Joshua 17

Sukuma 2019

← Chapter 16 Jump to: Chapter 18 →

1Ūbū hū ū wingīji ūbo bakahelelwa banhū ba lūganda lwa ng'wa Manase, ū ng'witūnja o ng'wa Yosefu wa kwandya kūbyalwa; h'ū wingījibo ng'wa Makili ū ng'witūnja o ng'wa Manase, ū myalwa wa kwandya. Ū Makili walī nkūlūgenji wa Bagileadi, abo bakinhwa Gileadi na Bashani kūbiza wingīji wabo; nguno a banhū ba shibyalīlwe shakwe baalī ba nguzu no ū mu kūlwa būlūgū.

2Na lūūlū ū ngabo gwenūyū gūkabiza gwa banhū ba lūganda lwa Manase abo baalī baasaagīīla ū mu ndūgū jabo; lūdūgū lwa ng'wa Abiezeeli, Heleki, Asilieli, Shekemu, Hefeeli na Shemida. A benaba hū baalī baana bagosha ū mu shibyalīlwe sha ng'wa Manase ū ng'witūnja o ng'wa Yosefu; gīt'ūmo ndūgū jabo jalī jilī.

3Gwike walīho Zelofehadi ng'witūnja o ng'wa Hefeeli, ng'witūnja o ng'wa Gileadi, ng'witūnja o ng'wa Makili, ūyo nang'hwe walī ng'witūnja o ng'wa Manase; ū ng'wenūyo walī atī na bitūnja, walī na bashīke dūhū, mina gabo ba Mahīla, Noa, Hogila, Milika, na Tīzīla.

4A bashīke benabo bakaja kūlī Eliezeli ū ngabīji, nū Yoshwa ū ng'witūnja o ng'wa Nuni, hamò na a banamhala; būūkabawīla gīkī, “Ū SEEBA walī wanagīla ū Musa kūtwinha nise wingīji hamò na a basīza bise.” Ng'hana ū Yoshwa ūbinha ū wingīji hamò na a banhū ba shibyalīlwe sha ng'wa saabo, gīt'ūmo shaalī shilagīlo sha ng'wa SEEBA.

5Ū Manase winhwa migabo yīngī ikūmi, ongeleleja a ha wingīji ūbo walī wamala kwanukūla Gileadi na Bashani, ū kū kīya ya mongo gwa Yolodani,

6nguno a baana bakīma a ba mu lūganda lwa ng'wa Manase bakanukūla nabo ū wingīji hamò na a baana a bagosha. Ī sī ya Gileadi yalī īhelilwe kūlwa banhū ba lūganda lwa Manase abo baalī baasaagīīla.

7Ū lūbīmbī lwa sī ya banhū ba lūganda lwa ng'wa Manase lwalī kūfuma kū sī ya Asheli, hūna lūūlola Mikimetati, kīya ya Shekemu. Ū kūfuma a henaho lūūlola dakama lūūbatūla mu gatī a bana Entapua.

8(Ī sī ya Tapua yalī ya banhū ba lūganda lwa ng'wa Manase; alīyo ū nzengo gwa Tapua gwenekīlī ūyo gwalī ū kū lūbīmbī, ū gwene gwalī gwa banhū ba lūganda lwa ng'wa Efulaimu).

9Ū kwīnga a henaho ū lūbīmbī lwenūlo lūūkolobela kūja dakama dūhū, lūūkashika kū longa lwa ng'wa Kana. Mizengo īmò ya banhū ba lūganda lwa ng'wa Efulaimu yaalī ū mu sī ya banhū ba lūganda lwa ng'wa Manase. Alīyo ī gete ī sī ya banhū ba lūganda lwa Manase yalī sukuma ya longa lwenūlo; ū lūbīmbī lūūbīta ū mu longa, lūūkakaja kū nyanza.

10Ū kū dakama yalī sī ya banhū ba lūganda lwa ng'wa Efulaimu, ū kū sukuma banhū ba lūganda lwa ng'wa Manase, ī sī yabo yūūkashika kū Nyanza. Ū kū sukuma yalī ībīmbīkanilwe na banhū ba lūganda lwa ng'wa Asheli, lelo ī kīya banhū ba lūganda lwa ng'wa Isakaali.

11Ū mu sī ya banhū ba lūganda lwa ng'wa Isakaali nū lwa ng'wa ng'wa Asheli yalīmo mizengo ya banhū ba lūganda lwa ng'wa Manase; mizengo gītī, Beti-shani, Ibelamu, na banhū ba Dooli, Endoli, Taanaki, na Megido, pye na a magūngūli gabo (Nafoti gwene gwa kadatū).

12Gwike a banhū ba lūganda lwa ng'wa Manase baalī batī na būdūla wa kwigaasha ū mu mizengo yose yenīyo, nguno a Bakanaani baalī baalemela ū ng'wipandī lyenīlo.

13Alīyo ī chene a Baisilaeli aho bongeja ū kūkwīīja ī nguzu, būbatūūla a Bakanaani mu milīmo y'hadīke, lelo ū kūbapeeja gete ū mu sī yenīyo, batabapeegije.

14A banhū ba lūganda lwa ng'wa Yosefu bakīīta būng'wīla ū Yoshwa gīkī, “A bise tūlī banhū bingī no nguno ū SEEBA watwīlūkīla ningī, hama nibūlī watwinhile ipandī līmò na ngabo gūmò dūhū ū gwa wingīji?”

15Ū Yoshwa ūbashokeja alīhaya, “Ūlū mulī bingī no, nose ī sī ya magūlya ga Efulaimu īlīng'wileba, jagi kū mapoolu ga kū sī ya Bapelizi na Balefai mukapuuge kwenūko ng'wigalīhīje.”

16A banhū ba lūganda lwa ng'wa Yosefu būshosha balīhaya, “Ī chene ng'hana yatwilebile ī sī ya magūlya, alīyo ū kū sī ja ntubīlo balīko Bakanaani; bakikalaga Beeti-shani nū mu magūngūli gaho, hamò nī Yezileeli; hama nīyo pye a banhū benabo balī na magogoteni ga chūūma.”

17Nang'hwe ū Yoshwa ūbashokeja a banhū ba lūganda lwa ng'wa Yosefu, a ba numba ya ng'wa Efulaimu na Manase, ūbawīla gīkī, “A bing'we mulī bingī no, ītūbeelela ng'wikale hipandī līmò dūhū alīyo mulī na nguzu gīko.

18Ī sī ya kū magūlya īlī na mapoolu ī chene, alīyo īpuugagi yeele, ībize ying'we pyī ī yose; a Bakanaani a bene mūdūgīje ū kūbapyena ng'ūbapeeja būng'wīngīla nūūlū īkī balī na nguzu, na balī na magogoteni ga chūūma.”

← Chapter 16 Jump to: Chapter 18 →