2 Samuel 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Ū lâng kā Iok-ap kóng, “Ông ūi-tio̍h Ap-sa-liông thî-khàu pi-ai.”

2Hit-ji̍t ê sèng-lī pìⁿ-chòe choân-kun ê pi-ai, in-ūi hit-ji̍t kun-peng ū thiaⁿ-kóng ông ūi-tio̍h i ê kiáⁿ ai-siong.

3Hit-ji̍t kun-peng thau-thau-á ji̍p-siâⁿ, chhin-chhiūⁿ chiàn-pāi tô-cháu kiàn-siàu ê peng-sū kâng-khoán.

4Ông tà i ê bīn, tōa-siaⁿ háu, kóng, “Góa ê kiáⁿ Ap-sa-liông ah! Ap-sa-liông, góa ê kiáⁿ, góa ê kiáⁿ ah!”

5Iok-ap ji̍p ông tòa ê só͘-chāi khì kìⁿ ông, kóng, “Lí kin-á-ji̍t hō͘ lí só͘-ū ê jîn-sîn bô thé-biān. In kin-á-ji̍t kiù lí ê sìⁿ-miā, kiù lí ê kiáⁿ kap cha-bó͘-kiáⁿ, koh kiù lí ê hō͘-hui kap pîn-hui ê sìⁿ-miā.

6Oàn-hūn lí--ê, lí thiàⁿ in; thiàⁿ lí--ê, lí oàn-hūn in. Lí kin-á-ji̍t bêng-bêng piáu-sī lí bô khòaⁿ hiah-ê chiòng-léng kap pō͘-hā chòe iàu-kín. Góa kin-á-ji̍t khòaⁿ-chhut, nā Ap-sa-liông oa̍h--teh, goán lóng sí, lí tian-tò hoaⁿ-hí.

7Taⁿ lí tio̍h khí--lâi chhut-khì an-ùi lí ê pō͘-hā. Góa kí Siōng Chú chiù-chōa, lí nā bô chhut--khì, kim-mî bô chi̍t ê lâng ōe kap lí chòe-hé, pôe-phōaⁿ lí; chit-ê chai-hō pí lí tùi siàu-liân kàu hiān-chāi tú--tio̍h-ê koh-khah giâm-tiōng.”

8Ông chiū khí--lâi, chē tī siâⁿ-mn̂g-kháu; ū lâng kā kun-peng kóng, “Lín khòaⁿ, ông chē tī siâⁿ-mn̂g-kháu.” Kun-peng chiū lóng lâi kàu ông ê bīn-chêng. Í-sek-lia̍t -lâng í-keng tô-cháu, ta̍k-ê lâng tò-khì in tau.

9Í-sek-lia̍t ta̍k chi-cho̍k ê lâng hun-hun gī-lūn, kóng, “ Tāi-pi̍t -ông bat kái-kiù lán thoat-lī tùi-te̍k ê pek-hāi, koh tháu-pàng lán thoat-lī Hui-lī-sū -lâng ê ap-pek; i in-ūi siám-pī Ap-sa-liông iáu tī gōa-bīn tô-bông.

10Lán ū soán-li̍p Ap-sa-liông choh-ông tī-lí lán, i í-keng tīn-bông. Lín ná tìⁿ-tiām-tiām, m̄ chhiáⁿ ông tò--lâi?”

11Tāi-pi̍t -ông phài lâng khì kìⁿ chè-si Sat-tok kap A-pí-a-tha, kóng, “Lín tio̍h kā Iû-tāi ê tiúⁿ-ló kóng, ‘Ông í-keng ū thiaⁿ-tio̍h Í-sek-lia̍t chèng-lâng beh chhiáⁿ ông tńg-lâi ông-kiong; lín ná iáu-bē beh chhiáⁿ ông tò--lâi?

12Lín sī góa ê hiaⁿ-tī, góa ê kut-jio̍k; chhiáⁿ ông tò--lâi chit-ê tāi-chì, lín sī-án-chóaⁿ tè lâng bōe tio̍h?’

13Lín mā tio̍h kā A-má-sat kóng, ‘Lí kiám m̄-sī góa ê kut-jio̍k? Góa beh hō͘ lí tùi hiān-chāi khí tāi-thòe Iok-ap chòe goân-sòe, nā bô, goān Siōng-tè ka-pē chek-hoa̍t góa.’”

