Isaiah 65

Tswana (BAEBELE e e Boitshepo) 1992

← Chapter 64 Jump to: Chapter 66 →

1“Go bodiwa ka ga me ke bone ba ba se kang ba ntshenka gale; ke bonwa ke ba ba se kang ba mpatla; ke reile morafe o o no o sa bidiwa ka leina la me, ka re: ‘Ke fano, ke fano!’

2Ke tlhotse letsatsi lotlhe ke otlololetse batsuolodi mabogo a me, e le ba ba tsamayang ka tsela e e seng molemo, ka fa megopolong e e leng ya bone fela.

3E le batho ba ba nthumolang ka gale ba le fa pele ga matlho a me, ba isa ditlhabelo mo masimong, ba fisetsa maswalo mo makoteng;

4e le ba ba dulang mo diphupung, ba lala mo mafelong a boiphitlho; e le ba ba jang nama ya kolobe, mme le moro wa dilo tse di makgapha o mo dijaneng tsa bone:

5E le ba ba reng: ‘Emelang koo, se nkatamele, gonne ke boitshepo bogolo go wena;’ bao ke mosi mo dinkong tsa me, ke molelo o o tukang letsatsi lotlhe fela.

6“Bona, go kwadilwe fa pele ga me: Ga nketla ke didimala, mme ke tlaa ntsha maduo, ee, ke tlaa ntsha maduo, ke a ba tsenya mo sehubeng, e bong,

7maikepo a lona ka losi, le maikepo a borra ba lona mmogo, go bua Jehofa, ba ba fisitseng maswalo mo dithabeng ba ntlhapaditse mo makhubung; ke gone ka moo ke tlaa lekanyetsang tiro ya bone pele mo sehubeng sa bone.”

8Go bua jaana Jehofa, a re: “Jaaka bojalwa jwa mofine jo boša bo tle bo fitlhelwe mo leroseng, mme mongwe a tle a re: ‘Se le senye, gonne lesego le mo go lone.’ Le nna ke tlaa dira jalo ka ntlha ya batlhanka ba me, gore ke se ka ka ba senya botlhe.

9Mme ke tlaa ntsha losika lo tswa mo go Jakobe, le mo go Juta ke tlaa ntsha morui wa dithaba tsa me; mme baitshenkedwi ba me ba tlaa di rua, le batlhanka ba me ba tlaa aga teng.

10Sharone o tlaa nna lesaka la matsomane, le mokgatšha wa Akore e tlaa nna mabothelo a matlhape a batho ba me ba ba mpatlileng.

11“Mme lona ba lo tlogelang Jehofa, ba lo lebalang thaba ya me e e boitshepo, ba lo baakanyetsang modimo wa Maswalo lomati lwa bojelo, le ba lo thelelang modimo wa Ditaolela bojalwa jwa mofine jo bo tswaisitsweng;

12ke tlaa lo neelela tšhaka, mme lo tlaa ikobela kgailo; ka go bo e rile ke bitsa lwa se ka lwa araba; e rile ke bua lwa se ka lwa utlwa; mme lwa dira se se bosula mo matlhong a me, lwa itshenkela sone se ke sa se itumelelang.”

13Ke gone go bua Morena Modimo jaana, a re: “Bonang, batlhanka ba me ba tlaa ja, mme lona lo tlaa bolawa ke tlala; bonang, batlhanka ba me ba tlaa nwa, mme lona lo tlaa nyorwa; bonang, batlhanka ba me ba tlaa itumela, mme lona lo tlaa tlhajwa ke ditlhong.

14Bonang, batlhanka ba me ba tlaa opela ka go thama ga pelo, mme lona lo tlaa lela ka go jewa ke moetlo mo moeng, le ka bohutsana jwa pelo lo tlaa bokolela.

15Lo tlaa tlogelela baitshenkedwi ba me leina la lona e le phutso, mme Morena Modimo o tlaa go bolaya; mme batlhanka ba gagwe o tlaa ba raya leina le sele;

16go bo go tle go re, yo o itshegofatsang mo lefatsheng o tlaa itshegofatsa ka Modimo wa boammaaruri; le yo o ikanang mo lefatsheng o tlaa ikana ka Modimo wa boammaaruri; gonne ditshwenyego tsa pele di lebetswe, le ka go bo di subetswe matlho a me.

17“Gonne, bonang, ke tlhola magodimo a maša, le lefatshe le leša; mme dilo tsa pele ga di ketla di gakologelwa, le fa e le go tla mo mogopolong.

18Lona lo ipele, lo itumele ka bosakhutleng mo go se ke se tlholang; gonne ke tlhola Jerusalema go nna boipelo, le batho ba gagwe go nna boitumelo.

19Ke tlaa ipela ka Jerusalema, ke ja monate mo bathong ba me; mme lentswe la selelo ga le ketla le tlhola le utlwiwa mo go ene, le fa e le lentswe la go gala.

20Ga go ketla go tlhola go nna gone losea lwa malatsi a mannye, le fa e le monna mogolo yo o iseng a bone botlalo jwa malatsi a gagwe; gonne ngwanyana o tlaa swa a le dinyaga di le lekgolo, mme moleofi yo o tlaa bong a le dinyaga di le lekgolo o tlaa bo a hutsegile.

21Ba tlaa aga matlo, ba nna mo go one; ba tlaa tlhoma masimo a mafine, ba ja maungo a one.

22Ga ba ketla ba aga, mme go nne o sele; ga ba ketla ba tlhoma, mme go je o sele; gonne jaaka malatsi a setlhare a ntse, malatsi a batho ba me a tlaa nna jalo, mme baitshenkedwi ba me ba tlaa ja tiro ya diatla tsa bone ka monate, ka lobaka lo loleele.

23Ga ba ketla ba kgokgolela lefela, le fa e le go tsholela thekisego bana; gonne bone ke losika lwa basegofadiwi ba ga Jehofa, le matlhogela a bone nabo.

24Go tlaa dirafala go re, pele ba e se ba bitse, ke tlaa araba; mme ba tlaa re ba sa ntse ba bua ke utlwe.

25Phiri e tlaa ja mmogo fela le kwanyana, le tau e tlaa ja lotlhaka jaaka kgomo; mme lorole e tlaa nna dijo tsa noga. Ga di ketla di utlwisa botlhoko, le fa e le go senya mo thabeng e e itshepileng ya me yotlhe fela,” go bua Jehofa.

← Chapter 64 Jump to: Chapter 66 →