2 Samuel 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Sò-lô ê ke kap Tāi-pi̍t ê ke kau-chiàn chin kú; Tāi-pi̍t ná kiông-sēng, Sò-lô ê ke ná soe-bî.

2Tāi-pi̍t tī Hi-pek-lûn siⁿ la̍k ê kiáⁿ: tōa-kiáⁿ Àm-lūn, sī Iâ-su-lia̍t -lâng A-hi-loán siⁿ--ê;

3tē-jī ê Ki-lī-ap, sī Ka-bi̍t -lâng Ná-pà ê ûi-song Ài-pí-kai siⁿ--ê; tē-saⁿ ê Ap-sa-liông, sī Ki-su̍t -ông Ta̍t-mái ê cha-bó͘-kiáⁿ Má-ka siⁿ--ê;

4tē-sì ê A-to-nî-ngá, sī Hap-ki̍p siⁿ--ê; tē-gō͘ ê Sī-hoat-thê-ngá, sī A-pí-tha siⁿ--ê;

5tē-la̍k ê Í-te̍k-liām, sī Tāi-pi̍t ê bó͘ Í-kek-la siⁿ--ê. Chiah-ê sī Tāi-pi̍t tī Hi-pek-lûn só͘ siⁿ ê kiáⁿ.

6Sò-lô ê ke kap Tāi-pi̍t ê ke kè-sio̍k teh kau-chiàn, Ap-nî-ní tī Sò-lô ê ke chiáng-ak si̍t-koân.

7Sò-lô ū chi̍t ê hui, miâ kiò Lī-su-pa, sī Ài-a ê cha-bó͘-kiáⁿ. I-si Pho-siat tùi Ap-nî-ní kóng, “Lí ná kap góa lāu-pē ê hui chòe-hé khùn?”

8Ap-nî-ní in-ūi I-si Pho-siat ê ōe chiū chin siū-khì, kóng, “Lí khòaⁿ góa chòe Iû-tāi -ke ê káu-á-thâu sī--bô? Góa tiong-sêng tùi-thāi lín lāu-pē Sò-lô ê ke, kap i ê hiaⁿ-tī, i ê pêng-iú, bô chiong lí kau tī Tāi-pi̍t ê chhiú, lí kin-á-ji̍t kèng-jiân in-ūi chit-ê hū-jîn-lâng chek-pī góa.

9Góa nā bô chiàu Siōng Chú só͘ li̍p-sè tùi Tāi-pi̍t ê èng-ún lâi chòe, hòe-tû Sò-lô -ke ê ông-ūi, kiàn-li̍p Tāi-pi̍t ê ông-koân, hō͘ i tī-lí Í-sek-lia̍t kap Iû-tāi, tùi Tān kàu Pia̍t-sī-pa, goān Siōng-tè ka-pē chek-hoa̍t góa Ap-nî-ní.”

11I-si Pho-siat in-ūi kiaⁿ Ap-nî-ní, liân chi̍t kù ōe to m̄-káⁿ ìn.

12Ap-nî-ní chhe sù-chiá tāi-piáu i khì kìⁿ Tāi-pi̍t, kóng, “Chit-ê kok sím-mi̍h-lâng teh thóng-tī?” Koh kóng, “Lí kap góa li̍p-iok, góa beh pang-chān lí, hō͘ choân Í-sek-lia̍t lóng kui-sūn lí.”

13Tāi-pi̍t kóng, “Hó, góa kap lí li̍p-iok. M̄-kú góa ū chi̍t ê iau-kiû, lí lâi kìⁿ góa ê sî, tio̍h chiong Sò-lô ê cha-bó͘-kiáⁿ Bí-kah chhōa--lâi; nā bô, it-tēng bōe-tàng kìⁿ góa ê bīn.”

