2 Samuel 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Ē-bīn sī Tāi-pi̍t ê ûi-giân. Iâ-se ê kiáⁿ Tāi-pi̍t, chiū-sī tit-tio̍h ko-seng, Ngá-kok ê Siōng-tè só͘ soán-li̍p, Í-sek-lia̍t lâng-lâng ì-ài ê si-jîn kóng:

2Siōng Chú ê sîn thong-kè góa thoân-ta̍t, I ê ōe tī góa ê chhùi.

3Í-sek-lia̍t ê Siōng-tè ū kóng, Í-sek-lia̍t ê Chio̍h-pôaⁿ tùi góa kóng: Ēng kong-gī tī-lí, ēng kèng-ùi Siōng-tè lâi tī-lí ê lâng,

4ōe chhin-chhiūⁿ bô hûn ê chheng-chá tú-á chhut ê ji̍t-kng, lo̍h-hō͘ liáu-āu tāi-tōe chhiⁿ-chháu hoán-siā ê kong-chhái.

5Góa ê ke tī Siōng-tè bīn-chêng kiám m̄-sī án-ni? I ū kap góa li̍p éng-oán ê iok, ta̍k-hāng an-pâi chiâu-chn̂g koh ún-kò͘. Góa só͘-ū ê chín-kiù kap só͘-ū ê goān-bōng, I lóng kā góa sêng-choân.

6M̄-kú húi-lūi lóng ōe chhin-chhiūⁿ hō͘ lâng hiat-ka̍k ê chhì-á, lâng m̄-káⁿ ēng chhiú the̍h;

7beh kha̍p in ê lâng, tio̍h ēng thih-khì kap chhiuⁿ-pìⁿ; tī hia chhì-á it-tēng hō͘ hé sio-bia̍t.

8Tāi-pi̍t ê ióng-sū ê miâ-toaⁿ kì tī ē-bīn: Hap-kek-mô͘-nî -lâng Iok-siat Pa-siat, mā kiò-chòe I-su-nî -lâng A-tí-lô, sī saⁿ ê ióng-sū ê siú-léng, bat chi̍t piàn phah-sí poeh-pah ê lâng.

9Tē-jī ê sī A-hô-a -lâng Tó-to ê kiáⁿ Í-lī-a-sat, i sī tè Tāi-pi̍t saⁿ ê ióng-sū ê chi̍t ê. Ū chi̍t piàn, Hui-lī-sū -lâng chū-chi̍p lâi kong-kek Í-sek-lia̍t -lâng, Í-sek-lia̍t -lâng thiat-thè, m̄-kú chit saⁿ ê ióng-sū tùi Hui-lī-sū -lâng chhiàng-siaⁿ.

10Í-lī-a-sat khí-lâi phah Hui-lī-sū -lâng, phah kàu chhiú sng, chhiú liâm tī to-pìⁿ. Hit-ji̍t, Siōng Chú hō͘ in tōa sèng-lī; kun-peng tò-tńg--lâi Í-lī-a-sat ê āu-bīn, kan-ta teh chhiúⁿ chiàn-lī-phín.

11Tē-saⁿ ê sī Hap-la -lâng A-ki ê kiáⁿ Sa-má. Ū chi̍t ji̍t, Hui-lī-sū -lâng tī chi̍t khu âng-tāu-hn̂g chi̍p-ha̍p pâi-tīn; Í-sek-lia̍t kun-peng tô-cháu.

12Sa-má khiā tī hn̂g-tiong hông-siú hit-khu hn̂g, phah Hui-lī-sū -lâng; Siōng Chú hō͘ i tōa sèng-lī.

13Siu-koah ê sî, saⁿ-cha̍p ê siú-léng tiong ū saⁿ ê lo̍h-khì A-tō͘-lân-tōng kìⁿ Tāi-pi̍t. Hui-lī-sū ê kun-tūi tī Lī-hoa̍t-im Soaⁿ-kok chat-iâⁿ.

14Hit-sî, Tāi-pi̍t tī iàu-sài; Hui-lī-sū ê kun-tūi chū-chāi tī Pek-lī-hêng.

15Tāi-pi̍t ēng chin khat-bō͘ ê kháu-khì kóng, “Nā ū lâng ōe-tàng khì the̍h Pek-lī-hêng siâⁿ-mn̂g piⁿ ê chíⁿ-chúi hō͘ góa lim, m̄-chai jōa-á-ni̍h hó!”

