Isaiah 57

Tswana (BAEBELE e e Boitshepo) 1992

← Chapter 56 Jump to: Chapter 58 →

1Mosiami o a nyelela, mme ga go motho ope yo o go bayang mo pelong; batho ba ba pelotlhomogi ba a tlosiwa, mme ope a sa tlhokomele go re mosiami o tlosediwa bosula jo bo tlang.

2O tsena mo kagisong: ba lapologa mo malaong a bone, e bong mongwe le mongwe yo o tsamayang mo thokgamong ya gagwe.

3“Atamelang kwano lona bomorwa mosadi yo o moloi, lona losika lwa mosadi wa seotswa le wa seaka.

4Lo a bo lo tshameka ka mang? Lo atlhamolosetsa mang molomo, lo laila ka loleme? A ga lo bana ba tlolo, losika lwa maaka.

5Ba lo ikgotetsang ka medimo ya disetwa, fa disetwa fa tlase ga setlhare sengwe le sengwe se setala; lo bolaya banyana mo megorogorong, fa tlase ga mariba a mafika?

6Ga eno ke mo gare ga maje a a borethe a mogorogoro; one ke one ga eno; ke one a o a theletseng tshupelo ya seno, o a iseditse seromololo. A nka rapelesega ka dilo tse?

7O beile bolao jwa gago mo thabeng e e godileng, e e godimo thata; wa tlhatlogela koo wa ya go isa setlhabelo.

8O tlhomile segopodiso sa gago ka fa morago ga ditswalo le mephekwana; o ikapoletse o sele e seng nna, mme o tlhatlogile; o katolositse bolao jwa gago, o golaganye nabo; wa rata bolao jwa bone fela kwa o bo bonang teng.

9Wa ya kwa kgosing o tshotse setlolo, wa oketsa tse di nkgang monate tsa gago, wa roma barongwa ba gago kwa kgakala, wa itswapolela le go ya Bobipong.

10Wa lapisiwa ke boleele jwa loeto lwa gago; le fa go ntse jalo ga o a ka wa re: ‘Ga go na tsholofelo;’ wa fitlhela go na le thudiso ya thata ya gago; ke gone ka moo o ne o se ka wa idibala.

11“O ntse o tshaba mang wa nna mo poifong, fa e bo ne ne o aka jaana, o sa nkgakologelwe, le fa e le go go baya mo pelong ya gago? A ga ke a nna ka itidimalela e sa le bogologolo, mme o sa mpoife?

12Tshiamo ya gago ke tlaa e kakanya; mme ka ga ditiro tsa gago ga di ketla di go direla molemo.

13Mogang o galang, a ba o ba phuthileng ba go golole; mme phefo e tlaa ba tsaya, go hema ga molomo go tlaa ba tlosa botlhe; mme yo o ikanyang mo go nna o tlaa rua lefatshe, o tlaa ja thaba ya me e e boitshepo boswa.”

14O tlaa re: “Tlhatlosang, tlhatlosang, lo baakanye tsela, tlosang sekgopi mo tseleng ya batho ba me.”

15Gonne go bua jaana Ene yo o godimo, yo o godileng thata, yo o ntseng mo Bosakhutleng, yo leina la gagwe e leng Boitshepo, a re: “Ke agile mo felong ga godimo le ga boitshepo, le gone ke nna le ene yo o mowa o o ngomogileng, o o ikokobeditseng, go rudisa mowa wa ba ba ikokobeditseng, le go rudisa pelo tsa ba ba pelo e e ngomogileng.

16Gonne ga nketla ke ganela ka bosenabokhutlo, le gone ga nketla ke nna ke šakgala ka gale; gonne botshelo bo ne bo ka fela fa pele ga me, le mewa e ke e dirileng.

17Ke ne ke šakgetse ka ba ka mo itaya ka ntlha ya boikepo jwa bopelotshetlha jwa gagwe; ka fitlha sefatlhogo sa me, ka šakgala; mme a tswelela pele ka lešoko fela mo mokgweng wa gagwe.

18“Ke bonye mekgwa ya gagwe, mme ke tlaa mo fodisa; le gone ke tlaa mo goga, ke ba ke busetsa dikgomotso kwa go ene, le kwa go ba ba mo lelelang.

19Nna ke tlhola loungo lwa dipounama: Kagiso, kagiso e nne go ene yo o kgakala le go ene yo o gaufi, go bua Jehofa; mme ke tlaa mo fodisa.

20Baikepi ba ntse jaaka lewatle le le kgaphaselang, gonne ga le kake la iketla, metsi a lone a bilola seretse le matlakala fela.

21Ga go na kagiso epe e e leng ya baikepi,” go bua Modimo wa me.

← Chapter 56 Jump to: Chapter 58 →