2 Samuel 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Hit-sî ū chi̍t ê húi-lūi, kiò-chòe Sī-pa, sī Piān-ngá-bín -lâng Pí-ki-lī ê kiáⁿ. I pûn sàu-kak kóng, “ Tāi-pi̍t ê ông-kok lán bô hūn, Iâ-se ê kiáⁿ kap lán bô koan-hē. Í-sek-lia̍t -lâng ah, lín lóng tò-khì lín tau.”

2Tùi án-ni, só͘-ū ê Í-sek-lia̍t -lâng lóng lī-khui Tāi-pi̍t khì tè Pí-ki-lī ê kiáⁿ Sī-pa; m̄-kú Iû-tāi -lâng, tùi Iok-tàn-hô kàu Iâ-lō͘-sat-léng, kui-chōa lō͘ lóng kā ông tè-tiâu-tiâu.

3Tāi-pi̍t kàu Iâ-lō͘-sat-léng, ji̍p ông-kiong. I chiong chêng só͘ lâu-teh kò͘ ông-kiong ê cha̍p ê pîn-hui, kā in koaiⁿ-kìm tī pa̍t-keng chhù, kiong-kip in chia̍h, chhēng, ēng, bô kap in chhin-kūn; in siū koaiⁿ-kìm, chhin-chhiūⁿ kóaⁿ-hū, ti̍t-kàu in sí.

4Ông tùi A-má-sat kóng, “Lí tio̍h tī saⁿ ji̍t lāi chio-chi̍p Iû-tāi -lâng lâi góa chia, lí mā tio̍h lâi.”

5A-má-sat chiū khì chio-chi̍p Iû-tāi -lâng, m̄-kú i iân-chhiân chhiau-kè kî-hān.

6Tāi-pi̍t kā A-pí-su kóng, “Taⁿ Pí-ki-lī ê kiáⁿ Sī-pa tùi lán ê siong-hāi, ōe pí Ap-sa-liông khah giâm-tiōng. Lí tio̍h tòa lí chú-lâng ê kun-tūi kā i tui-jip, chiah bián i chiàm-tio̍h kian-kò͘ ê siâⁿ, chiâⁿ-chòe lán ê khùn-jiáu.”

7Iok-ap ê pō͘-hā, kap Ki-lī-thê -lâng, Pí-lī-thê -lâng, í-ki̍p chèng ióng-sū, lóng tè A-pí-su tùi Iâ-lō͘-sat-léng chhut--khì, tui-jip Pí-ki-lī ê kiáⁿ Sī-pa.

8In kàu Ki-piàn ê tōa chio̍h-pôaⁿ hia, A-má-sat lâi kàu in ê bīn-chêng. Hit-sî Iok-ap chhēng chiàn-kah, hâ tòa to-kiàm ê io-tòa, to chhah tī siù-lāi. I kiâⁿ chìn-chêng ê sî, to tùi siù--ni̍h lak--chhut-lâi.

9Iok-ap kā A-má-sat kóng, “Hiaⁿ-tī, pêng-an.” Iok-ap chiū ēng chiàⁿ-chhiú la̍k A-má-sat ê chhùi-chhiu, beh kā i chim.

10A-má-sat bô chù-ì Iok-ap tò-chhiú gia̍h kiàm; Iok-ap ēng hit-ki kiàm chha̍k-ji̍p A-má-sat ê pak-tó͘, i ê tn̂g-á lâu chhut-lâi tī thô͘-kha; chi̍t to chiū sí. Iok-ap kap i ê sió-tī A-pí-su khì tui-jip Pí-ki-lī ê kiáⁿ Sī-pa.

11Ū chi̍t ê Iok-ap ê pō͘-hā khiā tī A-má-sat ê si-thé piⁿ--á, kóng, “Ióng-hō͘ Iok-ap, kui-sūn Tāi-pi̍t ê lâng lóng tio̍h tè Iok-ap khì.”

12A-má-sat ê si-thé kō kah choân huih tó tī lō͘-tiong, Iok-ap hit-ê pō͘-hā khòaⁿ-tio̍h chèng-lâng lóng thêng-kha teh khòaⁿ, chiū chiong si-thé tùi lō͘-tiong sóa-khì hn̂g--ni̍h, ēng saⁿ kā i khàm--teh.

