Isaiah 30

Tswana (BAEBELE e e Boitshepo) 1992

← Chapter 29 Jump to: Chapter 31 →

1“Ija! A bo go latlhega bana ba ba dirukhutlhi,” go bua Jehofa, “ba ba lopang kgakololo, mme e seng mo go nna; ba bipa ka sebipo, mme e seng ga mowa wa me, gore ba oketse boleo ka boleo.

2Ba ba dirang mosepele ba re ba ya Egepeto, mme ba se ke ba botsa molomo wa me; ba ya go ithatafatsa mo thateng ya ga Faro, le go ikanya mo moriting wa Egepeto.

3Ke gone ka moo thata ya ga Faro e tlaa nnang ditlhong tsa lona, le go ikanya ga lone mo tshuting ya Egepeto go tlaa lo tlhakanya tlhogo.

4Gonne dikgosana tsa gagwe di kwa Soane, le barongwa ba gagwe ba fitlhile kwa Hanese.

5Botlhe ba tlaa tlhabisiwa ditlhong ke batho ba ba sa kakeng ba ba direla molemo, ba ba se nang thuso, le fa e le molemo, fa e se ditlhong fela le yone kgobo.”

6Ponelopele kaga dibatana tsa kwa ntlheng ya Borwa. Ba tla ba raletse lefatshe la tlalelo, le botlhoko jo bo molelo, kwa tau e namagadi le tau e tona di tswang gone, le šaušawane, le kgwanyape e e fofong, ba tla ba tshotse dikhumo tsa bone ba di belesitse mo magetleng a dieselana, le mahumo a bone mo diroteng tsa dikamela, ba di isa kwa tšhabeng e e se ketlang e dirana le molemo mo go bone ka sepe.

7Gonne Egepeto o thusetsa lefela, le ka mo go se nang tiro; ke gone ka moo ke mmiditseng Rahabe yo o ntseng fela.

8Jaana ya o se kwale fa pele ga bone mo sekwalelong, o se kwale ka go se nyenyeka mo lokwalong, gore e tle e nne selo sa motlha o o tlang, ka bosakhutleng le ka bosaengkae.

9Gonne ke tšhaba e e tsuololang, bana ba ba akang, bana ba ba ganang go utlwa molao wa ga Jehofa;

10ba ba rayang baboni, ba re: “Se boneng!” Le baperofeti, ba re: “Se re boleleleng dilo tse di siameng, buang le rona ka dilo tse di borethe, lo re bolelele ditsietso!” Ba re:

11“Tlogang mo tseleng lo fapoge, khutlisang Moitshepi wa Iseraele fa pele ga rona.”

12Ke gone ka moo go buang Moitshepi wa Iseraele jaana, a re: “E re ka lo nyatsa lefoko le, lo ikanya patiko le tshokamo, lo itlhabetsa ka tsone,

13ke gone boikepo jo bo tlaa nnang mo go lona jaaka thubego e e gaufi le go wa, e e fapogang mo lorakong lo lo godileng, lo thubagano ya lone e tlang ka tshoganetso le ka ponyo.

14O tlaa lo rabanya jaaka nkgwana ya mmopi e rabaganngwa, a e rebanye a sa rekegele; go ba go tlhokafala mo dikabetlaneng tsa yone le fa e le lobeanyana lo lo ka ogolelang molelo mo isong, le fa e le go ga metsinyana ka lone mo ledibeleng.”

15Gonne go bua jaana Morena Modimo, Moitshepi wa Iseraele, a re: “Lo ne lo tlaa bolokwa ke go bowa le go ithokgamisa; mo tuulalong le mo go ikanyeng e tlaa nna thata ya lona; mme lo ganne.”

16Lo ne lwa re: “Nnyaa! Re tlaa tshaba re pagame dipitse.” Ke gone lo tlaa tshabang; gape, “Re tlaa pagama tse di difadima.” Ke gone ka moo bakhukhedi ba lona ba tlaa nnang bafadima.

17Batho ba le 1 000 ba tlaa tshaba ka kgalemo ya motho a le mongwe fela; lo tlaa tshaba ka kgalemo ya ba le batlhano; lo ba lo tlogelwa jaaka sesa kwa setlhoeng sa thaba, le jaaka mokgele mo thoteng.

