'ūmo Musa ntūmami o ng'wa SEEBA walī wabalagīīlīla kūfuma kale, aho wabaganikīlaga mihayo ya kūbalombela a Baisilaeli.
34
Hanuma ya henaho ū Yoshwa wīsoma pyī ī mihayo ya shilagīlo, ī na a mazumo, gīt'ūmo yandīkilwe mu shitabo sha Shilagīlo.
35
Ū mu mihayo pyī īyo Musa walī walagīla, gūtasaagile nūūlū gūmò ūyo atagūsomile ū Yoshwa ū kū Baisilaeli bose abo baalī bibilinga, pye abo baalīho; a bakīma, baana, na a bageni abo bikalaga hamò nabo.
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 9 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24