14Tāi-pi̍t chiū chhe sù-chiá khì kìⁿ Sò-lô ê kiáⁿ I-si Pho-siat, kóng, “Tio̍h chiong góa ê bó͘ Bí-kah hêng góa, i sī góa ēng chi̍t-pah ê Hui-lī-sū -lâng ê pau-phê chòe phèng-kim chhōa--lâi-ê.”

15I-si Pho-siat chiū phài lâng tùi Bí-kah ê tiōng-hu, La-ek ê kiáⁿ Phà-thiat hia chhōa Bí-kah lâi.

16I ê tiōng-hu tè tī i ê āu-bīn, ná kiâⁿ ná háu, kàu Pa-hō͘-lîm. Ap-nî-ní tùi Phà-thiat kóng, “Tò--khì lah.” I chiū tò--khì.

17Ap-nî-ní kap Í-sek-lia̍t ê tiúⁿ-ló chham-siông, kóng, “Lín chá chiū ài Tāi-pi̍t choh-ông kā lín tī-lí,

18taⁿ tio̍h chhái-chhú hêng-tōng. In-ūi Siōng Chú ū èng-ún kóng, ‘Góa beh ēng góa ê po̍k-jîn Tāi-pi̍t ê chhiú, kiù góa ê chú-bîn Í-sek-lia̍t thoat-lī Hui-lī-sū -lâng kap só͘-ū tùi-te̍k ê chhiú.’”

19Ap-nî-ní mā chiong chiah-ê ōe kóng hō͘ Piān-ngá-bín -lâng thiaⁿ. Āu-lâi i khì Hi-pek-lûn, chiong Í-sek-lia̍t -lâng kap Piān-ngá-bín choân-ke kiōng-tông ê koat-tēng, kóng hō͘ Tāi-pi̍t thiaⁿ.

20Ap-nî-ní chhōa jī-cha̍p ê lâng lâi Hi-pek-lûn kìⁿ Tāi-pi̍t. Tāi-pi̍t siat iàn-se̍k hoan-gêng in.

21Ap-nî-ní kā Tāi-pi̍t kóng, “Góa beh khì chio-chi̍p choân Í-sek-lia̍t lâi kìⁿ góa ê chú góa ê ông, hō͘ in kap lí li̍p-iok, lí chiū ōe-tàng choh-ông, chiàu lí ê sim-goān tī-lí choân-kok.” Tāi-pi̍t chiū sàng Ap-nî-ní, hō͘ i pêng-an lī-khui.

22Hit-sî, Tāi-pi̍t ê peng tè Iok-ap chhut-chiàn tò--lâi, tòa chin chōe chiàn-lī-phín. Ap-nî-ní í-keng bô tī Hi-pek-lûn Tāi-pi̍t hia, in-ūi Tāi-pi̍t ū sàng i pêng-an lī-khui.

23Iok-ap kap tè i ê choân-kun í-keng kàu, ū lâng kā Iok-ap kóng, “ Nî-ní ê kiáⁿ Ap-nî-ní ū lâi kìⁿ ông, ông mā sàng i pêng-an lī-khui.”

24Iok-ap khì kìⁿ ông kóng, “Lí ná án-ni chòe? Ap-nî-ní lâi kìⁿ lí, lí ná pàng i khì, hō͘ i lī-khui?

25Lí chai Nî-ní ê kiáⁿ Ap-nî-ní lâi sī beh phiàn lí, ài chai lí ê tōng-chēng, kap lí it-chhè só͘ chòe ê tāi-chì.”

26Iok-ap tùi Tāi-pi̍t hia chhut--lâi, chiū phài lâng khì jip Ap-nî-ní. In chiū tùi Se-la ê chíⁿ kā i tòa--lâi; m̄-kú Tāi-pi̍t m̄ chai.

27Ap-nî-ní tńg-lâi kàu Hi-pek-lûn ê sî, Iok-ap chhōa i kàu siâⁿ-mn̂g lāi ê siâⁿ-chhiûⁿ piⁿ, ké beh su-hā kap i kóng-ōe, chiū tùi i ê pak-tó͘ tu̍h--lo̍h-khì, i chiū sí. Che sī in-ūi i ū thâi-sí Iok-ap ê sió-tī A-sat-hek.

