bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Joshua 7
Joshua 7
Sukuma 2019
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
1
Gwike a Baisilaeli bakaleka ū kūshimīza na būtūngīlīja ū mu mihayo ya shikolo īsho shaalī shiigeleelilwe shifunyiwe kūlwa ng'wa SEEBA. Walīho ngosha ūmò lina lyakwe Akani, ng'witūnja o ng'wa Kalīmi ng'wana Zimli, wa numba ya ng'wa Zela, lūganda lwa Yuda. Ū ngosha ng'wenūyo walī wasola shikolo shilebe ū mu shenīsho; ū SEEBA ūbapelanīla no a Baisilaeli.
2
Ū mu shikū jenījo ū Yoshwa ūtūma banhū kūfuma ī Yeliko, baje kū nzengo gwa Ai, bbihī na Bet-aveni, kīya ya Beeteli. Ūbawīla gīkī, “Jaagi mukīdate ī sī yenīyo.” Na ng'hana a banhū benabo būja būūkagūdata ū nzengo gwa Ai.
3
Aho bashoka ū kūlī Yoshwa būng'wīla gīkī, “Ītīho nguno ya kūja ko pye a banhū, twalaga banhū gītī shihūmbī shibīlī nūūlū shidatū dūhū gīko bakagūdiime ū nzengo; yaya ū kūbanoja noja pye a banhū, nguno balīmo banhū bageehu no ū mu nzengo gwenūyo.”
4
Na ng'hana banhū baakūshika gītī shihūmbī shidatū gīko būlinha bajile ko; alīyo būūkatūlwa no na a mana Ai, būpeela nhambo.
5
Banhū babo makūmi adatū na batandatū būbūlagwa na a mana Ai. Boolomiwa nhambo kūfuma a ha mita gwa nzengo kūshisha Shebalimu; būja bakūbūlagagwa ū mu ntulumenho gwenūyo. Ū mhayo gwenūyo gūbogohya no a banhū, jūbbaaha ī ng'holò jabo.
6
Ū Yoshwa ūtandūla shizwalo shakwe, wiponeja hasī kū būtongi w'isandīko lya ng'wa SEEBA, ūdīīla henaho kūshisha mhīndī. A banamhala ba Baisilaeli nabo bīīta gīko, bisaamagūlīla lūbuubu ū kū mitwe yabo!
7
Ū Yoshwa ūlīla alīhaya, “Ee SEEBA Ndūji wa shose, nibūlī a banhū benaba wabakīgije ū mongo gwa Yolodani, gashi nīyo ūliza kūtūtūūla mu makono ga Baamooli dūhū batūkenaagūle? Nguno nūūlū ū kwikala ū kū nkīlo gwa Yolodani ni twigegije dūhū!
8
Ī gīsī lūūlū ī haha nahaye mhayo kī SEEBA, īkī a Baisilaeli bapyeenwa gīkī na a banishi babo?
9
A Bakanaani na a banhū a bangī a ba mu sī yenīyī bakwigwa ūmo yajīlaga, batūsange kūfuma hose hose batūmale, balīpyagūle gete ī lina lise līshile ū mu sī. Ī gīsī gūlīho mhayo kī ūyo ūkūgwīta kūlwa lina lyako īlo līl'itaale?”
10
Ū SEEBA ūng'wīla ū Yoshwa, “Īmīīlaga ūgūngūmūke, winamaga hasī gīko ūlīīta mhayo kī?
11
A Baisilaeli baakenije; baalīkenaagūlile ī lilagane lyane, īlo nakabalagīla gīkī shibiigelile kūlīdima. Baasolile shikolo īsho shiigeleelilwe kūfunyiwa kūlwa ng'wa SEEBA, biibile na baalomalomile, hūn'ī shikolo shenīsho būshitūūla hamò na shikolo shabo.
12
H'ī nguno yene a Baisilaeli batūdūla ū kūbīmīla a banishi babo; bakūbinhīla ngongo baapeela, nguno babizile banhū abo bigeleeelilwe kūkenaagūlwa. Ū nene natūdūla ū kūbiza hamò ning'we hangī, kūshisha mushikenaagūle īsho shilī mu bing'we; īsho shiigeleelilwe kūkenaagūlwa.
