Exodus 38

Tswana (BAEBELE e e Boitshepo) 1992

← Chapter 37 Jump to: Chapter 39 →

1Sebeso sa tshupelo e e fisiwang a se dira ka mokala, boleele jwa sone e le boleele jwa dimetara di le 2,2, boatlhamo jwa sone, dimetara di le 2,2, se le dintlha di le nne tse di lekalekanyeng fela; bogodimo jwa sone e le dimetara di le 1,3.

2Dinaka tsa sone a di dira ka fa dintlheng tsa sone tse nne; dinaka tsa sone e le logong lo le longwe fela naso, di semega mo go sone; a se manega kgotlho.

3A dira dilwana tsotlhe tsa sebeso, diolela melora, digopa melora, megotšana, dikgogetsa nama, le ditsaya molelo; dilwana tsotlhe tsa sone a di dira ka kgotlho.

4A direla sebeso leiso le le setlatla la kgotlho, le logilwe selotloa, la huhumela maemo a a mo tikologong ya sebeso fa bogareng jwa ditlhakore tsa sebeso.

5A thelela dintlha tse nne tsa leiso la kgotlho melepo e le mene, gore e nne masomelo a disikaro.

6Disikaro a di dira ka mokala, a di manega kgotlho.

7A tsenya disikaro mo melepong e e ka fa ditlhakoreng tsa sebeso, go tla se sikarwa ka tsone; mme a se dira kgapa ka dimati.

8A dira mogopo o o tlhapelang ka kgotlho, le setlhomo sa one ka kgotlho, e le kgotlho ya diiponi tsa basadi ba ba direlang, ba ba nnetseng tirelo fa mojakong wa mogope wa bophuthegelo.

9A dira lolwapa; matsela a a lepeletseng a lotlhakore lwa ka fa ntlheng ya borwa, e le a letsela la leloba le le boleta, le le otlhilweng bosesane, a le boleele jwa dimetara di le 44.

10Maotwana a lone a le 20, le ditlhako tsa one di le 20, e le a kgotlho; dikgoge tsa maotwana le dipalelo tsa one e le selefera.

11Matsela a ntlha ya botsheka a le boleele jwa dimetara di le 44, maotwana a one a le 20 le ditlhako tsa one di le 20, e le tsa kgotlho; dikgoge tsa maotwana le dipalelo tsa one e le tsa selefera.

12Matsela a a lepeletseng a ntlha ya bophirimatsatsi, a ne a le boleele dimetara di le 22, maotwana one a le some, le ditlhako tsa one di le some; dikgoge tsa maotwana le dipalelo tsa one e le tsa selefera.

13A lotlhakore lwa ka fa botlhabatsatsi a ne a le boleele jwa dimetara di le 22.

14Matsela a a lepeletseng a ntlha e nngwe ya kgoro a le boleele jwa dimetara di le 6,6 maotwana one a le mararo le ditlhako tsa one di le tharo;

15le ka ntlha e nngwe go ne go ntse jalo; mo ntlheng e nngwe le e nngwe ga kgoro ya lolwapa go ne go le matsela a a lepeletseng a le boleele jwa 6,6; maotwana a one a le mararo le ditlhako tsa one di le tharo.

16Matsela otlhe a a lepeletseng mo tikologong ya lolwapa e le a leloba le le boleta le le otlhilweng bosesane.

17Ditlhako tsa maotwana e le tsa kgotlho; dikgoge tsa maotwana le dipalelo tsa one e le selefera; mme ditlhogwana tsa tsone di manegilwe selefera, le dipalelo tsa maotwana otlhe a lolwapa e le tsa selefera.

18Sebipo sa kgoro ya lolwapa e ne e le tiro ya motsantsabetsi, ya bobududu, le bohibidu jo bo mokgona, le bohibidu jo bo letlhlololo, le leloba le le boleta le le otlhilweng bosesane; boleele e le dimetara di le 9, bogodimo mo boatlhamong e le dimetara di le 2, le lekana le matsela a mangwe a a lepeletseng a lolwapa.

19Maotwana a one a ne a le mane, le ditlhako tsa one di le nne, e le tsa kgotlho; dikgoge tsa one e le selefera le ditlhogwana tsa one di manegilwe selefera, le dipalelo tsa one e le selefera.

20Dimapo tsotlhe tsa motlaagana le tsa tikologo ya lolwapa, e ne e le tsa kgotlho.

21Dilo tsa motlaagana fa di sobokantswe ke tse; e bong motlaagana wa tshupo, jaaka di badilwe, ka fa Moše o laotseng ka gone, a di laolela tirelo ya Balefi, ka seatla sa ga Ithamare morwa Arone moperesiti.

22Besalele morwa Uri morwa Hure wa lotso lwa Juta, a dira tsotlhe tse Jehofa o di laoletseng Moše.

23Oholiabe morwa Ahisamake wa lotso lwa Dane, o ne a na nae, e le mogabi, le motsetseneki, le motsantsabetsi wa bobududu, le bohibidu jo bo mokgona, le bohibidu jo bo letlhololo, le leloba le le boleta.

24Gouta yotlhe e go dirilweng tiro yotlhe ya felo ga boitshepo ka yone, e bong gouta ya tshupelo ya batho, e ne e le dikilokerame di le 1 000, ka fa selekanyong sa felo ga boitshepo.

25Selefera sa ba phuthego ba ba badilweng e ne e le dikilokerame di le 3 430 ka fa selekanyong sa felo ga boitshepo;

26selekanyo se, e ne e le se se kanang ka se se ntshiwang ke botlhe ba ba badilweng, mongwe le mongwe a duela ka fa selekanyong sa felo ga boitshepo. E ne e le batho ba le 603 550 ba ba ngwaga di 20 le go ya kwa godimo.

27Selefera se se dikilokerame di le 3 400, e le sa go bopa ditlhako tsa felo ga boitshepo le ditlhako tsa sesiro, ditlhako di le lekgolo, dikilokerame di le 34 tsa setlhako se le sengwe fela.

28Ka dikilokerame di le 30 a dira dikgoge tsa maotwana, mme a manega ditlhogwana tsa one ka sone, a ba a a thathelela.

29Kgotlho ya tshupelo ya batho e ne e le dikilokerame di le 2 425.

30A dira ka one ditlhako tsa setswalo sa mogope wa bophuthegelo, le sebeso sa kgotlho, le leiso le le setlatla la sone la kgotlho, le dilwana tsotlhe tsa sebeso,

31le ditlhako tsa lolwapa mo tikologong ya lone, le ditlhako tsa setswalo sa lolwapa, le dimapo tsotlhe tsa motlaagana, le dimapo tsotlhe tsa lolwapa mo tikologong ya lone.

← Chapter 37 Jump to: Chapter 39 →