2 Samuel 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Tāi-pi̍t koh chū-chi̍p Í-sek-lia̍t -lâng tiong-kan te̍k-soán ê saⁿ-bān lâng.

2Tāi-pi̍t chhōa chiah-ê lâng chhut-hoat, khì Iû-tāi ê Pa-la, beh tùi hia chiong Siōng-tè ê iok-kūi chiap--lâi; chit-ê kūi sī hōng chē tī nn̄g ê thiⁿ-sài ki-lō͘-pek tiong-kan ê Siōng Chú — Bān-kun ê Thóng-sòe ê miâ chheng-ho͘--ê.

3In chiong Siōng-tè ê iok-kūi hē tī sin ê chhia, tùi soaⁿ-téng A-pí-ná-ta̍t ê chhù chài--chhut-lâi; A-pí-ná-ta̍t nn̄g ê kiáⁿ, O͘-sat kap A-hi-iok, kóaⁿ hit-tâi sin-chhia.

4In chiong chhia kap Siōng-tè ê iok-kūi tùi soaⁿ-téng A-pí-ná-ta̍t ê chhù chài--chhut-lâi. A-hi-iok kiâⁿ tī kūi ê thâu-chêng.

5Tāi-pi̍t kap Í-sek-lia̍t choân-ke, tī Siōng Chú ê bīn-chêng ēng siông-chhiū-chhâ só͘ chō ta̍k-khoán ê ga̍k-khì, kap khîm, sek, lin-long-kó͘, tōa-kó͘, poa̍h, lâi chàu-ga̍k khèng-chiok.

6In kàu Ná-khong ê ngó͘-kok-tiûⁿ, gû tio̍h-tak, O͘-sat chhun-chhiú hû Siōng-tè ê iok-kūi.

7Siōng Chú tùi O͘-sat hoat tōa siū-khì; in-ūi i ê sit-chhò, Siōng Chú kā i phah, i chiū sí tī Siōng-tè ê iok-kūi piⁿ.

8Tāi-pi̍t in-ūi Siōng Chú phah O͘-sat, chin bô hoaⁿ-hí, chiū chiong hit-ê só͘-chāi hō-chòe Pí-lia̍t-su O͘-sat, ti̍t-kàu kin-á-ji̍t.

9Hit-ji̍t, Tāi-pi̍t kiaⁿ Siōng Chú, chiū kóng, “Góa ná thang chiong Siōng Chú ê iok-kūi ūn-lâi góa ê só͘-chāi?”

10Tùi án-ni, Tāi-pi̍t m̄-khéng hō͘ Siōng Chú ê iok-kūi chhian-ji̍p Tāi-pi̍t -siâⁿ, kàu ka-kī ê só͘-chāi, chiū kā i sóa-khì Ka-te̍k -lâng Gô-pia̍t Í-tong ê chhù.

11Siōng Chú ê iok-kūi thêng tī Ka-te̍k -lâng Gô-pia̍t Í-tong ê chhù saⁿ ge̍h-ji̍t kú, Siōng Chú sù-hok Gô-pia̍t Í-tong kap i ê choân-ke.

12Ū lâng kā Tāi-pi̍t -ông pò-kò, “Siōng Chú in-ūi iok-kūi ê iân-kò͘, sù-hok Gô-pia̍t Í-tong kap in choân-ke ê lâng.” Tāi-pi̍t chiū hoaⁿ-hoaⁿ-hí-hí chiong Siōng-tè ê iok-kūi, tùi Gô-pia̍t Í-tong ê chhù chiap-lâi Tāi-pi̍t -siâⁿ.

13Kng Siōng Chú iok-kūi ê lâng kiâⁿ la̍k pō͘, Tāi-pi̍t chiū hiàn chi̍t chiah gû kap chi̍t chiah pûi ê cheng-siⁿ chòe chè-sū.

14Tāi-pi̍t chhēng iù-môa-pò͘ ê í-hut-tek tī Siōng Chú ê bīn-chêng chīn-la̍t thiàu-bú.

15Án-ni, Tāi-pi̍t kap Í-sek-lia̍t choân-ke chhut hoaⁿ-hí ê siaⁿ, pûn sàu-kak, kng Siōng Chú ê iok-kūi chiūⁿ-lâi Iâ-lō͘-sat-léng.

16Siōng Chú ê iok-kūi ji̍p Tāi-pi̍t -siâⁿ ê sî, Sò-lô ê cha-bó͘-kiáⁿ Bí-kah tùi thang-á khòaⁿ--chhut-khì, khòaⁿ-tio̍h Tāi-pi̍t -ông tī Siōng Chú bīn-chêng ia̍h-thiàu-ia̍h-tiô, chiū khòaⁿ-khin i.

17In kng Siōng Chú ê iok-kūi ji̍p--khì, hē tī Tāi-pi̍t ūi-tio̍h iok-kūi tah ê pò͘-pîⁿ lāi-bīn; Tāi-pi̍t tī Siōng Chú bīn-chêng hiàn sio-hòa-chè kap pêng-an-chè.

18Tāi-pi̍t hiàn chiah-ê chè liáu-āu, chiū hōng Siōng Chú — Bān-kun ê Thóng-sòe ê miâ kā jîn-bîn chiok-hok.

19I koh pun mi̍h-kiāⁿ hō͘ Í-sek-lia̍t chèng-lâng, bô-lūn lâm-lú, ta̍k-ê lâng chi̍t tè piáⁿ, chi̍t tè bah, chi̍t lia̍p phû-tô-koaⁿ-oân. Chèng-lâng chiū lóng tò-khì in tau.

20Tāi-pi̍t tò-khì beh kā i ê ka-sio̍k chiok-hok, Sò-lô ê cha-bó͘-kiáⁿ Bí-kah chhut-lâi chiap i, kóng, “ Í-sek-lia̍t -ông kin-á-ji̍t chin ū thé-biān! Kin-á-ji̍t tī jîn-sîn ê lú-pī ba̍k-chiu chêng bô chhēng-saⁿ, chhin-chhiūⁿ chi̍t ê siáu-lâng lō͘-thé m̄-chai kiàn-siàu.”

21Tāi-pi̍t kā Bí-kah kóng, “Góa sī tī Siōng Chú ê bīn-chêng án-ni chòe. I ū kéng góa, bô kéng lí ê lāu-pē á-sī i ke-lāi ê lâng, soán-li̍p góa chòe Siōng Chú ê chú-bîn Í-sek-lia̍t ê thóng-tī-chiá. Só͘-í góa ōe tī Siōng Chú bīn-chêng kè-sio̍k thiàu-bú.

22Góa beh pí kin-á-ji̍t án-ni koh-khah chho͘-sio̍k. Sui-jiân lí khòaⁿ góa chòe pi-chiān, m̄-kú lí só͘ kóng hiah-ê lú-pī ōe chun-tiōng góa.”

23Tùi án-ni, Sò-lô ê cha-bó͘-kiáⁿ Bí-kah kàu sí lóng bô siⁿ-kiáⁿ.

← Chapter 5 Jump to: Chapter 7 →