13Sin-si tùi lō͘-tiong sóa-cháu í-āu, só͘-ū ê lâng chiū lóng tè Iok-ap, khì tui-jip Pí-ki-lī ê kiáⁿ Sī-pa.

14Sī-pa kiâⁿ-thàu Í-sek-lia̍t só͘-ū ê chi-cho̍k, kàu Pek Má-ka ê A-pek; Pí-ki-lī kâng chong-cho̍k ê lâng mā chū-chi̍p lâi tè i.

15Iok-ap kap i ê kun-peng kàu Pek Má-ka ê A-pek, ûi-khùn chit-ê siâⁿ; biān-tùi siâⁿ ê gōa-chhiûⁿ khí thô͘-tui, koh lòng siâⁿ beh hō͘ i tó.

16Ū chi̍t ê chhong-bêng ê hū-jîn-lâng tùi siâⁿ-téng kiò kóng, “Thiaⁿ leh, thiaⁿ leh. Lín khì kā Iok-ap kóng, chhiáⁿ i lâi chia, góa ū ōe beh kap i kóng.”

17Iok-ap chiū kiâⁿ óa--khì. Hū-jîn-lâng kóng, “Lí sī Iok-ap sī--bô?” I ìn kóng, “Góa chiū-sī.” Hū-jîn-lâng kóng, “Chhiáⁿ thiaⁿ lú-pī ê ōe.” I ìn kóng, “Góa teh thiaⁿ.”

18Hū-jîn-lâng kóng, “Kó͘-chá-lâng ū án-ni kóng, ‘Ū tāi-chì tio̍h khì A-pek hia mn̄g, chiah ōe kái-koat.’

19Goán tī Í-sek-lia̍t tiong sī siōng hô-pêng siōng tiong-sêng ê chi̍t chō siâⁿ. Lí sī siūⁿ-beh húi-bia̍t Í-sek-lia̍t tiong chit-ê chiah-ni̍h iàu-kín ê siâⁿ, ài-beh thun-bia̍t Siōng Chú ê sán-gia̍p sī--bô?”

20Iok-ap ìn kóng, “Góa choa̍t-tùi m̄-sī beh thun, á-sī beh bia̍t chit-ê siâⁿ.

21Tāi-chì m̄-sī án-ni, sī in-ūi Í-hoat-liân soaⁿ-khu ū chi̍t ê lâng, Pí-ki-lī ê kiáⁿ Sī-pa khí-chhiú kong-kek Tāi-pi̍t -ông. Lín chiong chit-ê lâng kau--chhut-lâi, góa chiū lī-khui chit-ê siâⁿ.” Hū-jîn-lâng kā Iok-ap kóng, “Hó! I ê thâu-khak góa ōe hiat-kè siâⁿ-chhiûⁿ hō͘ lí.”

22Hū-jîn-lâng chiū ēng i ê tì-hūi sòe-ho̍k chèng-lâng. In chám Pí-ki-lī ê kiáⁿ Sī-pa ê thâu-khak, hiat hō͘ Iok-ap. Iok-ap pûn sàu-kak, kun-peng chiū lī-khui siâⁿ kái-sàn, ta̍k-ê lâng tò-khì in tau. Iok-ap tò-khì Iâ-lō͘-sat-léng, khì ông hia.

23Iok-ap chòe Í-sek-lia̍t ê goân-sòe; Iâ-hô-iâ-tāi ê kiáⁿ Pí-ná-ngá koán-hat Ki-lī-thê -lâng kap Pí-lī-thê -lâng.

24A-to-lân koán-lí lô-ia̍h; A-hi-lu̍t ê kiáⁿ Iok-sa-hoat chòe sú-koaⁿ;

25Sī-hoat chòe su-kì. Sat-tok kap A-pí-a-tha chòe chè-si;

26Gâi-ní -lâng Í-la mā chòe Tāi-pi̍t ê chè-si.

← Chapter 19 Jump to: Chapter 21 →