14Án-ni, Tāi-pi̍t chiū tit-tio̍h Iû-tāi chèng-lâng ê sim; in lóng tâng-sim chhin-chhiūⁿ chi̍t ê lâng. In chiū chhe lâng khì kìⁿ ông, kóng, “Chhiáⁿ lí kap lí ê chèng jîn-sîn tò--lâi.”

15Ông chiū khí-sin tò--khì. I kàu Iok-tàn-hô ê sî, Iû-tāi -lâng lâi Kiat-kah gêng-chiap i, chhōa i kè hô.

16Pa-hō͘-lîm ê Piān-ngá-bín -lâng, Ki-la ê kiáⁿ Sī-múi kóaⁿ-kín kap Iû-tāi -lâng lo̍h-lâi gêng-chiap Tāi-pi̍t -ông.

17Kap i lâi--ê, ū chi̍t-chheng ê Piān-ngá-bín -lâng, ū Sò-lô -ke ê po̍k-jîn Sé-pa, kap i cha̍p-gō͘ ê kiáⁿ, jī-cha̍p ê po̍k-jîn, in lóng kóaⁿ-kín kè Iok-tàn-hô khì kìⁿ ông.

18Ū lâng chiàu ông ê ì-sù, ēng chûn hō͘-sàng ông ê ka-koàn kè-hô. Ông teh-beh kè hô ê sî, Ki-la ê kiáⁿ Sī-múi lâi phak tī ông ê bīn-chêng,

19tùi ông kóng, “Góa ê chú góa ê ông lī-khui Iâ-lō͘-sat-léng ê sî, lí ê po̍k-jîn ū pōe-ge̍k lí; taⁿ kiû góa ê chú m̄-thang tui-kiù góa ê chōe. Chhiáⁿ ông m̄-thang chiong chit-ê tāi-chì kì-tiâu-tiâu, khǹg tī lí ê sim-lāi.

20Lí ê po̍k-jîn bêng-bêng chai ka-kī ū-chōe, só͘-í kin-á-ji̍t Iok-sek choân-ke góa tē-it tāi-seng lo̍h-lâi gêng-chiap góa ê chú góa ê ông.”

21Sé-lō͘-ngá ê kiáⁿ A-pí-su kóng, “ Sī-múi bat chiù-chó͘ Siōng Chú só͘ boah-iû soán-li̍p--ê, kiám m̄-bián hō͘ i sí?”

22Tāi-pi̍t kóng, “ Sé-lō͘-ngá ê kiáⁿ, che m̄-sī lín ê tāi-chì, góa lâi chhú-lí chiū hó; lín m̄-thang hoán-tùi. Kin-á-ji̍t Í-sek-lia̍t tiong kiám thang ū lâng siū chhú-sí? Góa kiám m̄ chai chit-chūn teh chòe Í-sek-lia̍t ê ông--ê sī góa?”

23Ông chiū kā Sī-múi kóng, “Lí m̄-bián sí.” Ông tùi i chiù-chōa.

24Sò-lô ê sun Bí-hui-pho-siat mā lo̍h-khì gêng-chiap ông; i tùi ông lī-khui ê ji̍t kàu ông pêng-an tò--lâi, bô sóe-kha, bô siu chhùi-chhiu, mā bô sóe-saⁿ.

25I tī Iâ-lō͘-sat-léng gêng-chiap ông ê sî, ông mn̄g i, “ Bí-hui-pho-siat, lí ná bô kap góa chòe-hé khì?”

26I ìn kóng, “Góa ê chú góa ê ông ah, hit-chūn lí ê po̍k-jîn ū chún-pī lû, siūⁿ-beh kap ông chòe-hé khì, m̄-kú góa sī pái-kha. Góa ê po̍k-jîn Sé-pa phiàn góa,

27koh tī góa ê chú góa ê ông bīn-chêng húi-pòng góa. Góa ê chú góa ê ông chhin-chhiūⁿ Siōng-tè ê sù-chiá, chhiáⁿ ông chiàu lí khòaⁿ-chòe hó--ê tùi-thāi góa.

28Góa ê pē choân-ke, tī góa ê chú góa ê ông bīn-chêng lóng kai sí; m̄-kú ông iáu hō͘ lí ê po̍k-jîn kap ông chòe-hé chia̍h, góa ná ū koân thang koh tùi ông chhéng-kiû sím-mi̍h?”