16Chit saⁿ ê ióng-sū chiū chhiong-kè Hui-lī-sū -lâng ê iâⁿ-tōe, tùi Pek-lī-hêng siâⁿ-mn̂g piⁿ ê chíⁿ chhiūⁿ-chúi, kōaⁿ-lâi hō͘ Tāi-pi̍t. M̄-kú Tāi-pi̍t m̄ lim, tò chhut-lâi hiàn hō͘ Siōng Chú,

17kóng, “Siōng Chú ah, góa ná thang lim chit-ê chúi? Che kiám m̄-sī chiah-ê ēng sìⁿ-miā khì ōaⁿ--lâi ê lâng ê huih?” Só͘-í Tāi-pi̍t m̄ lim. Che sī chit saⁿ ê ióng-sū chòe ê tāi-chì.

18Sé-lō͘-ngá ê kiáⁿ, Iok-ap ê sió-tī A-pí-su sī lēng-gōa saⁿ ê ióng-sū ê siú-léng; i bat gia̍h chhiuⁿ thâi-sí saⁿ-pah ê lâng, chiū tī saⁿ ê ióng-sū tiong ū-miâ.

19I sī saⁿ ê ióng-sū tiong tē-it chhut-miâ--ê, só͘-í chòe in ê léng-siù; m̄-kú i iáu put-ki̍p chêng hit saⁿ ê ióng-sū.

20Koh ū Kah-sih -lâng Iâ-hô-iâ-tāi ê kiáⁿ Pí-ná-ngá; i sī ióng-sū, ū chòe chin chōe tōa-sū: I bat thâi-sí Mô͘-ap nn̄g ê kiông-béng ê ióng-sū; koh tī lo̍h-seh ê sî, lo̍h-khì khiⁿ-lāi thâi-sí chi̍t chiah sai;

21koh thâi-sí chi̍t ê koân-tōa ê Ai-ki̍p -lâng. Hit-ê Ai-ki̍p -lâng chhiú gia̍h chhiuⁿ, Pí-ná-ngá chí-ū gia̍h kùn lo̍h-khì i hia, chhiúⁿ i ê chhiuⁿ, ēng hit-ki chhiuⁿ kā i thâi-sí.

22Che sī Iâ-hô-iâ-tāi ê kiáⁿ Pí-ná-ngá só͘ chòe ê sū, chiū tī saⁿ ê ióng-sū tiong ū-miâ.

23I pí saⁿ-cha̍p ê ióng-sū khah ū bêng-bōng, m̄-kú put-ki̍p chêng hit saⁿ ê ióng-sū. Tāi-pi̍t ū siat-li̍p i chòe sī-ōe-tiúⁿ.

24Saⁿ-cha̍p ê ióng-sū tiong ū: Iok-ap ê sió-tī A-sat-hek Pek-lī-hêng -lâng Tó-to ê kiáⁿ I-le̍k-hap-lân

25Hap-lu̍t -lâng Sa-má kap Í-lī-ka

26Phà-le̍k-thê -lâng Hi-lī-su Thê-ko-a -lâng Ek-kiat ê kiáⁿ Í-la

27A-ná-tu̍t -lâng A-pí-í-siā Hō͘-sa -lâng Bí-pún-nái

28A-hô-a -lâng Sat-bûn Nî-tô-hoat -lâng Má-hap-lâi

29Nî-tô-hoat -lâng Pa-ná ê kiáⁿ Hi-li̍p Piān-ngá-bín chi-cho̍k Ki-pí-a -lâng Lī-pài ê kiáⁿ Í-thài

30Pí-la-tùn -lâng Pí-ná-ngá Ka-si̍t-khoe -lâng Hi-thài

31A-la-pa -lâng A-pí A-pún Pa-ló͘-bí -lâng A-su-má-ui

32Sa-pún -lâng Í-lī-ngá-hap-pa Ngá-siān ê chi̍t ê kiáⁿ Iok-ná-tan

33Hap-la -lâng Sa-má kap Sa-la ê kiáⁿ A-hi-àm

34Má-ka -lâng A-hap-pài ê kiáⁿ Í-lī-hoat-lia̍t Ki-lô -lâng A-hi-to-hut ê kiáⁿ Í-liân

35Ka-bi̍t -lâng Hi-su-lô A-pa -lâng Phà-lâi

36Só-pa -lâng Ná-tan ê kiáⁿ Í-kah Ka-tek -lâng Pa-nî

37A-bûn -lâng Sé-le̍k kā Sé-lō͘-ngá ê kiáⁿ Iok-ap gia̍h kun-khì ê Pí-lio̍k -lâng Ná-hap-lâi

38Í-thiap -lâng Í-la kap Ka-li̍p

39Hek -lâng O͘-lī-a kiōng saⁿ-cha̍p-chhit lâng.

← Chapter 22 Jump to: Chapter 24 →