28Āu-lâi Tāi-pi̍t thiaⁿ--tio̍h, chiū kóng, “Lâu Nî-ní ê kiáⁿ Ap-nî-ní ê huih chit-ê chōe, kap góa í-ki̍p góa ê kok bô koan-hē, goán tī Siōng Chú ê bīn-chêng sī bû-ko͘--ê.

29Goān hit-ê chōe Iok-ap kap in lāu-pē choân-ke ka-kī taⁿ; koh goān Iok-ap ê ke put-toān ū lâng tì-tio̍h hā-siau á-sī bâ-hong, ū lâng bô gia̍h koáiⁿ-á bōe-tàng kiâⁿ-lō͘, ū lâng hō͘ to thâi-sí, á-sī bô thang chia̍h.”

30Iok-ap kap i ê sió-tī A-pí-su thâi-sí Ap-nî-ní, sī in-ūi Ap-nî-ní tī Ki-piàn kap in kau-chiàn ê sî, thâi-sí in ê hiaⁿ-tī A-sat-hek.

31Tāi-pi̍t bēng-lēng Iok-ap kap tè i ê lâng kóng, “Lín tio̍h thiah-li̍h saⁿ, chhēng môa-saⁿ, ūi-tio̍h Ap-nî-ní thî-khàu.” Tāi-pi̍t -ông mā tè tī koaⁿ-chhâ āu-bīn.

32In kā Ap-nî-ní bâi-chòng tī Hi-pek-lûn. Ông óa Ap-nî-ní ê bōng thî-khàu, chèng-lâng mā thî-khàu.

33Ông ūi-tio̍h Ap-nî-ní chhiùⁿ ai-ko, kóng, “ Ap-nî-ní ná ōe chhin-chhiūⁿ gōng-lâng án-ni sí?

34Lí ê chhiú bô siū khún-pa̍k, lí ê kha bô khàu só-liān; lí kèng-jiân sí tī pháiⁿ-lâng ê chhiú-thâu.” Chèng-lâng koh ūi-tio̍h Ap-nî-ní ai-khàu.

35Ji̍t-thâu iáu-bē lo̍h-soaⁿ í-chêng, chèng-lâng lâi khǹg Tāi-pi̍t chia̍h-pn̄g, m̄-kú Tāi-pi̍t chiù-chōa kóng, “Góa nā tī ji̍t lo̍h í-chêng chia̍h-pn̄g á-sī chia̍h pa̍t-hāng mi̍h-kiāⁿ, goān Siōng-tè ka-pē chek-hoa̍t góa.”

36Chèng-lâng chai-iáⁿ chit-ê tāi-chì, lóng kám-kak chin hó; ông só͘ chòe--ê, chèng-lâng lóng khòaⁿ-chòe hó.

37Hit-ji̍t, kun-tè Tāi-pi̍t ê lâng kap só͘-ū Í-sek-lia̍t -lâng chiah chai, thâi-sí Nî-ní ê kiáⁿ Ap-nî-ní m̄-sī chhut tī ông ê ì-sù.

38Ông tùi i ê pō͘-hā kóng, “Lín kiám m̄ chai kin-á-ji̍t tī Í-sek-lia̍t tiong, sí chi̍t ê úi-tāi ê chiòng-léng?

39Góa sui-jiân siū boah-iû soán-li̍p choh-ông, m̄-kú kin-á-ji̍t iáu bô-kàu la̍t; Sé-lō͘-ngá hiah-ê kiáⁿ pí góa khah kiông. Goān Siōng Chú chiàu pháiⁿ-lâng só͘ chòe ê pháiⁿ pò-èng in.”

← Chapter 2 Jump to: Chapter 4 →