2 Samuel 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Āu-lâi, Tāi-pi̍t kong-kek Hui-lī-sū -lâng, hō͘ in hâng-ho̍k; koh tùi Hui-lī-sū -lâng ê chhiú the̍h-tio̍h kiaⁿ-siâⁿ ê khòng-chè-koân.

2Tāi-pi̍t koh phah-pāi Mô͘-ap -lâng, kiò in tó tī thô͘-kha, ēng soh niû, niû nn̄g soh tn̂g--ê hō͘ i sí, niû chi̍t soh--ê hō͘ i oa̍h; Mô͘-ap -lâng chiū kui-sūn Tāi-pi̍t, koh chìn-kòng.

3Lī-ha̍p ê kiáⁿ Só-pa -ông Hap-tāi-tí-siā khì Iù-hoat-la-tí-hô, beh hôe-ho̍k i ê thóng-tī-koân ê sî, Tāi-pi̍t kong-kek i,

4lia̍h i ê bé-peng chi̍t-chheng chhit-pah, pō͘-peng nn̄g-bān, koh chām-tn̄g chiàn-chhia ê bé ê kha-kun; chí-ū lâu kàu-gia̍h thang thoa chi̍t-pah tâi chiàn-chhia ê bé.

5Tāi-má-sū-kek ê Sū-lī-a -lâng lâi pang-chān Só-pa -ông Hap-tāi-tí-siā, Tāi-pi̍t chiū thâi-sí Sū-lī-a -lâng nn̄g-bān nn̄g-chheng.

6Tùi án-ni, Tāi-pi̍t tī Tāi-má-sū-kek ê Sū-lī-a siat-li̍p kun-iâⁿ. Sū-lī-a -lâng chiū kui-sūn Tāi-pi̍t, koh chìn-kòng. Tāi-pi̍t bô-lūn khì tó-ūi, Siōng Chú lóng hō͘ i tek-sèng.

7Tāi-pi̍t chiong Hap-tāi-tí-siā ê pō͘-hā só͘ ēng kim ê tún-pâi lóng tòa-lâi Iâ-lō͘-sat-léng.

8Tāi-pi̍t -ông koh tùi Hap-tāi-tí-siā ê siâⁿ Pí-tha kap Pí-lô-tha, the̍h chin chōe tâng.

9Hap-má -ông Tô-í thiaⁿ-kìⁿ Tāi-pi̍t phah-iâⁿ Hap-tāi-tí-siā ê choân-kun,

10chiū chhe i ê kiáⁿ Iok-lân tòa kim-khì, gûn-khì, tâng-khì khì kìⁿ Tāi-pi̍t -ông, kā i chhéng-an, chiok-hō i phah-iâⁿ Hap-tāi-tí-siā, in-ūi Hap-tāi-tí-siā kap Tô-í siông-siông kau-chiàn.

11Tāi-pi̍t -ông chiū chiong chiah-ê mi̍h, kap í-chêng i thâi-iâⁿ lia̍t-kok só͘ tit--tio̍h ê kim-gûn, chiū-sī tùi Í-tong, Mô͘-ap, A-bûn -lâng, Hui-lī-sū -lâng, A-má-le̍k -lâng, í-ki̍p tùi Lī-ha̍p ê kiáⁿ Só-pa -ông Hap-tāi-tí-siā tit--tio̍h ê chiàn-lī-phín, lóng sèng-hòa hiàn hō͘ Siōng Chú.

13Tāi-pi̍t tī Iâm ê Soaⁿ-kok phah-sí Í-tong -lâng chi̍t-bān poeh-chheng; tò--lâi ê sî, chiū tit-tio̍h tōa miâ-siaⁿ.

14Tāi-pi̍t tī Í-tong choân-tōe siat kun-iâⁿ; Í-tong -lâng lóng kui-sūn i. Tāi-pi̍t bô-lūn khì tó-ūi, Siōng Chú lóng hō͘ i sèng-lī.

15Tāi-pi̍t chòe choân Í-sek-lia̍t ê ông, ēng kong-pêng chèng-gī tī-lí i só͘-ū ê jîn-bîn.

16Sé-lō͘-ngá ê kiáⁿ Iok-ap chòe goân-sòe, A-hi-lu̍t ê kiáⁿ Iok-sa-hoat chòe sú-koaⁿ.

17A-hi-tu̍t ê kiáⁿ Sat-tok kap A-pí-a-tha ê kiáⁿ A-hi-bí-le̍k chòe chè-si; Se-lâi-ngá chòe su-kì;

18Iâ-hô-iâ-tāi ê kiáⁿ Pí-ná-ngá choh-thâu chí-hui Ki-lī-thê -lâng kap Pí-lī-thê -lâng. Tāi-pi̍t ê kiáⁿ lóng chòe chè-si.

← Chapter 7 Jump to: Chapter 9 →