Exodus 35

Tswana (BAEBELE e e Boitshepo) 1992

← Chapter 34 Jump to: Chapter 36 →

1Moše a phutha phuthego yotlhe ya bana ba Iseraele, a ba raya a re: “A, ke one mafoko a Jehofa o a laotseng, gore lo a dire.

2Tiro e dirwe ka malatsi a le marataro, mme e re letsatsi la bosupa e nne letsatsi le lo le itshepetseng, e nne Sabata wa boitapolosetso Jehofa, jo bo masisi; le fa e le mang yo o dirang tiro ka lone a a bolawe.

3Lo se ka lwa gotsa molelo mo maagong otlhe a lona ka letsatsi la Sabata.”

4Moše a bua le phuthego yotlhe ya bana ba Iseraele a re: “Se, ke sone se Jehofa o se laotseng a re:

5Ntshetsang Jehofa tshupelo mo go lona; mongwe le mongwe yo pelo ya gagwe e ratang, a e lere, tshupelo ya ga Jehofa: gouta, le selefera, le kgotlho.

6Le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta, le maodi a dipodi;

7le matlalo a diphelefu a a tsentsweng mmala o mohibidu, le matlalo a manyebi, le dikgong tsa makala;

8le lookwane lwa lesedi, le dinkgisa monate tsa lookwane lo lo tlolwang, le tsa maswalo a a nkgang monate;

9le majana a šohama, le majana a a tlhongwang a sekhutlana, le a letlatla la sehuba.

10“A motho mongwe le mongwe yo o pelo e e tlhalefileng mo go lona a tle, mme a dire tsotlhe tse Jehofa o di laotseng.

11E bong motlaagana le mogope wa one, le sekhurumetso sa one, le dikgoge tsa one, le dimati tsa one, le merapalego ya one, le maotwana a one, le ditlhako tsa one;

12le letlole le disikaro tsa lone; senno sa boutlwelo botlhoko le sesiro sa sebipo;

13le lomati lwa bojelo le disikaro tsa lone, le dilwana tsotlhe tsa lone, le senkgwe sa tshupo;

14le sone setlhomo sa lesedi, le dilwana tsa sone, le dilampa tsa sone, le lookwane lwa lesedi;

15le sebeso sa maswalo, le disikaro tsa sone, le lookwane lo lo tlolwang, le maswalo a a nkgang monate, le sebipo sa mojako, fa mojakong wa motlaagana.

16Sebeso sa tshupelo e e fisiwang, le leiso la sone le le setlatla la kgotlho, le disikaro tsa sone, le dilwana tsotlhe tsa sone, le mogopo o o tlhapelang le setlhomo sa one;

17matsela a a lepelelang a lolwapa, le maotwana a lone, le ditlhako tsa one, le sebipo sa kgoro ya lolwapa;

18dimapo tsa motlaagana, le dimapo tsa lolwapa, le megala ya tsone;

19le diaparo tse di dirwang ka botswerere, tsa go direla mo felong ga boitshepo, diaparo tse di itshepileng tsa ga Arone moperesiti le diaparo tsa bomorwawe, go tla ba direla mo tirong ya boperesiti.”

20Phuthego yotlhe ya bana ba Iseraele ya phatlalala ya tloga fa pele ga Moše.

21Ba tla, mongwe le mongwe yo pelo ya gagwe e mo tlhotlheletsang, le mongwe le mongwe yo mowa wa gagwe o mo ratisitseng, mme ba lere tshupelo ya ga Jehofa, ya tiro ya mogope wa bophuthegelo, le ya tirelo yotlhe ya one, le ya diaparo tse di itshepileng.

22Ba tla, banna ba na le basadi, e bong botlhe ba ba pelo e e ratang, ba lere dikgokedi tsa sehuba, le manyena a ditsebe, le manyena a dipala menwana a dikanela, le mefitshana, e le mekgabo ya gouta yotlhe fela, e bong monna mongwe le mongwe yo o ne a isetsa Jehofa tshupelo ya gouta.

23Monna mongwe le mongwe yo go fitlhetsweng bobududu, le bohibidu jo bo mokgona, le bohibidu jo bo letlhololo, le letsela la leloba le le boleta, le maodi a dipodi mo go ene, le matlalo a diphelefu a a tsentsweng mmala o mohibidu, le matlalo a manyebi, a di lere.

24Mongwe le mongwe yo o ntshang tshupelo ya selefera le kgotlho, a bo a lere tshupelo ya ga Jehofa; le monna mongwe le mongwe yo go fitlhetsweng dikgong tsa mokala mo go ene tsa tiro nngwe ya tirelo, a di lere.

25Basadi botlhe ba ba pelo e e tlhalefileng ba otlha ka diatla tsa bone, ba lere se ba se otlhileng, bobududu le bohibidu jo bo mokgona, le bohibidu jo bo letlhololo, le letsela la leloba le le boleta.

26Basadi botlhe ba pelo tsa bone di ba tlhotlheletsang mo botlhaleng, ba otlha maodi a dipodi.

27Le balaodi ba lere majana a šohama, le majana a a tlhongwang a sekhutlana, le a letlatla la sehuba;

28le dinkgisa monate, le lookwane; e le tsa lesedi le tsa lookwane lo lo tlolwang, le tsa maswalo a a nkgang monate.

29Bana ba Iseraele ba lere tshupelo ya peleego fela kwa go Jehofa; e bong monna le mosadi mongwe le mongwe yo pelo ya gagwe e mo ratisitseng go di leretse tiro yotlhe, e Jehofa o e laotseng go dirwa ka seatla sa ga Moše.

30Moše a raya bana ba Iseraele a re: “Bonang, Jehofa o biditse ka leina Besalele, morwa Uri, morwa Hure wa lotso lwa Juta;

31o mo tladitse mowa wa Modimo wa botlhale, le wa tlhaloganyo, le wa kitso, le wa tiro nngwe le nngwe.

32Le go akanyetsa ditiro tsa matsetseleko, go dira ka gouta, le ka selefera, le ka kgotlho.

33Le wa go setela majana go tlhongwa, le wa go seta dikgong, go dira mo tirong ya botsetseleko.

34O tsentse mo pelong ya gagwe gore a rute batho, ene le Oholiabe morwa Ahisamake, wa lotso lwa Dane.

35Bao o ba tladitse botlhale jwa pelo, go dira ditiro dingwe le dingwe tsa mogabi wa majana, le tsa motsetseneki, le tsa motsantsabetsi ka bobududu, le ka bohibidu jo bo mokgona, le bohibidu jo bo letlhololo, le ka letsela la leloba le le boleta, le tsa mologi, e bong tsa bone ba ba dirang ditiro dingwe le dingwe, le tsa bone ba ba itseng go akanyetsa ditiro tsa matsetseleko.

← Chapter 34 Jump to: Chapter 36 →