29Ông kā i kóng, “Lí m̄-bián koh kóng lí ê tāi-chì. Góa koat-tēng, lí kap Sé-pa pîⁿ-pun hiah-ê thó͘-tōe.”

30Bí-hui-pho-siat tùi ông kóng, “Góa ê chú góa ê ông í-keng pêng-an tò-lâi kiong-lāi, hiah-ê thó͘-tōe lóng hō͘ Sé-pa mā bô iàu-kín.”

31Ki-lia̍t -lâng Pa-se-lâi tùi Lô-ki-lîm lo̍h--lâi, beh hō͘-sàng ông kè Iok-tàn-hô.

32Pa-se-lâi sī poeh-cha̍p-hè ê lāu-lâng. I chin hó-gia̍h; ông tòa tī Má-hap-liām ê sî, i ū ēng chia̍h-mi̍h kiong-kip ông.

33Ông tùi Pa-se-lâi kóng, “Chhiáⁿ lí kap góa chòe-hé kè--khì, kap góa tòa Iâ-lō͘-sat-léng, góa beh chiàu-kò͘ lí.”

34Pa-se-lâi tùi ông kóng, “Góa iáu ū kúi nî thang oa̍h, thang kap ông chòe-hé tòa Iâ-lō͘-sat-léng?

35Góa í-keng poeh-cha̍p hè, í-keng bōe-hiáu hun-pia̍t súi bái, tam bōe chhut chia̍h-mi̍h ê chu-bī, thiaⁿ bōe chhut lâm-lú chhiùⁿ-koa ê siaⁿ-im. Po̍k-jîn ná thang thoa-lūi góa ê chú góa ê ông.

36Lí ê po̍k-jîn chí-ū pôe-phōaⁿ ông kè Iok-tàn-hô chi̍t-tè-á lō͘; ông ná tio̍h án-ni un-thāi góa?

37Kiû lí chún lí ê po̍k-jîn tò--khì, hō͘ góa thang sí tī góa ê kò͘-hiong, an-chòng tī góa ê pē-bú ê bōng hia. Taⁿ lí ê po̍k-jîn Kim-hán tī chia; chhiáⁿ góa ê chú góa ê ông hō͘ i kap lí chòe-hé kè--khì, chiàu lí só͘ khòaⁿ-chòe hó--ê tùi-thāi i.”

38Ông kóng, “ Kim-hán thang kap góa khì; góa ōe chiàu lí só͘ ǹg-bāng--ê khoán-thāi i; lí tùi góa chhéng-kiû--ê, góa kā lí tah-èng.”

39Só͘-ū ê lâng lóng kè Iok-tàn-hô, ông mā kè--khì. Ông kā Pa-se-lâi chim, kā i chiok-hok; i chiū tò-khì i ê kò͘-hiong.

40Ông kè hô, kàu Kiat-kah; Kim-hán mā kap i kè--khì; Iû-tāi lóng-chóng ê kun-peng kap Í-sek-lia̍t chi̍t-pòaⁿ ê kun-peng, mā lóng hō͘-sàng ông kè--khì.

41Āu-lâi, Í-sek-lia̍t jîn-bîn lâi kìⁿ ông, kā i kóng, “Goán ê hiaⁿ-tī Iû-tāi -lâng sī-án-chóaⁿ thau-thau-á kā lí chiap--khì, chhōa ông kap lí ê ka-sio̍k, í-ki̍p kun-tè lí ê lâng, kè Iok-tàn-hô?”

42Iû-tāi chèng-lâng ìn Í-sek-lia̍t -lâng, kóng, “Ông kap goán sī kâng chi-cho̍k, lín sī-án-chóaⁿ ūi-tio̍h chit-ê sū teh siū-khì? Goán kiám bat tùi ông tit-tio̍h sím-mi̍h hó-chhù? Ông kiám bat hō͘ goán sím-mi̍h lī-ek?”

43Í-sek-lia̍t -lâng ìn Iû-tāi -lâng kóng, “Cha̍p-jī chi-cho̍k tiong, goán ū cha̍p chi-cho̍k, goán kap Tāi-pi̍t -ông pí lín khah ū koan-hē. Lín sī-án-chóaⁿ khòaⁿ-khin goán? Kiám m̄-sī goán seng kóng beh chhōa ông tò--lâi?” Chóng-sī, Iû-tāi -lâng ê ōe pí Í-sek-lia̍t -lâng ê ōe khah ngī.

← Chapter 18 Jump to: Chapter 20 →