Isaiah 59

Tswana (BAEBELE e e Boitshepo) 1992

← Chapter 58 Jump to: Chapter 60 →

1Bonang, letsogo la ga Jehofa ga le a khutshwafala, go re ga le kake la boloka; le tsebe ya gagwe ga e a kabala, go re ga e kake ya utlwa.

2Maikepo a lona a lomologantse fa gare ga lona le Modimo wa lona; le maleo a lona a lo subetse sefatlhogo sa one gore a gane go utlwa.

3Gonne diatla tsa lona di leswe ka madi, le menwana ya lona ka boikepo; dipounama tsa lona di buile maaka; diteme tsa lona di pepedumapepeduma boikepo.

4Ga go na ope yo o isang tshekong ka tshiamo, ga go na ope yo o buelelang kgang mo boammaaruring; ba ikanya boithamako, ba bua maaka; ba ima bosenyi, ba belega boikepo.

5Ba tototsha mae a šaušawane, ba loga bobi jwa segokgo; yo o jang mae a bone a swe, le le le phatlakantsweng le tswe legwere.

6Mabi a bone ga a ketla a tswa diaparo, le gone ga ba ketla ba ikapesa ka ditiro tsa bone; ditiro tsa bone ke ditiro tsa boikepo; tiro ya thubakanyo e mo diatleng tsa bone.

7Dinao tsa bone di sianela kwa bosuleng, ba itlhaganelela go tsholola madi a a se nang molato; megopolo ya bone ke megopolo ya boikepo; tshwafalo le tshenyego di mo motlhaleng wa bone.

8Tsela ya kagiso ga ba e itse; ga go na tshiamo mo metlhaleng ya bone; ba itshokamiseditse ditselana; le fa e le mang yo o tsamayang mo go tsone ga a ke a itse kagiso.

9Ke gone ka moo katlholo e ntseng kgakala le rona, le tshiamo ga e re fitlhele; re batla lesedi, mme re bona lefifi fela; re batla phatsimo mme, re tsamaya mo go sa bonaleng fela.

10Re apaapa lomota jaaka difofu; ee, re apaapa jaaka ba ba se nang matlho; re tlauma motshegare jaaka fa go le lotlatlana; mo go ba ba dingware re ntse jaaka batho ba ba suleng fela.

11Re kgorotla rotlhe jaaka dibera, re lela mo go botlhoko jaaka maeba; re batla katlholo, mme ga go na epe; re batla poloko, mme e ntse kgakala le rona.

12Gonne ditlolo tsa rona di ntsifetse fa pele ga gago, le maleo a rona a supa ka ga rona; gonne ditlolo tsa rona di na le rona, mme ka ga maikepo a rona re a a itse;

13ka go tlola, le ka go itatola Jehofa, le ka go fapoga go latela Modimo wa rona, ka go bua patiko le tsuololo, ka go ithwala le go ntsha mafoko a maaka a a tswang mo pelong.

14Katlholo e tenegetse kwa morago, le tshiamo e emetse kwa kgakala; gonne boammaaruri bo ole mo mmileng, le thokgamo ga e kake ya tsena.

15Ee, boammaaruri bo a tlhokafala; mme yo o kgaoganang le bosula o itshemela go thopiwa; Jehofa o na a go bona, mme ga mo itumolola fa go se na katlholo.

16Mme a bona fa go se na monna ope, mme a gakgamala fa go se na morapeledi; ke gone ka moo letsogo la gagwe ka esi la mo leretse poloko; tshiamo ya gagwe yone ya mo tshegetsa.

17A apara tshiamo jaaka phemo ya sehuba, le tlhoro ya phemo mo tlhogong ya gagwe; a apara diaparo tsa tefetso, le tlhoafalo a e apara jaaka kobo.

18Fela ka fa ditiro tsa bone di ntseng ka teng, o tlaa duela fela jalo; baganetsi ba gagwe ka tšarologo, baba ba gagwe ka tuelo; mme ditlhare o tlaa di duela ka tekanyetso.

19Jalo ba tlaa boifa leina la ga Jehofa ba le kwa bophirimatsatsi, le kgalalelo ya gagwe ba le kwa botlhabatsatsi; gonne o tlaa tla jaaka noka e e phašametsegang, e go hema ga Jehofa go e phašametsang.

20“Morekolodi o tlaa tla mo Sione, le mo go bone ba ga Jakobe ba ba boang mo tlolong,” go bua Jehofa.

21“Ka ga me, ke yone kgolagano ya me nabo,” go bua Jehofa; “mowa wa me o o mo go wena, le mafoko a me a ke a tsentseng mo molomong wa gago, ga di ketla di tloga di tswa mo molomong wa gago, le fa e le mo molomong wa bana ba gago, le fa e le mo molomong wa bana ba bana ba gago, go tloga fano gompiyeno, go ya bosakhutleng,” go bua Jehofa.

← Chapter 58 Jump to: Chapter 60 →