Isaiah 22

Tswana (BAEBELE e e Boitshepo) 1992

← Chapter 21 Jump to: Chapter 23 →

1Ponelopele ka ga mokgatšha wa ponatshegelo. O ntse jang jaana, ka e le fa o ile gotlhe fela kwa ditlhoeng tsa matlo?

2Wena yo o tletseng lošalaba, o le motse wa ditlhapelo, o le motse wa meduduetso; babolaiwa ba gago ga ba a bolawa ka tšhaka, le gone ga ba a swela mo ntweng.

3Balaodi ba gago botlhe ba ne ba tshaba mmogo, mme ba golegwa ke bahudi ka mara; botlhe ba gago ba ba fitlhetsweng ba ne ba golegwa mmogo, ba ne ba tshabela kgakala.

4Ke gone ka moo ke rileng: “Nkhularelang, ke tlaa lela mo go botlhoko; se itapiseng ka go re lo nkgomoletsa go thopiwa ga morwadia tšhaba ya me.”

5Gonne ke letsatsi la phereetsego, le la katakalano, le la tharaano, mo go tswang mo go Morena Modimo wa masomosomo, mo mokgatšheng wa ponatshegelo; la go thubakanya dithako, le la go lelela kwa dithabeng.

6Mme Elame a phakarisa mokotlopo a na le ditlhopha tsa banna, le bapalami ba dipitse; mme Kire a alolola thebe.

7Mme ga dirala go re, mekgatšha ya gago e mentlentle ya tlala dikara tsa tlhabano, le bapalami ba dipitse ba ikaba fa kgorong.

8A tlosa sesiro sa Juta; mme mo letsatsing leo wa leba kwa dibolaong tse di mo ntlong ya sekgwa.

9Mme lwa bona diphatlha tsa motse wa ga Dafite fa di le dintsi; lwa phuthela mmogo metsi a lekadiba la tlase.

10Lwa baya matlo a Jerusalema dipalo, lwa thuba matlo, gore lo thatafatse lorako ka one.

11Le gone lwa dira lekadiba fa gare ga dithako tsoo pedi, lwa le direla metsi a lekadiba la bogologolo; ga lo a ka lwa leba kwa go ene yo o ne a dirile se, le gone ga lo a ka lwa tlhokomela ene yo o ne a se agile bogologolo.

12E rile mo letsatsing leo Morena, Modimo wa masomosomo, a opa mokgosi, a re: “Go nne selelo le khutsafalo, le logatadima, le go itlama ka letsela la kgetse.”

13Mme bonang, ga bo go le boitumelo fela, le boipelo, go tlhaba dikgomo le go tlhaba dinku, go ja nama, le go nwa bojalwa jwa mofine; ga twe: “A re jeng, re nweng, gonne re tlaa swa ka moso.”

14Mme Jehofa wa masomosomo a itshenola mo ditsebeng tsa me, a re: “Ruri boikepo jo, ga bo ketla bo tlhatswega mo go lona go ba lo tlaa loo swa,” go bua Morena Modimo wa masomosomo.

15Morena Modimo wa masomosomo, o bua jaana, a re: “Tsamaya, o ye kwa molebeding yo wa thoto, e bong kwa go Shebena, yo o laolang mo ntlong, o re:

16‘O dirang fano? Mme o na le mang fano, fa e bo ne ne e le fano o ikgabetse phuphu fa? Ka a itlhwaela phupu fa godimo, a ikgarubela bonno mo lefikeng?

17Bona, Jehofa o tlaa go hulaotsa ka thata jaaka monna yo o thata; ee, o tlaa go huparela ka thata.

18Ruri o tlaa retologa, a go konopela jaaka tsamuru kwa lefatsheng le le atlhameng; o tlaa swela teng, le dikara tsa tlhabano tsa kgalalelo ya gago di tlaa nna teng; wena botlhabisaditlhong jwa ntlo ya morena wa gago.

19Ke tlaa go kgorometsa mo tirong ya gago, mme o tlaa go pagolola mo boemong jwa gago.’

20“Go tlaa dirala mo letsatsing leo, ke tlaa bitsa motlhanka wa me Eliakime morwa Hilekia;

21mme ke tlaa mo apesa sekhutlana sa gago, ke mo thatafatsa ka moitlamo wa gago, le puso ya gago ke tlaa e tsenya mo seatleng sa gagwe; mme o tlaa nna rra batho mo banning ba Jerusalema le mo ntlong ya Juta.

22Sekopololo sa ntlo ya ga Dafite ke tlaa se baya mo leruding la gagwe; o tlaa bula, mme ga go ketla go tswala ope; o tlaa tswala, mme ga go ketla go bula ope.

23Ke tlaa mo kokothela jaaka lomapo mo felong ga tlhomamo; mo ntlong ya ga rraagwe o tlaa bo a ntse jaaka setulo sa bogosi sa kgalalelo.

24“Ba tlaa pega kgalalelo yotlhe ya ntlo ya ga rraagwe mo go ene, matlhogela le matlhogelana, sejana sengwe le sengwe se sebotlana, go tswa dijaneng tsa dinwelo go ya dijaneng tsa dinkgwana.

25E tlaa re mo letsatsing leo, go bua Jehofa, lomapo lo lo kileng lwa kokothelwa mo felong ga tlhomamo lo tlaa somoga; mme lo tlaa rengwa lo wa, le lekokoma le le mo go lone le tlaa kgaolwa; gonne Jehofa o go boletse.”

← Chapter 21 Jump to: Chapter 23 →