Isaiah 36

Tswana (BAEBELE e e Boitshepo) 1992

← Chapter 35 Jump to: Chapter 37 →

1Jaana, ga dirala ya re mo ngwageng wa 14 wa kgosi Hesekia, Senakeribe kgosi ya Asiria a tla go tlhasela metse yotlhe ya Juta e e thekele ditsweng, mme a e thopa.

2Mme kgosi ya Asiria ya roma Rabešake, a tswa kwa Lakiše a tla Jerusalema kwa go kgosi Hesekia, a na le ntwa e kgolo. Mme a ema fa moseleng wa lekadiba le le fa godimo, mo tseleng e kgolo ya leota la motlhatswi wa matsela.

3Foo ga tswela kwa go ene Eliakime morwa Hilekia, yo e neng e le molaodi wa ntlo ya kgosi, a na le mokwaledi Shebena, le Joa morwa Asafe, mokwadi wa ditiralo.

4Mme Rabešake a ba raya a re: “Rayang Hesekia jaana, lo re: ‘Go bua jaana kgosi e kgolo, kgosi ya Asiria ya re: Boikanyo jo o bo kgantshang ke bofe?

5Ka re: Kgakololo ya gago le thata ya gago ya go dira ntwa, ke mafoko a lefela fela; mme o a bo o ikantse mang fa e bo ne ne fano o ntsuololetse jaana?

6Bona, o a bo o ikantse seikokotlelo sa lotlhaka lo, lo lo phitsegileng, e bong Egepeto, se e tlaa reng motho a itlhoma a ikokotlela ka sone, se tsene mo seatleng sa gagwe se se tlhabe: Faro kgosi ya Egepeto o ntse jalo mo go botlhe ba ba ikanyang mo go ene.

7“ ‘Mme fa o nthaya, o re: “Re ikantse mo go Jehofa Modimo wa rona,” a ga se one wa mafelo a a tlotlometseng a one a tlositsweng, le dibeso tsa one, ke Hesekia, mme a raya Juta le Jerusalema, a re: Lo tlaa obama fa pele ga sebeso se?’ ”

8“ ‘Jaana ka re, ke a go rapela, ntshetsa mongwake, kgosi ya Asiria dipeelo tsa tlhomamiso, mme ke tlaa go naya dipitse di le 2 000, fa wena o nonofile koo ntlheng ya gago go pega bapalami mo go tsone.

9Mme foo wa bo o ka nonofa jang go busa sefatlhogo sa molaodi a le mongwe fela yo monnye wa batlhanka ba ga mongwake, wa ba wa ikanya Egepeto ka ga dikara tsa tlhabano le ka ga bapalami ba dipitse?

10A ke go re, ke tsile jaana ke bololetse lefatshe le, go le senya ke se na Jehofa? Aitse Jehofa o ntheile, a re: Bololela lefatshe le, mme o le senye.’ ”

11Foo ga bua Eliakime le Shebena le Joa, ba bua le Rabešake, ba re: “Ke a go rapela, bua le batlhanka ba gago ka puo ya seAsiria; gonne re a e utlwa; mme o se ka wa bua le rona ka puo ya seJuta mo ditsebeng tsa batho ba ba mo lorakong.”

12Rabešake a re: “A mongwake o nthomile kwa go mong wa gago le kwa go wena go tla ke bua mafoko a? A ga a nthoma kwa bathong ba ba dutseng mo lorakong, gore ba je mantle a bone, le go nwa motlhapo wa bone le lona?”

13E dira gone Rabešake o emang a goa ka lentswe le legolo mo puong ya seJuta, a re: “Utlwang mafoko a kgosi e kgolo, kgosi ya Asiria.

14Kgosi e bua jaana, ya re: ‘A Hesekia a se lo tsietse; gonne ga a ketla a nonofa go lo golola;

15le gone a Hesekia a se ka a lo ikantsha Jehofa, ka go re: Ruri Jehofa o tlaa re golola; le fa a re motse o ga o ketla o neelwa kgosi ya Asiria mo seatleng.

16Se reetseng Hesekia; gonne go bua jaana kgosi ya Asiria, ya re: Letlanang le nna, lo tswele kwa go nna; lo je, mongwe le mongwe mofine wa gagwe, le mongwe le mongwe feiye wa gagwe, lo bo lo nwe mongwe le mongwe metsi a ledu la gagwe;

17ke tle ke tsamaye ke tle ke lo tlose, ke lo ise kwa lefatsheng le le tshwanang le lefatshe la lona, lefatshe le le tletseng mabele le bojalwa jwa mofine, lefatshe la dijo le masimo a lofine.

18Lo itise, e tlaa re kgotsa Hesekia a lo kgone ka go re: Jehofa o tlaa re golola. A mongwe wa medimo ya merafe o kile wa golola lefatshe la one mo seatleng sa kgosi ya Asiria?

19E kae medimo ya Hamathe le ya Arepata? E kae medimo ya Sefarefaime? A e golotse Samaria mo seatleng sa me?

20E bomang mo medimong yotlhe ya mafatshe ao e e golotseng lefatshe la yone mo seatleng sa me, fa e tlaa bo ne ne fano Jehofa, a tlaa golola Jerusalema mo seatleng sa me?’ ”

21Mme bone ba didimala fela, ba se ka ba mo araba ka lefoko, lepe; gonne taolo ya kgosi e ne e ntse jalo, go re: “Se mo fetoleng.”

22Foo ga tlaa Eliakime morwa Hilekia, yo o ne a laola ntlo ya kgosi, le mokwaledi Shebena, le Joa morwa Asafe mokwadi wa ditiro, ba tla kwa go Hesekia ba ikgagotse diaparo, ba mmolelela mafoko a ga Rabešake.

← Chapter 35 Jump to: Chapter 37 →