Isaiah 5

Tswana (BAEBELE e e Boitshepo) 1992

← Chapter 4 Jump to: Chapter 6 →

1Mma ke opelele moratwana wa me sefela sa moratwi wa me ka ga tshimo ya gagwe ya mafine. Moratwana wa me o ne a na le tshimo mo thoteng e e ungwisang thata.

2A e epela mosele mo tikologong, a ola maje mo go yone, a e tlhoma mofine o o tlhophegileng thata, a aga sefata fa gare ga yone, a ba a gaba sedibeletso mo go yone; mme a lebelela go re e tlaa ungwa masitlha a a molemo, mme ya ungwa masitlha a naga fela.

3Mme jaana lona banni ba Jerusalema, le lona banna ba Juta, ke a lo rapela, atlholang fa gare ga me le tshimo ya me ya mafine.

4Kana go kabo go dirilwe eng gape mo tshimong ya me ya mafine se ke sa se dirang mo go yone? Ke ka ntlha yang fa e rile ke lebelela go re e tlaa ungwa masitlha a a molemo, e tlogile ya ungwa masitlha a naga fela?

5Mme jaana a re yeng koo; ke tlaa lo bolelela se ke tlaa se dirang ka tshimo ya me ya mafine; ke tlaa tlosa logora lwa yone, mme e tlaa jewa e lakailwa; ke tlaa thuba lorako lwa yone, mme e tlaa gatakwa.

6Ke tlaa e ntsha magola fela; ga e ketla e kgaolwa dikala le fa e le go tlhagolwa; go tlaa tlhoga lokhi le lorwana mo go yone; ke tlaa ba ke laola maru, gore a se nese pula epe mo go yone.

7Gonne tshimo ya mafine ya ga Jehofa wa masomosomo ke ntlo ya Iseraele; le banna ba Juta ke setlhatshana sa gagwe se se natefang; mme a lebelela katlholo, mme bonang patiko; a lebelela tshiamo, mme bonang selelo.

8Ija, a bo go latlhega ba ba tlhomaganyang ntlo le ntlo, ba oketsa leota ka leota, go tsamaye go tlhokafale bonno, mme lo agisiwe lo le losi mo gare ga lefatshe.

9Mo ditsebeng tsa me, go bua Jehofa wa masomosomo: “Ruri matlo a le mantsi a tlaa ntshiwa matlotla fela, a e leng a magolo le a mantle, a a tlaa bong a se na monni.

10Gonne tshimo ya mafine e e ditema di some e tlaa tswa thatolelo e le nngwe fela; le kgetse ya peo, e tlaa tswa lefiso le le lengwe fela.”

11Ija, a bo go latlhega ba ba phakelelang go latela bojalwa jo bo loileng, ba tsenelwa ke bosigo thata go tsamaya bo bo bo ba gotetse!

12Mme diletso tsa harepe le setinkane, moropana le lohare di na le bojalwa, di mo meletlong ya bone; mme ba bo ba sa tlhokomele tiro ya ga Jehofa, le gone ga ba a gopola go dira ga diatla tsa gagwe.

13Ke gone ka moo batho ba me ba ileng botshwarong ka go tlhoka kitso; le banna ba ba tlotlegang mo go bone ba kgathaditsweng ke tlala, le bontsi jwa bone bo omeleditswe ke lenyora.

14Ke gone ka moo Bobipo bo ikatolositseng keletso ya jone, bo atlhamolositse legano la jone ka go se na selekanyo; mme kgalalelo ya bone, le bontsi jwa bone, le boitlotlomatso jwa bone, le yo o duduetsang mo go bone, ba fologela mo go jone.

15Yo mmotlana o a obiwa, le yo motona o a kgobaladiwa, le matlho a ba ba ipegileng a a bokaladiwa.

16Jehofa wa masomosomo o godisiwa mo katlholong, le Modimo Moitshepi o itshepisiwa mo tshiamong.

17Foo dikwanyana di tlaa fula gone jaaka mo bofulong jwa tsone; magola a ba ba kileng ba nona a tlaa jewa ke bakaidikaidi!

18Ija, a bo go latlhega ba ba gogang boikepo ka megala ya boithamako, le boleo jaaka e kabo e le ka mogala wa koloi.

19Ba ba reng: “A a itlhaganele, a a akofise tiro ya gagwe, gore re e bone; mme a kgakololo ya Moitshepi wa Iseraele e atamele e tle gore, re e itse!”

20Ija! A bo go latlhega ba ba bitsang bosula molemo, le molemo bosula; ba beye lefifi boemong jwa lesedi, le lesedi boemong jwa lefifi; ba beye bokgeme boemong jwa botshe, le botshe boemong jwa bokgeme!

21Ija! A bo go latlhega ba ba iponang botlhale, ba le matsetseleko mo boiponong jwa bone!

22Ija! A bo go latlhega ba ba gangkafalang mo go nweng bojalwa jwa mofine, le bana ba nonofo ya go tlhakanya majalwa a a loileng!

23Ba ba tleng ba siamisetse baikepi ka tuelo, mme ba tseele mosiami tshiamo ya gagwe!

24Ke gone ka moo, jaaka kgabo ya molelo e tle e laile dirite, le jaaka tlhaga e e omeletseng e tle e kokobelele mo kgabong, jalo fela motswe wa bone o tlaa nna jaaka sebodu, le sethunya sa bone se tlaa tlhatloga jaaka lorole; gonne ba ganne molao wa ga Jehofa wa masomosomo, ba nyaditse lefoko la Moitshepi wa Iseraele.

25Ke gone ka moo bogale jwa ga Jehofa bo tuketseng batho ba gagwe, o ba otlololetse letsogo la gagwe, o ba kgemethile, mme dithota tsa reketla, le ditoto tsa bone tsa nna jaaka matlakala mo gare ga mebila. Le fa go ntse jaana, bogale jwa gagwe ga bo a fapoga, le letsogo la gagwe le sa ntse le lolame fela.

26O tlaa re a le kgakala a tsholeletse merafe mokgele, a ba tsue ka molodi ba le kwa dikhutlong tsa lefatshe, mme bonang, ba tlaa tla ka bofefo ka go fefoga.

27Ope mo go bone ga a ketla a lapa le fa e le go kgopiwa; ope ga a ketla a otsela le fa e le go robala; le gone moitlamo wa lotheka lwa bone ga o ketla o hunologa, le fa e le kgole ya ditlhako tsa bone go kgaoga.

28Ba metswi ya bone e bogale, le mara a bone a obilweng otlhe, ditlhako tsa dipitse tsa bone di tlaa kaiwa jaaka legweka, le maoto a makoloi a bone jaaka sefefo.

29Go duma ga bone go tlaa nna jaaka ga tau, ba tlaa duma jaaka madumedi: Ee, ba tlaa duma ba tshwara tse di tshwarwang, ba tsamaya sentle fela ka tsone; mme ga go ketla go nna ope yo o ka gololang.

30Ba tlaa ba sumela mo letsatsing leo jaaka go suma ga lewatle; fa motho a leba lefatshe, bonang, go bo go le lefifi fela le pitlagano, le lesedi le fifaditswe mo marung a lone.

← Chapter 4 Jump to: Chapter 6 →