2 Samuel 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Tāi-pi̍t ê kiáⁿ Ap-sa-liông ū chi̍t ê chin súi ê sió-bē, kiò-chòe Tha-má; Tāi-pi̍t lēng-gōa chi̍t ê kiáⁿ Àm-lūn loân-bō͘ i.

2Àm-lūn ài i ê sió-bē Tha-má ài kah phòa-pīⁿ; in-ūi i sī chāi-sek-lú, Àm-lūn ka-kī chai bōe-tàng tùi i chòe sím-mi̍h.

3Àm-lūn ū chi̍t ê pêng-iú, kiò-chòe Iok-ná-ta̍t, sī Tāi-pi̍t ê hiaⁿ-ko Sī-bí-a ê kiáⁿ. Iok-ná-ta̍t chit-ê lâng chin kan-khiáu.

4I tùi Àm-lūn kóng, “Ông ê kiáⁿ ah, lí sī-án-chóaⁿ chi̍t-ji̍t pí chi̍t-ji̍t siau-sán bô cheng-sîn? Kiám bōe-tàng kā góa kóng?” Àm-lūn kā i kóng, “Góa ài góa ê sió-tī Ap-sa-liông ê sió-bē Tha-má.”

5Iok-ná-ta̍t chiū tùi i kóng, “Lí tio̍h tó tī bîn-chhn̂g, ké phòa-pīⁿ; lí ê lāu-pē nā lâi khòaⁿ lí, lí thang tùi i kóng, ‘Chhiáⁿ hō͘ góa ê sió-bē Tha-má lâi góa chia, tī góa khòaⁿ ōe tio̍h ê só͘-chāi chún-pī chia̍h-mi̍h, chhin-chhiú the̍h hō͘ góa chia̍h.’”

6Àm-lūn chiū tó--teh, ké phòa-pīⁿ; ông lâi khòaⁿ i; Àm-lūn chiū tùi ông kóng, “Chhiáⁿ hō͘ góa ê sió-bē Tha-má lâi góa chia, kā góa chòe nn̄g tè piáⁿ, góa thang tùi i ê chhiú chiap-lâi chia̍h.”

7Tāi-pi̍t chiū phài lâng khì Tha-má ê chhù, kā i kóng, “Lí khì lín hiaⁿ-ko Àm-lūn hia, kā i chún-pī chia̍h-mi̍h.”

8Tha-má chiū khì i ê hiaⁿ-ko Àm-lūn ê chhù; hit-sî Àm-lūn tó tī bîn-chhn̂g. Tha-má tī i khòaⁿ ōe tio̍h ê só͘-chāi nóa mī-hún, hang-piáⁿ.

9Tha-má chiong kui-pôaⁿ ê piáⁿ hē tī Àm-lūn ê bīn-chêng, m̄-kú i m̄ chia̍h. Àm-lūn kiò só͘-ū ê lâng lóng chhut--khì, in chiū chhut--khì.

10I kā Tha-má kóng, “Lí phâng piáⁿ ji̍p-lâi pâng-keng, chhin-chhiú the̍h hō͘ góa chia̍h.” Tha-má chiū phâng hiah-ê piáⁿ ji̍p-khì pâng-keng hō͘ i ê hiaⁿ-ko Àm-lūn.

11I phâng-khì hō͘ Àm-lūn chia̍h ê sî, Àm-lūn kā khiú--teh, kóng, “Sió-bē ah, lâi kap góa khùn.”

12I ìn kóng, “Góa ê hiaⁿ-ko, m̄-thang, m̄-thang kā góa bú-jio̍k. Tī Í-sek-lia̍t bô eng-kai chòe chit-khoán tāi-chì. Lí m̄-thang chòe chit-khoán kiàn-siàu-sū.

13Góa, góa beh án-chóaⁿ sóe góa ê kiàn-siàu? Lí, lí tī Í-sek-lia̍t tiong ōe chiâⁿ-chòe siâ-ok ê gōng-lâng. Góa kiû lí kā ông kóng, i bōe chó͘-chí góa kè hō͘ lí.”

14Chóng-sī Àm-lūn m̄-khéng thiaⁿ i ê ōe; Àm-lūn pí i khah ū la̍t, chiū kā i kiông-pō.

15Liáu-āu, Àm-lūn iàm-ò͘ⁿ Tha-má; hit-ê iàm-ò͘ⁿ ê thêng-tō͘, pí í-chêng tùi i ê ài koh-khah tōa. Àm-lūn kā i kóng, “Khí--lâi, chhut--khì!”

16I kā Àm-lūn kóng, “M̄-thang án-ni, lí kā góa kóaⁿ--chhut-khì pí kā góa bú-jio̍k koh-khah siâ-ok.” M̄-kú Àm-lūn m̄ thiaⁿ,

17kiò sū-hāu i ê po̍k-jîn lâi, kā i kóng, “Kā chit-ê cha-bó͘ gín-á kóaⁿ--chhut-khì; i chhut--khì liáu-āu, kā mn̂g chhòaⁿ--khí-lâi.”

18Àm-lūn ê lô͘-po̍k chiū kā i thoa--chhut-khì; chhut-khì liáu, mn̂g chiū chhòaⁿ--teh. Hit-sî Tha-má chhēng chhái-sek ê saⁿ, in-ūi ông iáu-bē chhut-kè ê cha-bó͘-kiáⁿ lóng chhēng chit-khoán saⁿ.

19Tha-má sám hé-hu tī thâu-khak, thiah-li̍h só͘ chhēng chhái-sek ê saⁿ, ēng chhiú mo͘h thâu-khak, ná kiâⁿ ná háu.

