2 Samuel 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Siōng Chú chhe Ná-tan khì kìⁿ Tāi-pi̍t; Ná-tan kàu i hia, kā i kóng, “Tī bó͘ chi̍t ê siâⁿ ū nn̄g ê lâng, chi̍t ê hó-gia̍h, chi̍t ê sàn-chhiah.

2Hó-gia̍h--ê ū gû iûⁿ chin chōe;

3sàn-chhiah--ê sím-mi̍h to bô, chí-ū chi̍t chiah i bóe lâi chhī ê iûⁿ-á-kiáⁿ; i kā chhī, hō͘ hit-chiah iûⁿ-á-kiáⁿ kap i ê kiáⁿ-jî chòe-hé tióng-tōa, chòe-hé chia̍h, chòe-hé lim, koh chòe-hé khùn, kā khòaⁿ-chòe chhin-chhiūⁿ ka-kī ê cha-bó͘-kiáⁿ.

4Ū chi̍t ê chhut-gōa-lâng lâi hó-gia̍h-lâng hia; hó-gia̍h-lâng m̄-kam tùi ka-kī ê iûⁿ-kûn gû-kûn tiong lia̍h chi̍t chiah lâi chiau-thāi lâng-kheh, tian-tò lia̍h sàn-chhiah-lâng hit-chiah iûⁿ-á chiau-thāi i.”

5Tāi-pi̍t tùi hit-ê hó-gia̍h-lâng hoat tōa siū-khì, kā Ná-tan kóng, “Góa kí éng-oa̍h ê Siōng Chú chiù-chōa, chòe chit-ê tāi-chì ê lâng tio̍h sí;

6i tio̍h pê sì pē ê iûⁿ-á, in-ūi i chòe chit-ê sū, bô lîn-bín ê sim.”

7Ná-tan tùi Tāi-pi̍t kóng, “Lí chiū-sī hit-ê lâng! Siōng Chú — Í-sek-lia̍t ê Siōng-tè án-ni kóng, ‘Góa soán-li̍p lí chòe Í-sek-lia̍t ê ông, kiù lí thoat-lī Sò-lô ê chhiú.

8Góa ēng lí chú-lâng ê chhù-the̍h hō͘ lí, mā chiong lí chú-lâng hiah-ê bó͘ kau hō͘ lí, koh chiong Í-sek-lia̍t -ke kap Iû-tāi -ke hō͘ lí; chiah-ê lí nā iáu hiâm bô kàu, góa ōe koh-khah chōe hō͘ lí.

9Lí sī-án-chóaⁿ biáu-sī Siōng Chú ê bēng-lēng, kiâⁿ I khòaⁿ-chòe pháiⁿ ê tāi-chì? Lí chioh A-bûn -lâng ê to thâi-sí Hek -lâng O͘-lī-a, hō͘ i sí tī chiàn-tiûⁿ, koh chhōa i ê bó͘ chòe lí ê bó͘.

10Taⁿ to-kiàm beh éng-oán bô lī-khui lí ê ke, in-ūi lí biáu-sī góa, chhōa Hek -lâng O͘-lī-a ê bó͘ chòe lí ê bó͘.’

11Siōng Chú koh án-ni kóng, ‘Góa beh hō͘ chai-hō tùi lí ka-kī ê ke khí-lâi kong-kek lí; góa beh tī lí ê ba̍k-chiu-chêng, chiong lí hiah-ê bó͘ hō͘ lí sin-piⁿ ê lâng, i beh tī tng-thâu-pe̍h-ji̍t kap in chòe-hé khùn.

12Lí tī àm-tiong chòe ê tāi-chì, góa beh tng-thâu-pe̍h-ji̍t, tī Í-sek-lia̍t chèng-lâng ê bīn-chêng hō͘ chiah-ê tāi-chì hoat-seng.’”

13Tāi-pi̍t kā Ná-tan kóng, “Góa ū tek-chōe Siōng Chú!” Ná-tan kā Tāi-pi̍t kóng, “Siōng Chú í-keng tû-khì lí ê chōe, lí bōe tì-kàu sí.

14Chóng-sī in-ūi lí chòe chit-ê tāi-chì, tōa-tōa biáu-sī Siōng Chú, só͘-í lí só͘ siⁿ hit-ê kiáⁿ it-tēng ōe sí.”

15Ná-tan chiū tò-khì in tau. Siōng Chú phah Tāi-pi̍t kap O͘-lī-a ê bó͘ siⁿ ê eⁿ-á, eⁿ-á chiū phòa-pīⁿ chin siong-tiōng.

