Isaiah 34

Tswana (BAEBELE e e Boitshepo) 1992

← Chapter 33 Jump to: Chapter 35 →

1Atamelang lona merafe lo tle go utlwa; lo reetseng lona ditšhaba; a lefatshe le utlwe le botlalo jwa lone; lobopo le dilo tsotlhe tse di tswang mo go lone.

2Gonne Jehofa o gakaletse merafe yotlhe, o šakgaletse ntwa yotlhe ya yone; o e senyeditse ruri, o e neetse go gailwa fela.

3Babolaiwa ba bona ba tlaa latlhelwa kwa ntle, mme sefoka sa ditoto tsa bone se tlaa phunyega, le dithaba di tlaa nyera ka madi a bone.

4Lesomosomo lotlhe la legodimo le tlaa nyera, magodimo a tlaa tshophiwa jaaka lokwalo lo lo tshophiwang; lesomosomo lotlhe la one le tlaa tlhotlhorega jaaka lekakaba le tle le tlhotlhorege mo mofineng, le jaaka lekakaba le tlhotlhorega mo feiyeng.

5Gonne tšhaka ya me e nole e kgotshe mo legodimong; bonang, e tlaa wela Etome godimo, le mo bathong ba neelo ya me, go ba sekisa.

6Tšhaka ya ga Jehofa e tlhamuketse madi, e nontshitswe ka monono, ka madi a dikwanyana le a dipodi, le ka mafura a diphilo tsa diphelefu; gonne Jehofa o na le setlhabelo mo Bosera, le kgailo e kgolo mo lefatsheng la Etome.

7Dinare di tla fologa natso, le dipholo di na le dipoo, lefatshe la bone le tlaa tagwa ke madi, le lorole lwa bone lo tlaa nongwa ka monono.

8Gonne ke letsatsi la pusoloso ya ga Jehofa, ke ngwaga wa tefetso mo kgangnyeng ya Sione.

9Dinokana tsa teng di tlaa fetoga boka, le lorole lwa teng sulefura, lefatshe la teng le tlaa nna boka jo bo tukang molelo.

10Ga go ketla go tingwa bosigo le motshegare; mosi wa teng o tlaa kuelela ka bosakhutleng; go tlaa namalala go kgakgabetse go ya ditshikatshikeng; ope ga a ketla a go ralala ka bosakhutleng le ka bosaengkae.

11Khukara e tlaa go rua le noko; le morubisi o tlaa aga teng le mohukubu, mme o tlaa go namalaletsa mogala wa mafaratlhatlha, le selekanyo se se thokgameng sa tobekano.

12Ba tlaa biletsa bagolwane ba teng kwa bogosing, mme ga go ketla go dira le ope teng; le dikgosana tsotlhe tsa gagwe di tlaa bo di se sepe.

13Lorwana lo tlaa tlhoga mo matlong a teng a dikgosi, mmabi le mokaikai mo dikagong tsa gone tsa phemelo; e tlaa nna bonno jwa diphokoje le lolwapa lwa bontšhe.

14Dibatana tsa sekaka di tlaa kopana le diphiri, le badimo sekapodi ba tlaa bitsakanya le dilekane tsa bone. Ee, Mma-meno a-mahibidu o tlaa tla a nna teng, mongwe le mongwe a na le selekane sa gagwe.

15Morubisi o tlaa dira setlhaga sa one teng, o baya mae, o thothotsa, o phuthela mo go ikgareng ga one; bomankgwedi ba tlaa kokoanela teng, mongwe le mongwe a na le selekane sa gagwe.

16Tlhotlhomisang mo lokwalong lwa ga Jehofa, lo bale: ga go na epe ya tsone tse, e e tlaa tlhokafalang, epe ga e ketla e tlhoka mogatsa a yone, gonne molomo wa me o go laotse, mowa wa gagwe o di phuthile.

17O di laoletse ka bola; seatla sa gagwe se le di kgaoganyeditse ka mogala; di tlaa le rua ka bosakhutleng, di tlaa aga teng mo ditshikatshikeng.

← Chapter 33 Jump to: Chapter 35 →