Exodus 36

Tswana (BAEBELE e e Boitshepo) 1992

← Chapter 35 Jump to: Chapter 37 →

1“Besalele le Oholiabe a ba dire, le motho mongwe le mongwe yo o pelo e tlhalefileng, yo Jehofa o mo neileng botlhale le tlhaloganyo go itse go dira tiro yotlhe ya tirelo ya felo ga boitshepo, jaaka tsotlhe tse Jehofa o di laotseng.”

2Moše a bitsa Besalele le Oholiabe, le motho mongwe le mongwe yo o pelo e tlhalefileng, yo Jehofa o tsentseng botlhale mo pelong ya gagwe, e bong mongwe le mongwe yo pelo ya gagwe e mo tlhotlheleditseng go tla mo tirong go e dira;

3ba amogela mo go Moše ditshupelo tsotlhe tse bana ba Iseraele ba di lereditseng tiro ya tirelo ya felo ga boitshepo, go e dira ka tsone. Ba fela ba mo leretse ditshupelo tsa peleego ka meso yotlhe.

4Batho ba ba botlhale botlhe, ba ba dirang mo tirong ya felo ga boitshepo, ba tswa mongwe le mongwe mo tirong e o e dirang.

5Ba bua le Moše ba re: “Batho ba lerile thata go fetisa selekanyo sa tiro e Jehofa o laotseng gore e dirwe.”

6Moše a ntsha taolo, mme ba e utlwatsa mo bothibelelong jotlhe, ba re: “A go se nne ope monna le fa e le mosadi, yo o tlholang a baakanya tiro epe ya tshupelo ya felo ga boitshepo.” Jalo ba kganelwa mo go lereng ditshupelo.

7Ka gonne dilwana tse ba di bonyeng di ne di lekanye tiro go e dira, di ba di sala.

8Motho mongwe le mongwe mo go bone yo o pelo e tlhalefileng, yo o dirang, a dira motlaagana ka matsela a a lepeletseng a le some; e le a leloba le le boleta le le otlhilweng bosesane, le bobududu, le bohibidu jo bo mokgona, le bohibidu jo bo letlhololo, a a dira ditshwano tsa ditšheruba, e le tiro ya motsetseni.

9Boleele jwa letsela lengwe le lengwe le le lepeletseng e le boleele jwa dimetara di le 12, boatlhamo jwa letsela lengwele lengwe e le dimetara di le pedi; matsela otlhe a nna selekanyo se le sengwe fela.

10Matsela a le matlhano, a a gokaganya mmogo, le matsela a mangwe a matlhano, a a gokaganya mmogo.

11A dira digwe tsa bobududu mo losing lwa letsela le lengwe, e bong fa le tshwaraganngwang gone; a dira jalo mo losing lwa letsela le le kwa thoko mo botlhanong jwa bobedi.

12A dira digwe di le 50 mo letseleng le lengwe, le digwe di le 50 mo losing lwa letsela le le mo tshwaraganong ya bobedi; digwe di lebanye.

13A dira dikgoge tsa gouta di le 50, a kgogetsanya matsela ka tsone; jalo motlaagana wa nna mmogo fela.

14A dira matsela a a lepelelang ka maodi a dipodi go nna mogope o o emang motlaagana godimo; a dira matsela a le some le motso.

15Boleele jwa letsela lengwe le lengwe e le jwa dimetara di le 13; boatlhamo jwa letsela lengwe le lengwe e nne dimetara di le pedi; matsela ao a a some le motso a bo a le selekanyo se le sengwe fela.

16A kgogetsanya matsela a le matlhano ka osi, le matsela a le marataro ka osi.

17A dira digwe di le 50 mo losing lwa letsela le le ka fa thoko ga diphatsa tse tlhano, le digwe di le 50 mo losing lwa letsela le le ka fa thoko ga diphatsa tse thataro.

18A dira dikgoge di le 50 tsa kgotlho go gokaganya mogope ka tsone, gore o nne mmogo fela.

19A dira sekhurumetso sa mogope ka matlalo a diphelefu a a tsentsweng mmala o mohibidu, a ba a dira sekhurumetso ka matlalo a manyebi, sa kwa godimo.

20Dimati tsa motlaagana tse di emang di thokgame, a di dira ka mokala.

21Boleele jwa lomati e le jwa dimetara di le nne, boatlhamo bo le disentimetara di le 66, jwa lomati longwe le longwe.

22Lomati longwe le longwe lo ne lo na le malomelo a le mabedi a a kopanngwang mmogo; a dira jalo mo dimating tsa motlaagana.

23A dira dimati tsa motlaagana; dimati di le 20 tsa lotlhakore lwa ka fa ntlheng ya borwa;

24a direla dimati tse di 20 ditlhako tsa selefera di le 40; ditlhako di le pedi tsa lomati lo le longwe fa malomelong a lone oo mabedi, le ditlhako di le pedi tsa lomati lo longwe fa malomelong a lone oo mabedi.

25Lotlhakore lwa bobedi lwa motlaagana, ka fa ntlheng ya botsheka, a lo direla dimati di le 20.

26Le ditlhako tsa tsone tsa selefera tse di 40, ditlhako di le pedi fa tlase ga lomati longwe, le ditlhako di le pedi fa tlase ga lomati lo longwe.

27Ka kwa morago ga motlaagana ntlheng ya bophirimatsatsi, a go direla dimati di le thataro.

28Dikgono tsa motlaagana ka kwa morago a di direla dimati di le pedi.

29Tsa bo di pataganye sebedi kwa tlase, mme tsa ya go fitlha kwa godimo mo molepong wa ntlha, di ntse di le mmogo; a di dira jalo tsoo pedi mo dikgonong tsoo pedi.

30Go ne go le dimati di le 8, le ditlhako tsa tsone tsa selefera, ditlhako di le 16; ditlhako di le pedi fa tlase ga lomati longwe le longwe.

31A dira merapalego ya mokala; e le metlhano ya dimati tsa lotlhakore lo longwe lwa motlaagana.

32Le merapalego e le metlhano ya lotlhakore lo longwe lwa motlaagana, le merapalego e le metlhano ya dimati tsa motlaagana tsa ka kwa morago, ntlheng ya bophirimatsatsi.

33Morapalego wa gare a o direla go ralala bogare jwa dimati go tswa ntlheng nngwe go ya kwa go e nngwe.

34Dimati a di manega gouta le melepo ya tsone a e dira ka gouta, go nna masomelo a merapalego, le merapalego a e manega gouta.

35Sesiro a se dira ka bobududu, le bohibidu jo bo mokgona, le bohibidu jo bo letlhololo, le letsela la leloba le le boleta le le otlhilweng bosesane; a se dira ditshwano tsa ditšheruba e le tiro ya motsetseni.

36A se direla maotwana a le mane a mokala, a a manega gouta; dikgoge tsa one e ne e le tsa gouta; mme a a tshelela ditlhako di le nne ka selefera.

37A direla mojako wa mogope sebipo sa bobududu, le bohibidu jo bo mokgona, le bohibidu jo bo letlhololo, le leloba le le boleta le le otlhilweng bosesane, e le tiro ya motsantsabetsi.

38Le maotwana a le matlhano a sone le dikgoge tsa one; ditlhogwana tsa one le dipalelo tsa one a di manega gouta; ditlhako tsa one tsoo tlhano e le tsa kgotlho.

← Chapter 35 Jump to: Chapter 37 →