2 Samuel 9

Chinese TTVR (現代台語譯本羅馬字版)

← Chapter 8 Jump to: Chapter 10 →

1Tāi-pi̍t mn̄g kóng, “ Sò-lô ê ke iáu ū sím-mi̍h-lâng lâu--teh? Góa beh in-ūi Iok-ná-tan ê iân-kò͘ hó khoán-thāi i.”

2Sò-lô ê ke ū chi̍t ê po̍k-jîn kiò-chòe Sé-pa, lâng kiò i khì Tāi-pi̍t hia; ông chiū mn̄g i, “Lí sī Sé-pa sī--bô?” I ìn kóng, “Lí ê po̍k-jîn chiū-sī.”

3Ông kóng, “ Sò-lô ê ke iáu chhun kúi ê lâng? Góa thang chiong Siōng-tè ê un si hō͘ i.” Sé-pa tùi ông kóng, “ Iok-ná-tan iáu ū chi̍t ê kiáⁿ, i ê siang-kha lóng pái.”

4Ông mn̄g i, “I tī tó-ūi?” Sé-pa ìn ông kóng, “I tī Lô Tí-pa, tòa tī A-bí-lī ê kiáⁿ Má-kiat in tau.”

5Tāi-pi̍t -ông chiū phài lâng khì Má-kiat in tau kā chhōa--lâi.

6Sò-lô ê sun, Iok-ná-tan ê kiáⁿ Bí-hui-pho-siat lâi kìⁿ Tāi-pi̍t, phak lo̍h-khì pài i. Tāi-pi̍t kóng, “ Bí-hui-pho-siat.” I ìn kóng, “Lí ê po̍k-jîn tī chia.”

7Tāi-pi̍t kóng, “M̄-bián kiaⁿ. Góa it-tēng beh in-ūi lí ê lāu-pē Iok-ná-tan ê iân-kò͘ hó khoán-thāi lí, chiong lí ê a-kong Sò-lô ê chhân-hn̂g lóng hêng lí, mā beh hō͘ lí siông-siông kap góa chòe-hé chia̍h.”

8Bí-hui-pho-siat koh phak-teh pài i, kóng, “Lí ê po̍k-jîn sǹg sím-mi̍h? Góa put-kò chhin-chhiūⁿ chi̍t chiah sí-káu, lí kèng-jiân án-ni chiàu-kò͘ góa!”

9Ông kiò Sò-lô ê po̍k-jîn Sé-pa lâi, kā i kóng, “Góa í-keng chiong Sò-lô kap i ka-cho̍k só͘-ū ê châi-sán lóng hō͘ lí ê chú-lâng ê sun.

10Lí kap lí ê kiáⁿ, lí ê po̍k-jîn tio̍h kā i chèng-choh, tòa chhân-hn̂g só͘ chhut-sán--ê hō͘ lí ê chú-lâng ê sun ū mi̍h thang chia̍h; lí chú-lâng ê sun Bí-hui-pho-siat ōe siông-siông kap góa chòe-hé chia̍h.” Sé-pa ū cha̍p-gō͘ ê kiáⁿ, jī-cha̍p ê po̍k-jîn.

11Sé-pa tùi ông kóng, “Góa ê chú góa ê ông hoan-hù--ê, lí ê po̍k-jîn lóng ōe chiàu án-ni chòe.” Só͘-í, Bí-hui-pho-siat chiū kap ông chòe-hé chia̍h, chhin-chhiūⁿ ông ê kiáⁿ kâng-khoán.

12Bí-hui-pho-siat ū chi̍t ê sòe-hàn kiáⁿ, kiò-chòe Bí-ka. Sé-pa in tau só͘-ū ê lâng lóng chòe Bí-hui-pho-siat ê po̍k-jîn.

13Bí-hui-pho-siat nn̄g kha lóng pái, tòa tī Iâ-lō͘-sat-léng, siông-siông kap ông chòe-hé chia̍h.

← Chapter 8 Jump to: Chapter 10 →