13
Hūna lūūlū ī haha jaga ūkabeeje a banhū; ūje ūkabawīle gīkī, ‘Bing'we iyeejagi kūlwa lūshikū lwa ntondo; nguno ū SEEBA Mulungu wa Baisilaeli alīhaya gīkī, Bing'we Baisilaeli ū mu bing'we shilīmo shikolo īsho shiigeleelilwe kūfunyiwa kūlwa ng'wa SEEBA; ūlū mutashīngije mutūdūla ū kūbīīmīla a banishi bing'we.
14
Na lūūlū ī ntondo ī dilū ikūmingagi, ng'wegeele kwiyoolecha būlī bene mu lūganda lwabo. Ū lūganda ūlo alalūsole ū SEEBA bakwegeela mu numba numba, ī numba īyo alayīsole ū SEEBA, bakwegeela kaya kaya, hama ī kaya īyo SEEBA alayīsole būlī munhū akwegeela.
15
Ūyo alading'we alīnasho ī shikolo īsho shiigelile kūfunyiwa kūlwa ng'wa SEEBA, akūbūlagwa apemve mu moto, hamò nī shose īsho shilī shakwe. Nguno walīkenaagūlile ī lilagane lya ng'wa SEEBA, na wenhelejaga mhayo gw'igiisha minala ū mu Isilaeli.’”
16
A ha ntondo ī dilū, ū Yoshwa ūbalagīla a Baisilaeli kwegeela būlī lūganda loi lwenekīlī; lūganda lwa Yuda lūsolwa.
17
Hanuma ī numba ja lūganda lwa Yuda jegeela, yūsolwa ya ng'wa Zela; a Bazela begeela būlī bene mu kaya yabo, yūsolwa kaya ya ng'wa Zimli.
18
Ū Yoshwa ūng'wegeleja būlī munhū ū mu kaya yenīyo, ūsolwa Akani ng'witūnja o ng'wa Kalīmi ng'wana Zimli, wa mu kaya ya ng'wa Zela, lūganda lwa Yuda.
19
Hūna ū Yoshwa ūng'wīla, “Ng'wana wane, ng'winhag'ikūjo ū SEEBA Mulungu wa Baisilaeli; hama nīyo nkumīlījage we. Niwīlage īyo wīyītile, ūtizūnibisa mhayo nūūlū gūmò.”
20
Ū Akani ūshosha alīhaya, “Ū gwene gwang'hana ī chene baba, nang'hūbile ū SEEBA Mulungu wa Isilaeli. Īyo nīītile yīyī:
21
Ū mu shikolo ī shisonzwa, nakabona mo kakanjo kawiza ka kūfuma sī ya Babeeli, na tū kilo tūbīlī na nusu twa feza, na kagili ka zahabu kaabūdito wa gītī nusu kilo gīko; aho natūbona ū tūshikolo twenūto nūtwikūmva nūtūsola. Ī haha tūlī ng'wiheema lyane tūsīmbīlilwe hasī, ū tūfeza tūlī ū kwitina.”
22
Ū Yoshwa ūtūma banhū būpeela ū kwiheema; na ng'hana būshisanga shibisilwe ū ng'wiheema lyakwe, ī feza jalī ū kwitina.
23
Būshisola ī shikolo shenīsho būshenha ū kūlī Yoshwa na a Baisilaeli a bose, būshitenda ha ng'wape kū būtongi bo ng'wa SEEBA.
24
Hūna ū Yoshwa na a Baisilaeli a bose būnsola ū Akani ū wa mu kaya ya ng'wa Zela, nī feza, nī ng'hanjo, na a kagili ka zahabu; pyī na a bitūnja bakwe, na a bashīke bakwe, nī ng'ombe jakwe, nī nzobe jakwe, hamò nī ng'holo jakwe, nī liheema lyakwe, nī shikolo shakwe ī shingī pyī īsho walī nasho; būntwaala kū longa lwa Akoli.
25
Ū Yoshwa ūng'wīla, “Nibūlī watwenhelegije kūgwa mu mhayo gwabūbi gīko? Ī lelo ū SEEBA akūkūgwisīja mhayo gwabūbi no ū bebe!” Na lūūlū pye a Baisilaeli būmponda mawe kūshisha ūcha, hanuma na a bangī būbaponda mawe nabo būcha. Aho bababūlaga būbapemba mu moto;
26
hūna būmpondekeja ilūndo itaale lya mawe, īlo nī lelo īyī lītaalī līlīho. A henaho lūūlū ū SEEBA ūgalūka wīnga ū mu būpelanu wakwe ū būkalī no no no. H'ī nguno ū longa lwenūlo lūkitanagwa longa lwa Akoli kūshisha lelo īyī.
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24