2 Samuel 1

Chinese TTVR (現代台語譯本羅馬字版)

Jump to: Chapter 2 →

1Sò-lô sí liáu-āu, Tāi-pi̍t thâi-iâⁿ A-má-le̍k -lâng tò--lâi, tī Sé-kek-la tòa nn̄g ji̍t.

2Tē-saⁿ ji̍t, hut-jiân ū chi̍t ê lâng tùi Sò-lô ê kun-iâⁿ lâi, saⁿ thiah-phòa, thâu-khak sám thô͘-hún, kàu Tāi-pi̍t hia, phak tī thô͘-kha pài i.

3Tāi-pi̍t mn̄g i kóng, “Lí tùi tó-ūi lâi?” I ìn kóng, “Góa tùi Í-sek-lia̍t ê kun-iâⁿ tô-cháu--lâi.”

4Tāi-pi̍t koh mn̄g i, “Tāi-chì án-chóaⁿ? Kín kā góa kóng.” I ìn kóng, “Kun-tūi tùi chiàn-tiûⁿ thâi-su tô-cháu, chin chōe lâng chiàn-sí, liân Sò-lô kap i ê kiáⁿ Iok-ná-tan mā sí.”

5Tāi-pi̍t kā hit-ê siàu-liân-lâng kóng, “Lí án-chóaⁿ chai Sò-lô kap i ê kiáⁿ Iok-ná-tan í-keng sí?”

6Kā i pò-kò ê siàu-liân-lâng kóng, “Góa tú-hó khì Ki-lī-pho-soaⁿ, khòaⁿ-tio̍h Sò-lô óa tī i ê chhiuⁿ, ū chiàn-chhia bé-peng jip-óa i.

7I oa̍t-thâu khòaⁿ-tio̍h góa, chiū kiò góa; góa ìn kóng, ‘Góa tī chia.’

8I mn̄g góa, ‘Lí sī sím-mi̍h-lâng?’ Góa ìn kóng, ‘Góa sī A-má-le̍k -lâng.’

9I koh kā góa kóng, ‘Chhiáⁿ lâi góa piⁿ--á kā góa thâi-sí. Góa iáu oa̍h--teh, m̄-kú chin thòng-khó͘.’

10Góa chiū óa--khì, kā i thâi-sí, in-ūi góa chai i tó--lo̍h-khì, it-tēng bōe oa̍h; góa chiū the̍h i thâu-khak ê ông-koan kap i ê chhiú-khoân, tòa-lâi góa ê chú chia.”

11Tāi-pi̍t chiū thiah-li̍h saⁿ, kun-tè i ê lâng mā án-ni.

12In ūi-tio̍h Sò-lô kap i ê kiáⁿ Iok-ná-tan, Siōng Chú ê chú-bîn kap Í-sek-lia̍t -ke, pi-ai thî-khàu, kìm-chia̍h kàu ji̍t àm, in-ūi in lóng sí tī to-ē.

13Tāi-pi̍t kā tùi i pò-kò ê siàu-liân-lâng mn̄g kóng, “Lí sī tó-ūi ê lâng?” Ìn kóng, “Góa sī chhut-gōa-lâng ê kiáⁿ, A-má-le̍k -lâng.”

14Tāi-pi̍t tùi i kóng, “Lí chhin-chhiú thâi-sí Siōng Chú soán-li̍p ê ông, ná bōe kiaⁿ?”

15Tāi-pi̍t kiò chi̍t ê siàu-liân-lâng, kóng, “Lâi, khì kā thâi-sí.” I chiū khì kā hit-ê A-má-le̍k -lâng thâi-sí.

16Tāi-pi̍t kā i kóng, “Che sī lí ka-kī chòe-tit-lâi--ê, in-ūi lí chhin-chhùi choh-chèng kóng, ‘Góa thâi-sí Siōng Chú soán-li̍p ê ông.’”

17Tāi-pi̍t choh ai-ko, tui-tō Sò-lô kap i ê kiáⁿ Iok-ná-tan.

18I bēng-lēng lâng chiong chit-siú kiò-chòe “Keng-ko” ê si kà Iû-tāi -lâng chhiùⁿ. Chit-siú si ū kì-chài tī Ngá-soah-ní-kì:

19Í-sek-lia̍t ah, lí ê chun-êng-chiá siū thâi tī soaⁿ-thâu; tōa eng-hiông kèng-jiân tó--lo̍h-khì!

20M̄-thang tī Ka-te̍k soan-pò͘, m̄-thang tī A-si̍t-ki-lûn ê koe-lō͘ pò-iông, chiah bián Hui-lī-sū ê cha-bó͘ gín-á hoaⁿ-hí, bô siū kat-lé ê lâng ê cha-bó͘-kiáⁿ khoài-lo̍k.

21Ki-lī-pho-soaⁿ ah, goān lí hia bô hō͘, bô lō͘-chúi, thó͘-tōe pha-hng bô chhut-sán; in-ūi tī lí hia ióng-sū ê tún-pâi siū hiat-ka̍k, Sò-lô ê tún-pâi bô koh boah-iû.

22Iok-ná-tan ê keng bô suh-tio̍h tùi-te̍k ê huih bōe siu-hôe; Sò-lô ê to bô chia̍h-tio̍h ióng-sū ê iû bōe ji̍p-siù.

23Sò-lô kap Iok-ná-tan lâng-lâng ì-ài, siū lâng kèng-tiōng; siⁿ bô hun-khui, sí bô saⁿ-lī. In pí eng-chiáu khah kín, pí sai khah kiông.

24Í-sek-lia̍t ê cha-bó͘-kiáⁿ ah, tio̍h ūi Sò-lô thî-khàu! I bat hō͘ lín chhēng chu-âng-sek ê súi-saⁿ, hō͘ lín ê i-ho̍k ū n̂g-kim chòe chng-thāⁿ.

25Ióng-sū kèng-jiân tó tī chiàn-tiûⁿ! Iok-ná-tan siū-thâi tī lí ê soaⁿ-thâu!

26Góa ê hiaⁿ-tī Iok-ná-tan ah, góa ūi lí ai-siong; lí kap góa siōng chhin. Lí tùi góa ê thiàⁿ chin kî-biāu, iâⁿ-kè hū-jîn-lâng ê thiàⁿ.

27Ióng-sū kèng-jiân tó--lo̍h-khì! Bú-khì mā lóng húi-hoāi!

Jump to: Chapter 2 →