2 Samuel 4

Chinese TTVR (現代台語譯本羅馬字版)

← Chapter 3 Jump to: Chapter 5 →

1Sò-lô ê kiáⁿ I-si Pho-siat thiaⁿ-tio̍h Ap-nî-ní sí tī Hi-pek-lûn, chiū kiaⁿ-hiâⁿ sit-táⁿ. Í-sek-lia̍t chèng-lâng mā kiaⁿ kah m̄-chai beh án-chóaⁿ.

2I-si Pho-siat ū nn̄g ê koaⁿ-tiúⁿ, Pa-ná kap Lī-kah, sī Piān-ngá-bín chi-cho̍k Pí-lio̍k -lâng Lîm-bûn ê kiáⁿ.

3Pí-lio̍k -lâng chá-chêng cháu kàu Ki-tha-im, khiā-khí tī hia, kàu kin-á-ji̍t.

4Sò-lô ê kiáⁿ Iok-ná-tan ū chi̍t ê kiáⁿ nn̄g kha lóng pái, kiò-chòe Bí-hui-pho-siat. Sò-lô kap Iok-ná-tan sí ê siau-sit tùi Iâ-su-lia̍t thoân--lâi ê sî, i tú-á gō͘ hè; i ê lin-bú kā i phō-teh cháu; in-ūi cháu chin kín, gín-á poa̍h--lo̍h-khì, kha chiah pái.

5Pí-lio̍k -lâng Lîm-bûn ê kiáⁿ Lī-kah kap Pa-ná chhut--khì, chha-put-to ji̍t tiong-tàu ê sî lâi I-si Pho-siat ê chhù. I tú-á teh khùn tiong-tàu.

6In ji̍p-khì chhù-lāi ké-iáⁿ beh put be̍h-á, chiū tùi I-si Pho-siat ê pak-tó͘ tu̍h--lo̍h-khì; Lī-kah kap i ê hiaⁿ-tī Pa-ná chiū tô-cháu.

7In ji̍p pâng-lāi ê sî, I-si Pho-siat tú-á tī pâng-keng tó tī bîn-chhn̂g teh khùn; in chiū kā i thâi-sí, koah i ê thâu-khak, kā thâu kōaⁿ--teh, ǹg A-la-pa ê hong-hiòng thàu-mî tô-cháu.

8In tòa I-si Pho-siat ê thâu-khak khì Hi-pek-lûn Tāi-pi̍t hia, tùi ông kóng, “Chhiáⁿ khòaⁿ! Che sī Sò-lô ê kiáⁿ I-si Pho-siat ê thâu; lí ê tùi-te̍k Sò-lô bat siàu-siūⁿ lí ê sìⁿ-miā. Siōng Chú kin-á-ji̍t í-keng ū ūi-tio̍h góa ê chú góa ê ông tùi Sò-lô kap i ê hō͘-tāi pò-siû.”

9Tāi-pi̍t ìn Pí-lio̍k -lâng Lîm-bûn ê kiáⁿ Lī-kah kap i ê hiaⁿ-tī Pa-ná, kóng, “Siōng Chú kiù-sio̍k góa ê sìⁿ-miā thoat-lī só͘-ū ê khó͘-lān, góa kí éng-oa̍h ê Siōng Chú chiù-chōa;

10í-chêng ū lâng lâi Sé-kek-la pò góa kóng, ‘ Sò-lô í-keng sí.’ I ka-kī lia̍h-chòe sī pò hó siau-sit, m̄-kú góa bô kā i chióng-lē, tian-tò kā i lia̍h--khí-lâi, thâi-sí.

11Hô-hòng lín chiah-ê pháiⁿ-lâng! Lín thàn bû-ko͘ ê lâng teh khùn ê sî, ji̍p-khì chhù-lāi kā i thâi-sí, góa kiám bô beh tùi lín ê chhiú thó lín lâu i ê huih ê chōe, tùi tōe-chiūⁿ kā lín tû-bia̍t?”

12Tāi-pi̍t bēng-lēng pō͘-hā kā in thâi-sí, chām-tn̄g in ê kha-chhiú, kā in ê si-thé tiàu tī Hi-pek-lûn ê chúi-tî piⁿ, jiân-āu chiong I-si Pho-siat ê thâu-khak bâi-chòng tī Hi-pek-lûn Ap-nî-ní ê bōng.

← Chapter 3 Jump to: Chapter 5 →