2 Samuel 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Āu-lâi, A-bûn -lâng ê ông Ná-hat sí, i ê kiáⁿ Hap-lūn sòa-chiap i choh-ông.

2Tāi-pi̍t kóng, “Góa beh hó khoán-thāi Hap-lūn, chhin-chhiūⁿ i ê lāu-pē Ná-hat hó khoán-thāi góa án-ni.” Tāi-pi̍t in-ūi Hap-lūn ê lāu-pē sí, chiū phài jîn-sîn khì ùi-būn. Tāi-pi̍t ê jîn-sîn kàu A-bûn -lâng kéng-lāi ê sî,

3A-bûn -lâng ê léng-siù kā in ê chú-lâng Hap-lūn kóng, “ Tāi-pi̍t phài lâng lâi ùi-būn lí, lí siūⁿ-kóng i chin-chiàⁿ chun-kèng lí ê lāu-pē o͘h? Tāi-pi̍t phài i ê pō͘-hā lâi kìⁿ lí, kiám m̄-sī beh siông-sè cheng-thàm chit-ê siâⁿ, khòaⁿ beh án-chóaⁿ kā lán cheng-ho̍k?”

4Hap-lūn chiū lia̍h Tāi-pi̍t ê jîn-sîn, kā in ê chhùi-chhiu thì chi̍t-pòaⁿ, koh chián-tn̄g in ê saⁿ ē-pòaⁿ-chat, hō͘ in lō͘-chhut hā-thé, jiân-āu kóaⁿ in tò--khì.

5Ū lâng tùi Tāi-pi̍t pò-kò, Tāi-pi̍t chiū phài lâng khì chiap in, in-ūi in kám-kak hui-siông kiàn-siàu. Ông kóng, “Lâu tiàm Iâ-lī-ko, thèng-hāu chhùi-chhiu hoat-tn̂g chiah tò--lâi.”

6A-bûn -lâng chai in jiá Tāi-pi̍t siū-khì, chiū chhe lâng khì chhiàⁿ Pek Lī-ha̍p kap Só-pa ê Sū-lī-a -lâng, pō͘-peng nn̄g-bān, kap Má-ka -ông ê lâng chi̍t-chheng, Tô-pek -lâng chi̍t-bān nn̄g-chheng.

7Tāi-pi̍t thiaⁿ--kìⁿ, chiū phài Iok-ap chhōa só͘-ū ióng-béng ê kun-tūi chhut--khì.

8A-bûn -lâng chhut-lâi tī siâⁿ-mn̂g ê thâu-chêng pâi-tīn; Só-pa kap Lī-ha̍p ê Sū-lī-a -lâng, Tô-pek -lâng, kap Má-ka -lâng lēng-gōa tī iá-gōa pâi-tīn.

9Iok-ap khòaⁿ-kìⁿ i ê chêng-āu lóng ū tùi-te̍k pâi-tīn, chiū tùi Í-sek-lia̍t cheng-peng ê tiong-kan koh-chài kéng chi̍t-kóa ióng-sū chhut--lâi, pâi-tīn beh tí-te̍k Sū-lī-a -lâng.

10Iok-ap chiong kî-tha ê peng-sū kau hō͘ i ê sió-tī A-pí-su, in chiū biān-tùi A-bûn -lâng pâi-tīn.

11Iok-ap tùi A-pí-su kóng, “ Sū-lī-a -lâng nā pí góa khah kiông, lí tio̍h lâi pang-chān góa; A-bûn -lâng nā pí lí khah kiông, góa ōe khì pang-chān lí.

12Tio̍h kian-kiông! Tio̍h ūi lán ê tông-pau kap lán Siōng-tè ê siâⁿ ióng-kám chhut-chiàn. Siōng Chú ōe chiàu I khòaⁿ-chòe hó--ê khì chòe.”

13Iok-ap chhōa i ê kun-tūi chìn-chêng kap Sū-lī-a -lâng kau-chiàn; Sū-lī-a -lâng chiàn-pāi, chiū tī Iok-ap ê bīn-chêng tô-cháu.

14A-bûn -lâng khòaⁿ-tio̍h Sū-lī-a -lâng tô-cháu, mā tī A-pí-su ê bīn-chêng tô-cháu ji̍p-siâⁿ. Iok-ap chiū tùi A-bûn -lâng hia tò-khì Iâ-lō͘-sat-léng.

15Sū-lī-a -lâng khòaⁿ-tio̍h ka-kī thâi-su Í-sek-lia̍t -lâng, chiū tiông-chéng kun-tūi.

16Só-pa -ông Hap-tāi-tí-siā phài lâng khì Iù-hoat-la-tí-hô hit-pêng tiàu Sū-lī-a ê kun-tūi lâi; in chiū lâi kàu Hi-lân. Hap-tāi-tí-siā ê chiong-kun Sok-hoat chhōa kun-tūi lâi.

17Ū lâng pò-kò Tāi-pi̍t, i chiū tiàu-chi̍p Í-sek-lia̍t choân-kun kè Iok-tàn-hô, chìn-kun kàu Hi-lân. Sū-lī-a -lâng pâi-tīn, kap Tāi-pi̍t kau-chiàn.

18Sū-lī-a -lâng thâi-su Í-sek-lia̍t -lâng; Tāi-pi̍t thâi-sí Sū-lī-a ê chiàn-chhia-peng chhit-pah lâng, bé-peng sì-bān, koh chiong in ê chiong-kun Sok-hoat thâi-sí tī hia.

19Hap-tāi-tí-siā sio̍k-hā hiah-ê ông khòaⁿ-tio̍h in thâi-su Í-sek-lia̍t -lâng, chiū kap Í-sek-lia̍t kóng-hô, kui-sūn in. Tùi án-ni, Sū-lī-a -lâng chiū m̄-káⁿ koh pang-chān A-bûn -lâng.

← Chapter 9 Jump to: Chapter 11 →