Joshua 1

Chinese TTVR (現代台語譯本羅馬字版)

Jump to: Chapter 2 →

1Siōng Chú ê po̍k-jîn Mô͘-se sí liáu-āu, Siōng Chú tùi Mô͘-se ê chō͘-chhiú, Lūn ê kiáⁿ Iok-su-a, kóng,

2“Góa ê po̍k-jîn Mô͘-se í-keng sí; taⁿ lí kap só͘-ū ê jîn-bîn tio̍h chún-pī hó-sè, kè Iok-tàn-hô, khì góa só͘ beh siúⁿ-sù Í-sek-lia̍t -lâng ê tōe.

3Chiàu góa tùi Mô͘-se ê èng-ún, lín ê kha ta̍h--kè ê tōe, góa lóng beh sù hō͘ lín.

4Lín ê léng-thó͘ beh tùi lâm-pêng ê khòng-iá kàu pak-pêng ê Lê-pa-lūn, tùi tang-pêng ê Tōa-hô, chiū-sī Iù-hoat-la-tí-hô, Hek -lâng ê choân-tōe, ti̍t-kàu ji̍t lo̍h hit-pêng ê Tōe-tiong-hái.

5Lí chi̍t-sì-lâng bô lâng ōe-tàng iâⁿ-kè lí; góa án-chóaⁿ kap Mô͘-se tông-chāi, mā beh án-ni kap lí tông-chāi; góa it-tēng bōe lī-khui lí, mā bōe pàng-sak lí.

6Lí tio̍h ióng-kám chòng-táⁿ, in-ūi lí beh chhōa chit-ê jîn-bîn cheng-ho̍k góa tùi in ê chó͘-sian li̍p-sè beh sù hō͘ in ê tōe.

7Lí it-tēng tio̍h ióng-kám chòng-táⁿ, chun-hêng góa ê po̍k-jîn Mô͘-se só͘ bēng-lēng lí it-chhè ê lu̍t-hoat, m̄-thang phian-chó-phian-iū. Án-ni, lí bô-lūn khì tó-ūi lóng ōe sū-sū sūn-lī.

8Lí tio̍h siông-siông tha̍k chit-ê lu̍t-hoat ê chheh, mî-ji̍t ia̍h tha̍k ia̍h siūⁿ, hō͘ lí chun-hêng chit-pún chheh só͘ kì it-chhè ê ōe; án-ni lí ê lō͘ chiū ōe pîⁿ-tháⁿ, sū-sū heng-thong.

9Góa bēng-lēng lí: Tio̍h ióng-kám chòng-táⁿ, m̄-thang kiaⁿ, m̄-thang lún; in-ūi lí bô-lūn khì tó-ūi, Siōng Chú — lí ê Siōng-tè it-tēng kap lí tông-chāi.”

10Tùi án-ni, Iok-su-a bēng-lēng jîn-bîn ê koaⁿ-tiúⁿ,

11khì iâⁿ-tiong ta̍k só͘-chāi hoan-hù jîn-bîn, kóng, “Tio̍h chún-pī niû-si̍t, in-ūi saⁿ ji̍t lāi, lín beh kè Iok-tàn-hô, ji̍p-khì sêng-chiap Siōng Chú — lín ê Siōng-tè beh sù hō͘ lín ê tōe.”

12Iok-su-a hoan-hù Lū-piān -lâng, Ka-tek -lâng, kap Má-ná-se pòaⁿ chi-cho̍k ê lâng, kóng,

13“Lín tio̍h ōe-kì-tit Siōng Chú ê po̍k-jîn Mô͘-se bēng-lēng lín ê ōe: Siōng Chú — lín ê Siōng-tè beh chiong lín tī chia an-ún khiā-khí ê tōe siúⁿ-sù lín.

14Lín ê bó͘, gín-á, kap lín ê cheng-siⁿ, lóng thang tòa tī Iok-tàn-hô tang-pêng, Mô͘-se hun-phòe hō͘ lín ê tōe; m̄-kú lín tiong-kan só͘-ū kiông-béng ê ióng-sū, lóng tio̍h tòa kun-khì, chòe lín tông-pau ê sian-hong kè-hô, kap in chòe-hé chok-chiàn,

15ti̍t-kàu Siōng Chú hō͘ lín ê tông-pau kap lín siâng-khoán, tit-tio̍h Siōng Chú — lín ê Siōng-tè siúⁿ-sù in an-ún khiā-khí ê tōe. Hit-sî lín chiah thang tò-lâi lín só͘ tit--tio̍h chòe sán-gia̍p ê tōe, chiū-sī Siōng Chú ê po̍k-jîn Mô͘-se hun-phòe hō͘ lín tī Iok-tàn-hô tang-pêng ê tōe.”

16In ìn Iok-su-a kóng, “Lí hoan-hù goán--ê, goán lóng beh chiàu án-ni chòe; lí phài goán khì tó-ūi, goán lóng beh khì;

17goán í-chêng án-chóaⁿ sūn-thàn Mô͘-se, mā beh án-ni sūn-thàn lí. Goān Siōng Chú — lí ê Siōng-tè kap lí tông-chāi, chhin-chhiūⁿ kap Mô͘-se tông-chāi kâng-khoán.

18Bô-lūn sím-mi̍h-lâng ûi-pōe lí ê bēng-lēng, bô beh sūn-thàn lí ê ōe, tio̍h hō͘ i sí. Lí it-tēng tio̍h ióng-kám chòng-táⁿ!”

Jump to: Chapter 2 →