20I ê chhin hiaⁿ-ko Ap-sa-liông mn̄g i kóng, “Lí ê hiaⁿ-ko Àm-lūn kā lí bú-jio̍k sī--bô? Sió-bē ah, chit-chūn lí tio̍h tiām-tiām, i sī lí ê hiaⁿ-ko, m̄-bián ūi-tio̍h chit-ê sū sim kan-khó͘.” Tha-má chiū ko͘-toaⁿ siong-sim tòa tī i ê hiaⁿ-ko Ap-sa-liông ê chhù.

21Tāi-pi̍t -ông thiaⁿ-tio̍h chiah-ê sū, hui-siông siū-khì, m̄-kú bô kā Àm-lūn chek-pī, in-ūi i sī tōa-kiáⁿ, Tāi-pi̍t chin kā théng-sēng.

22Ap-sa-liông in-ūi Àm-lūn bú-jio̍k i ê sió-bē Tha-má, chiū oàn-hūn Àm-lūn, bô kap i kóng-ōe.

23Nn̄g nî āu, Ap-sa-liông tī Í-hoat-liân hù-kūn ê Pa-le̍k Hā-só, chhiàⁿ lâng kā i chián iûⁿ-mn̂g. I chhiáⁿ ông só͘-ū ê kiáⁿ lóng khì.

24Ap-sa-liông lâi kìⁿ ông, kóng, “Lí ê po̍k-jîn ū chhiàⁿ lâng teh chián iûⁿ-mn̂g, chhiáⁿ ông kap lí ê jîn-sîn, kap lí ê po̍k-jîn chòe-hé lâi khèng-chiok.”

25Ông kā Ap-sa-liông kóng, “Góa ê kiáⁿ ah, m̄-thang, goán m̄-thang lóng khì, chiah bián lí khai-hùi siuⁿ siong-tiōng.” Ap-sa-liông chài-saⁿ iau-chhiáⁿ, ông m̄ khì, kan-ta kā i chiok-hok.

26Ap-sa-liông kóng, “Nā bô, chiū hō͘ góa ê hiaⁿ-ko Àm-lūn kap goán khì.” Ông kóng, “Sī-án-chóaⁿ tio̍h ài i kap lí khì?”

27Ap-sa-liông chài-saⁿ chhéng-kiû. Ông chiū ún-chún Àm-lūn kap ông só͘-ū ê kiáⁿ lóng khì.

28Ap-sa-liông hoan-hù i ê pō͘-hā kóng, “Lín tio̍h chù-ì, khòaⁿ Àm-lūn lim-chiú lim kah chin sóng-khoài ê sî, góa chi̍t-ē hā-lēng thâi Àm-lūn, lín chiū kā i thâi-sí. M̄-bián kiaⁿ; it-chhè ê hō͘-kó góa hū-chek. Lín tio̍h hó-táⁿ ióng-kám khì chòe.”

29Ap-sa-liông ê pō͘-hā chiàu Ap-sa-liông ê bēng-lēng thâi Àm-lūn; ông ê kiáⁿ-jî lóng peh--khí-lâi, khiâ ka-kī ê lô tô-cháu.

30In iáu tī lō͘--ni̍h, chiū ū hong-siaⁿ thoân kàu Tāi-pi̍t, kóng, “ Ap-sa-liông thâi-sí ông só͘-ū ê kiáⁿ, bô lâu kah pòaⁿ-ê.”

31Ông chiū khí--lâi thiah-li̍h saⁿ, tó tī thô͘-kha; ông ê jîn-sîn mā thiah-li̍h saⁿ, khiā tī i ê sin-piⁿ.

32Tāi-pi̍t ê hiaⁿ-ko Sī-bí-a ê kiáⁿ Iok-ná-ta̍t kā ông kóng, “Góa ê chú, m̄-thang siūⁿ-kóng ông ê kiáⁿ lóng hō͘ Ap-sa-liông thâi-sí; sí--ê kan-ta Àm-lūn nā-tiāⁿ, in-ūi tùi Àm-lūn bú-jio̍k i ê sió-bē Tha-má hit-ji̍t khí, i chiū í-keng ū chit-ê ì-sù.

33Taⁿ góa ê chú góa ê ông, m̄-bián ūi-tio̍h ông ê kiáⁿ lóng sí chit-ê hong-siaⁿ sim kan-khó͘. Kî-si̍t chí-ū Àm-lūn sí nā-tiāⁿ.”

34Hit-sî Ap-sa-liông í-keng tô-cháu. Siú-bōng ê lâng gia̍h-thâu khòaⁿ, khòaⁿ-tio̍h chi̍t tōa-tīn lâng tùi āu-bīn soaⁿ-pho ê lō͘ lo̍h--lâi.

35Iok-ná-ta̍t kā ông kóng, “Lí khòaⁿ, ông ê kiáⁿ lóng tńg--lâi lah, tú chiàu lí ê po̍k-jîn só͘ kóng--ê.”

36Ōe tú-á kóng soah, ông hiah-ê kiáⁿ chiū kàu, khui-siaⁿ thî-khàu; ông kap jîn-sîn mā lóng tōa-siaⁿ thî-khàu.

37Ap-sa-liông cháu-khì A-bí-hut ê kiáⁿ Ki-su̍t -ông Ta̍t-mái hia. Tāi-pi̍t ta̍k-ji̍t ūi-tio̍h i ê kiáⁿ siong-sim.

38Ap-sa-liông cháu-khì Ki-su̍t, tòa hia saⁿ nî.

39Tùi Àm-lūn ê sí, Tāi-pi̍t -ông bô koh hiah-ni̍h pi-siong, chiū bô koh tùi Ap-sa-liông siū-khì.

← Chapter 12 Jump to: Chapter 14 →