16Tāi-pi̍t chiū ūi-tio̍h hit-ê kiáⁿ tùi Siōng-tè kî-tó. Tāi-pi̍t koh kìm-chia̍h, ji̍p-khì lāi-bīn thong-mî tó tī thô͘-kha.

17I kiong-lāi hiah-ê tiúⁿ-ló khì kàu i ê sin-piⁿ, beh kā i hû--khí-lâi; m̄-kú i m̄-khéng, mā bô beh kap in chòe-hé chia̍h.

18Kàu tē-chhit ji̍t gín-á sí; Tāi-pi̍t ê jîn-sîn m̄-káⁿ kā i kóng gín-á sí lah; in-ūi in kóng, “Gín-á iáu oa̍h--teh, lán khǹg i, i to m̄ thiaⁿ, nā kā i kóng gín-á sí--khì, i m̄-chai ōe án-chóaⁿ siong-hāi ka-kī?”

19Tāi-pi̍t khòaⁿ-tio̍h i ê jîn-sîn teh chhi-bú-chhi-chhū, chiū chai gín-á í-keng sí. Tāi-pi̍t mn̄g i ê jîn-sîn kóng, “Gín-á sí ah sī--bô?” In kóng, “Sí--khì ah.”

20Tāi-pi̍t chiū tùi thô͘-kha khí--lâi, sóe seng-khu, boah-iû, ōaⁿ-saⁿ, ji̍p-khì Siōng Chú ê tiān kèng-pài. Jiân-āu i tò-khì i ê chhù, hoan-hù lâng the̍h chia̍h-mi̍h lâi, i chiū chia̍h.

21Jîn-sîn mn̄g i, “Lí ná ōe án-ni chòe? Gín-á oa̍h--teh ê sî, lí kìm-chia̍h thî-khàu; gín-á sí, lí hoán-tńg khí-lâi chia̍h.”

22Tāi-pi̍t kóng, “Gín-á iáu oa̍h--teh, góa kìm-chia̍h thî-khàu, in-ūi góa siūⁿ-kóng, Siōng Chú ōe lîn-bín góa, hō͘ gín-á oa̍h--teh.

23Taⁿ gín-á í-keng sí, góa kìm-chia̍h ū siáⁿ lō͘-ēng? Góa kiám ōe-tàng hō͘ i tò-tńg--lâi? Góa ōe khì i hia, m̄-kú i bōe-tàng tńg-lâi góa chia.”

24Tāi-pi̍t an-ùi i ê bó͘ Poa̍t-sī-pa, kap i tâng-pâng, i chiū siⁿ chi̍t ê kiáⁿ, kā i hō-miâ kiò-chòe Só͘-lô-bûn; Siōng Chú thiàⁿ i,

25chiū thok sian-ti Ná-tan kā i hō-miâ kiò-chòe Iâ-tí-tí-a.

26Iok-ap kong-táⁿ A-bûn -lâng ê kiaⁿ-siâⁿ La-pa.

27Iok-ap chhe sù-chiá khì kìⁿ Tāi-pi̍t kóng, “Góa í-keng chhú-tio̍h La-pa ê chúi-goân-tōe.

28Taⁿ lí tio̍h chū-chi̍p kî-tha ê kun-peng lâi ûi-kong chit-ê siâⁿ, kā i chiàm-léng; kiaⁿ-liáu góa chhú chit-ê siâⁿ, lâng ōe ēng góa ê miâ lâi kiò chit-ê siâⁿ.”

29Tāi-pi̍t chiū tiàu-chi̍p só͘-ū kun-peng khì La-pa, kā i kong-chhú.

30I the̍h-tio̍h Bí-le̍k-kong thâu-khak téng ê ông-koan, sī ēng tāi-iok saⁿ-cha̍p-gō͘ kong-kun ê kim chō--ê, koh ū siuⁿ pó-chio̍h. Lâng chiong chit-téng ông-koan tì tī Tāi-pi̍t ê thâu-khak. Tāi-pi̍t tùi siâⁿ-lāi chhú chin chōe châi-bu̍t,

31koh kā siâⁿ-lāi ê jîn-bîn lia̍h--chhut-lâi, hō͘ in ēng kù-á, thih-pê-á, kap thih ê pó͘-thâu chòe khó͘-kang, koh tī hiā-iô chòe khó͘-kang; Tāi-pi̍t lóng ēng chit-khoán hong-hoat tùi-thāi A-bûn hiah-ê siâⁿ ê lâng. Āu-lâi, Tāi-pi̍t kap só͘-ū ê kun-peng tò-khì Iâ-lō͘-sat-léng.

← Chapter 11 Jump to: Chapter 13 →