Isaiah 17

Tswana (BAEBELE e e Boitshepo) 1992

← Chapter 16 Jump to: Chapter 18 →

1Ponelopele ka ga Damaseko. Bonang, Damaseko o khutlisitswe, gore e se nne motse, mme e tlaa nna mokoa wa mo go robakanyeng.

2Metse ya Aroere e tlhobogilwe; e tlaa nna ga matsomane a a tlaa bothang, mme ga go na sepe se se tlaa a tshosang.

3Le yone kago ya phemelo e tlaa khutla mo Eferaime, le bogosi mo go Damaseko, le mo go setseng ga Siria; di tlaa nna jaaka kgalalelo ya bana ba Iseraele, go bua Jehofa wa masomosomo.

4Go tlaa dirala mo letsatsing leo, go re, kgalalelo ya ga Jakobe e tlaa swarega, le monono wa nama ya gagwe o tlaa tlhorega.

5Go tlaa nna jaaka fa morobi a phutha mabele a a emeng, mme letsogo la gagwe le roba diako; ee, go tlaa nna jaaka fa motho a ronopa diako mo mokgatšheng wa Refaime.

6Le fa go ntse jalo go tlaa tlogelwa maronopo mo go one, jaaka mo kudubatsong ya motlhware, dikungwa di le pedi gongwe di le tharo kwa ntlheng ga kala e e kwa godimodimo, di le nne gongwe di le tlhano mo dikaleng tse di lemetseng kwa ntle, tsa setlhare se se sisang, go bua Jehofa Modimo wa Iseraele.

7E tlaa re mo letsatsing leo motho o tlaa leba Modiri wa gagwe, le matlho a gagwe a tlaa tlhokomela Moitshepi wa Iseraele.

8Ga a ketla a leba dibeso tse e leng tiro ya diatla tsa gagwe, le gone ga a ketla a tlhokomela se diatla tsa gagwe di se dirileng, le fa e le Medimako, kgotsa ditshwantsho tsa letsatsi.

9Mo letsatsing leo metse e e thata ya gagwe e tlaa nna jaaka mafelo a a tlhobogilweng mo sekgweng, kgotsa a a kwa tlhoreng ya thaba, a a sa leng a tlhobogwa fa pele ga bana ba Iseraele; e tlaa nna tshwafalo fela.

10Gonne o gakilwe ke Modimo wa poloko ya gago, mme wa se ka wa gakologelwa lefika la thata ya gago; ke gone ka moo wa tlhoma ditlhongwa tse di kgatlhang fela, wa tsenya matlhogela a mafatshe a sele teng.

11E ne ya re mo letsatsing la go tlhoma ga gago wa go beela ka logora, mme e re go le ka moso wa thuntsha peo ya gago; mme e re mo motlheng wa khutsafalo le wa bohutsana jo bobe, thobo e tshabe e ye koo fela.

12A kudumedi ya ditšhaba di le dintsi tse di sumang jaaka go suma ga mawatle; le go tšhabanyetsega ga merafe e e tšhabanyetsegang jaaka go tšhabanya ga metsi a a thata e kgolo!

13Merafe e tlaa tšhabanyetsega jaaka go tšhabanya ga metsi a matona a mantsi; o tlaa e kgalemela, e tlaa tshabela kwa kgakala, mme ba tlaa kgopholwa jaaka mmoko wa dithaba fa pele ga phefo, le jaaka lorole lo lo sokeletsegang fa pele ga sefefo.

14E re go le maitsebowa, bonang therego; mme go ise go nne bosa ba bo ba seyo. E ke yone kabelo ya ba ba re thopang, ke mo go abelwang ba ba re gapang.

← Chapter 16 Jump to: Chapter 18 →