Isaiah 14

Tswana (BAEBELE e e Boitshepo) 1992

← Chapter 13 Jump to: Chapter 15 →

1Gonne Jehofa o tlaa tlhomogela Jakobe pelo, o tlaa nama a itshenkela Iseraele, a ba baya mo lefatsheng la bone; yo o leng moeng o tlaa ikopanya nabo, mme ba tlaa ngaparela ntlo ya ga Jakobe.

2Ditšhaba di tlaa ba tsaya di ba isa kwa felong ga bone: mme ntlo ya Iseraele e tlaa di ruela mo lefatsheng la ga Jakobe go nna batlhanka le malata; ba tlaa ntsha ditshwarwa, bone ba ba kileng ba ntshiwa ditshwarwa ke bone; mme ba tlaa busa bapatiki ba bone.

3Go tlaa dirala mo letsatsing le Jehofa o tlaa go nayang boikhutso ka lone ka ga bohutsana jwa gago, le ka ga pitlagano ya gago, le ka ga tirelo e e thata e o ne o dirisiwa mo go yone,

4go re o tlaa tlhaba seane se ka ga Babilone, o re: “Ana mopatiki o khutlile jang! Motse o o gouta o khutlile jang!

5Jehofa o robile serobi sa baikepi, e bong thobane ya bogosi ya babusi; e le

6ba ba kileng ba nna ba teketa ditšhaba ka teketo e e sa emeng, ba busa merafe ka bogale, ka pogiso e go se nang ope yo o e kganelang.

7Lefatshe lotlhe le ikhutsitse, le iketlile; ba ponyega mo go opeleng;

8ee, ditlhare tsa mafira di a itumela ka ga gago le masetara a Lebanone tsa re: ‘E sa le ka o namaladiwa fa fatshe ga go ise go ko go tle moremi ope go re rema.’

9“Bobipo kwa tlase o tsebeetsegela go ya go kgatlhantsha go tla ga gago; o go tsosetsa baswi, e bong ditlhogo tsotlhe tsa lefatshe; o nanotse dikgosi tsotlhe tsa merafe mo ditulong tsa tsone tsa bogosi.

10Botlhe bao ba tlaa bua nao ba re: ‘A e ntse jaana le wena o koafetse jaaka rona? A o semegile go tshwana le rona?’

11Boitlotlomatso jwa gago bo foloseditswe mo Bobipong, le modumo wa diletso tsa gago; seboko se adilwe tlase ga gago, dibokwana di a go hupetsa.

12“A bo o kile wa wa kwa legodimong, wena naledi ya masa! Morwa phepafalo ya bosa! A bo o kile wa remelwa fa fatshe, wena yo o kileng wa namalatsa merafe fa fatshe!

13Mme wa bo o ne o itheile mo pelong ya gago, wa re, o tlaa tlhatlogela kwa legodimong, o tlaa goleletsa setulo sa gago sa bogosi godimo ga dinaledi tsa Modimo; o tlaa dula mo thabeng ya bophuthegelo, kwa dikhutlong tsa lefatshe, ntlheng ya botsheka.

14Wa re o tlaa tlhatlogela godimo ga bogodimo jwa maru, o tlaa tshwana le Mogodimodimo.

15Le fa go ntse jalo o tlaa folosediwa mo Bobipong, kwa dikhutlong tsa molete.

16“Ba ba go bonang ba tlaa go sekaseka ka matlho, ba tlaa go akanya, ba re: ‘Monna yo a ke ene yo o ne a roromisa lefatshe, a reketlisa magosi;

17a dira lefatshe go nna naga fela, a ribegetsa metse ya lone; mme a se ke a gololela ditshwarwa tsa gagwe go ya magabone?’

18Dikgosi tsotlhe tsa merafe, tsotlhetsotlhe fela, di totometse mo tlotlong, nngwe le nngwe e le mo ntlong ya yone;

19mme wena o latlhetswe kwa ntle ga phupu ya gago jaaka kala e e makgapha, jaaka diaparo tsa ba ba bolailweng, ba ba sogotlhilweng ka tšhaka, ba ba kgokologelang mo majeng a molete; jaaka setoto se se sobotlwang ka dinao.

20Ga o ketla o kopanngwa le tsone mo phitlhong, ka o sentse lefatshe la gago, o bolaile batho ba gago; losika lwa badirabosula ga lo ketla lo umakwa gope ka bosenabokhutlo.

21Baakanyetsang bana ba gagwe polao ka ntlha ya boikepo jwa borraabo; gore ba tle ba se ka ba tsoga ba rua lefatshe, ba tlatsa sefatlhogo sa lefatshe ka metse.”

22“Ke tlaa tsoga ke tlhabana nabo,” go bua Jehofa wa masomosomo: “Ke kgaola ke tlosetsa Babilone leina le lesalela, le ngwana wa mosimane, le ngwana wa ngwana wa mosimane,” go bua Jehofa.

23“Le gone ke tlaa go ntsha boswa jwa setlhong, le megobe ya metsi; mme ke tlaa go feela ka lofeelo lwa tshenyo;” go bua Jehofa wa masomosomo.

24Jehofa wa masomosomo o ikanne, a re: “Ruri jaaka ke akantse, go tlaa dirala jalo; le jaaka ke ikaeletse, go tlaa ema fela jalo;

25go re, ke tlaa robaganya Mosiria mo lefatsheng la me, le mo dithabeng tsa me, ke tlaa mo gataka ka dinao; foo jokwe ya gagwe e tlaa tloga mo go bone, le morwalo wa gagwe o tlaa tloga leruding la bone.”

26Ke lone boikaelelo jo bo ikaeleletsweng lefatshe lotlhe; mo ke sone seatla se se otlololetsweng merafe yotlhe.

27Gonne Jehofa wa masomosomo, o ikaeletse, mme e mang yo o tlaa kaololang? Letsogo la gagwe le lolame, mme ke mang yo o tlaa le gonang.

28E rile ka ngwaga o Ahase o suleng ka one ga nna ponelopele e. Ga re:

29“O se ka wa itumela wena Filisitia, gotlhe ga gago, ka go re, thupa e e kileng ya go betsa e robegile, gonne mo motsweng wa noga go tlaa tswa šaušawane, mme lotsalo lwa yone e tlaa nna noga e e molelo e e fofang.

30Mme batsalwapele ba bahumanegi ba tlaa ja fela, le batlhoki ba tlaa ithobalela fela mo boiketlong; motswe wa gago ke tlaa o bolaya ka leuba, le masalela a gago a tlaa bolawa.

31“Bokolela, wena kgoro; lela, wena motse; o nyerile, wena Filisitia gotlhe fela ga gago; gonne go kua mosi kwa ntlheng ya botsheka, mme ga go ope yo o ikeolelang kwa thoko mo metlheng ya gagwe e e laotsweng.”

32Jaana barongwa ba merafe ba tlaa fetolwa go tweng? Go tlaa twe: “Jehofa o theile Sione, mme bapatikwi ba batho ba gagwe ba tlaa fitlhela botshabelo mo go ene.”

← Chapter 13 Jump to: Chapter 15 →