2 Samuel 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1A-hi-to-hut tùi Ap-sa-liông kóng, “Chhiáⁿ chún góa kéng chi̍t-bān nn̄g-chheng lâng, kim-àm khí-sin tui-jip Tāi-pi̍t.

2Góa thàn i ià-siān sit-chì, kā i kong-kek, hō͘ i kiaⁿ-hiâⁿ sit-táⁿ, tè i ê lâng lóng ōe tô-cháu. Góa kan-ta beh thâi-sí ông chi̍t ê lâng,

3hō͘ jîn-bîn lóng kui-sūn lí. Lí só͘ beh thâi hit-ê lâng í-gōa, só͘-ū ê jîn-bîn lóng ōe pêng-an.”

4Ap-sa-liông kap Í-sek-lia̍t só͘-ū ê tiúⁿ-ló lóng chàn-sêng chit-ê thê-gī.

5Ap-sa-liông kóng, “Tiàu A-ki -lâng Hō͘-su lâi, lán mā lâi thiaⁿ i ê ì-kiàn.”

6Hō͘-su kàu Ap-sa-liông hia, Ap-sa-liông tùi i kóng, “ A-hi-to-hut án-ni thê-gī, lán chiàu i kóng--ê khì chòe hó--bô? Nā bô, lí ū sím-mi̍h ì-kiàn?”

7Hō͘-su tùi Ap-sa-liông kóng, “ A-hi-to-hut chit-piàn ê kè-chhek m̄ hó.”

8Hō͘-su koh kóng, “Lí chai lí ê lāu-pē kap tè i ê lâng lóng sī ióng-sū. In gêng-sim lia̍h-kông, chhin-chhiūⁿ kiáⁿ hō͘ lâng chhiúⁿ--khì ê hîm-bú. Koh lí ê lāu-pē sī ū keng-giām ê chiàn-sū, it-tēng bōe kap kun-peng chòe-hé hioh-khùn.

9Hiān-chāi i it-tēng bih tī soaⁿ-tōng á-sī pa̍t-ê só͘-chāi. Nā ū lâng tāi-seng hō͘ i thâi-sí, thiaⁿ--tio̍h ê lâng ōe kóng, ‘Tè Ap-sa-liông ê kun-peng hō͘ lâng thâi-sí lah.’

10Hit-sî, liân ióng-béng chhin-chhiūⁿ sai ê lâng, sim mā ōe siau-iûⁿ sit-táⁿ; in-ūi Í-sek-lia̍t -lâng lóng chai lí ê lāu-pē sī ióng-sū, tè i ê lâng mā lóng chin ióng-kám.

11Só͘-í góa thê-gī, tio̍h hō͘ chhin-chhiūⁿ hái-piⁿ ê soa hiah-ni̍h chōe ê Í-sek-lia̍t -lâng, tùi Tān kàu Pia̍t-sī-pa chū-chi̍p lâi lí chia, lí mā chhin-sin chhōa in chhut-chiàn.

12Án-ni, lán bô-lūn tī sím-mi̍h só͘-chāi tú-tio̍h i, kā i tu̍t-kek, chhin-chhiūⁿ lō͘-chúi kàng-lo̍h tāi-tōe, hō͘ i kap tè i ê lâng bô lâu kah chi̍t ê.

13I nā thiat-thè ji̍p chi̍t ê siâⁿ, só͘-ū ê Í-sek-lia̍t -lâng ōe tòa soh khì hit-ê siâⁿ, kā siâⁿ thoa-lo̍h soaⁿ-kok, tī hia liân chi̍t tè chio̍h-thâu-á to chhē bô.”

14Ap-sa-liông kap só͘-ū ê Í-sek-lia̍t -lâng lóng kóng, “ A-ki -lâng Hō͘-su ê kè-chhek pí A-hi-to-hut --ê khah hó.” Siōng Chú koat-tēng beh phò-hoāi A-hi-to-hut hó ê kè-chhek, thang kàng chai-hō hō͘ Ap-sa-liông.

15Hō͘-su kā chè-si Sat-tok kap A-pí-a-tha kóng, “ A-hi-to-hut kā Ap-sa-liông kap Í-sek-lia̍t ê tiúⁿ-ló chhut ê kè-bô͘ sī án-ni án-ni; góa chhut ê kè-chhek sī án-ni án-ni.