18Ke gone ka moo Jehofa o tlaa letang, gore a tle a lo tlhomogele pelo, ke gone ka moo o tlaa nanogang gore a tle a nne pelotshweu go lona; gonne Jehofa ke Modimo wa katlholo; go sego botlhe ba ba mo letang.

19Gonne batho ba tlaa aga mo Sione kwa Jerusalema; ga o ketla o tlhola o lela; ruri o tlaa nna pelotshweu go wena, a utlwa lentswe la pitso ya gago; o tlaa re a utlwa a go arabe.

20Le fa Morena a go naya dijo tsa pabaletso, le metsi a patikego, le fa go ntse jalo baruti ba gago ga ba ketla ba tlhola ba subega gope, matlho a gago a tlaa bona baruti ba gago.

21Le ditsebe tsa gago di tlaa utlwa lefoko sefularong sa gago, le re: “Tsela ke e, tsamayang mo go yone:” Ke go re, mogang lo fapogelang ka fa letsogong le le siameng, le fa lo fapogela ka fa go la molema.

22Mme lo tlaa atlafatsa sethathelelo sa selefera, sa ditshwantsho tsa disetwa tsa gago, le dipapetlana tsa gouta tse di apesitseng ditshwantsho tse di tshetsweng, o tlaa di latlha jaaka sekatana se se maswe; o tlaa se raya, o re: “Tloga fano.”

23O tlaa nesetsa peo ya gago e o tlaa e jalang mo mmung pula; a go naya dijo tsa loato lwa mmu, mme e tlaa bo e le mo go nonneng, mo go letlotlo. Mo letsatsing leo dikgomo tsa gago di tlaa fula mo mafulong a a atlhameng.

24Le dikgomo jalo le dieselana tse di lemang mmu, di tlaa ja dijo tse di lenko, tse di olositsweng ka seoloso le ka loselo.

25Mo godimo ga thaba nngwe le nngwe e e godileng le mo lekhubung lengwe le lengwe le le godileng, go tlaa nna dinoka le dinokana tsa metsi, mo letsatsing la kgailo e kgolo, mogang dikago tsa phemelo di wang.

26Gape lesedi la ngwedi le tlaa nna jaaka lesedi la letsatsi, mme lesedi la letsatsi le tlaa sedifala gasupa, jaaka lesedi la malatsi a supa; mo letsatsing le Jehofa o tlaa fapang botlhoko jwa batho ba gagwe ka lone, a fodisa titeo ya ntho ya bone.

27Bonang, leina la ga Jehofa, le etla le tswa kgakala, le tuka ka bogale jwa gagwe, le ka mosi o o kalabanyeng o a kuuloga; dipounama tsa gagwe di tletse kgakalo; loleme lwa gagwe ke molelo o o lailang;

28mowa wa gagwe o ntse jaaka nokana e e penologang, e e fitlhang le fa thamong, go tshetshetha merafe ka loselo lwa boithamako; mogala wa pitse o o timetsang o tlaa nna mo ditlhaeng tsa ditšhaba.

29Lona lo tlaa nna le kopelo jaaka mo bosigong jwa fa go jewa moletlo o o boitshepo; le boitumelo jwa pelo jaaka fa mongwe a gwanta ka molodi wa lotlhaka, a ya kwa thabeng ya ga Jehofa, kwa Lefikeng la Iseraele.

30Jehofa o tlaa utlwatsa lentswe la gagwe le lentlentle, a bonaletsa go bata ga letsogo la gagwe, le na le kgakalo ya bogale jwa gagwe, le kgabo ya molelo o o lailang, le leratla, le ledimo, le difako.

31Gonne Moasiria o tlaa thubaganngwa ka lentswe la ga Jehofa, ene Moasiria yo o kileng a itaya ka thobane.

32Titeo nngwe le nngwe ya thobane e e laotsweng, e Jehofa o tlaa e bayang mo go ene, e tlaa ba e nna ka meropana le ka diharepe; mme o tlaa tlhabana nabo ka ditlhabano tsa dingatetso.

33Gonne felo ga phisetso go sa le go baakanngwa bogologolo; ee, go baakanyeditswe kgosi; o go epile boteng le botona; mokoa wa gone ke molelo le dikgong tse ditona; mowa wa Morena, jaaka nokana ya sulefura, o a o tshuba.

← Chapter 29 Jump to: Chapter 31 →