16Hiān-chāi lín tio̍h kóaⁿ-kín phài lâng khì kā Tāi-pi̍t pò-kò, kim-àm m̄-thang tiàm tī khòng-iá ê tō͘-kháu, it-tēng tio̍h kè-hô, chiah bián ông kap tè i ê lâng lóng siū châu-bia̍t.”

17Hit-sî Iok-ná-tan kap A-hi-má-su tiàm tī Ún Lô-kiat, m̄-káⁿ ji̍p-siâⁿ, kiaⁿ hō͘ lâng khòaⁿ--tio̍h; in teh thèng-hāu chi̍t ê lú-pī tùi siâⁿ-lāi chhut-lâi kā in thong-pò, hō͘ in thang tùi Tāi-pi̍t -ông pò-kò.

18M̄-kú ū chi̍t ê siàu-liân-lâng khòaⁿ-tio̍h in, chiū khì kā Ap-sa-liông pò-kò; in nn̄g lâng kóaⁿ-kín cháu-khì Pa-hō͘-lîm bó͘ chi̍t ê lâng ê chhù; hit-ê lâng ê tiâⁿ ū chíⁿ, in nn̄g lâng chiū lo̍h-khì hia bih.

19Hit-ke ê hū-jîn-lâng ēng kòa khàm chíⁿ-kháu, téng-bīn pho͘ be̍h-á, tāi-chì chiū bô lāu-sia̍p.

20Ap-sa-liông ê pō͘-hā lâi kàu hū-jîn-lâng hit-keng chhù, mn̄g i kóng, “ A-hi-má-su kap Iok-ná-tan tī tó-ūi?” Hū-jîn-lâng kóng, “In kè khoe khì lah.” Hiah-ê pō͘-hā khì chhē, chhē bô tio̍h, chiū tò-khì Iâ-lō͘-sat-léng.

21In lī-khui liáu, hit nn̄g ê lâng tùi chíⁿ--ni̍h khí--lâi, khì kā Tāi-pi̍t -ông thong-pò. In tùi Tāi-pi̍t kóng, “Lín tio̍h khí--lâi, kóaⁿ-kín kè-hô, in-ūi A-hi-to-hut ū án-ni án-ni kè-bô͘ beh hāi lí.”

22Tāi-pi̍t kap tè i ê lâng chiū khí--lâi, kè Iok-tàn-hô; kàu thiⁿ-kng, bô chi̍t ê bô kè Iok-tàn-hô.

23A-hi-to-hut chai i ê kè-chhek bô siū chhái-la̍p, chiū khiâ-lû tò-khì i ê siâⁿ, kàu in tau. I kā chhù-lāi ê tāi-chì kau-tài hó-sè, chiū ka-kī tiàu--sí; lâng kā i bâi-chòng tī in lāu-pē ê bōng.

24Tāi-pi̍t kàu Má-hap-liām ê sî, Ap-sa-liông kap tè i ê Í-sek-lia̍t -lâng chiah kè Iok-tàn-hô.

25Ap-sa-liông siat-li̍p A-má-sat chòe goân-sòe tāi-thòe Iok-ap. A-má-sat sī Í-sek-lia̍t -lâng Í-te̍k-la ê kiáⁿ; Í-te̍k-la bat kap Ná-hat ê cha-bó͘-kiáⁿ Ài-pí-kai tâng-pâng. Chit-ê Ài-pí-kai kap Iok-ap ê lāu-bú Sé-lō͘-ngá sī chí-bē.

26Í-sek-lia̍t -lâng kap Ap-sa-liông tī Ki-lia̍t tōe-khu chat-iâⁿ.

27Tāi-pi̍t kàu Má-hap-liām hit-sî, A-bûn -cho̍k ê La-pa -lâng Ná-hat ê kiáⁿ Sok-pí, Lô Tí-pa -lâng A-bí-lī ê kiáⁿ Má-kiat, kap Ki-lia̍t ê Lô-ki-lîm -lâng Pa-se-lâi,

28tòa chhn̂g-pho͘, phûn, hûi-khì, sió-be̍h, tōa-be̍h, mī-hún, pē-se̍k ê ngó͘-kok, tāu-á, âng-tāu, pē--kè ê tāu-á,

29bi̍t, iû, gû-lin kap iûⁿ-lin chòe ê chia̍h-mi̍h, kiong-kip Tāi-pi̍t kap tè i ê lâng; in kóng, “Kun-peng tī khòng-iá it-tēng ōe iau, ōe ià-siān, chhùi-ta.”

← Chapter 16 Jump to: Chapter 18 →