Joshua 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Siōng Chú hoan-hù Iok-su-a kóng,

2“Tio̍h bēng-lēng Í-sek-lia̍t -lâng, chiàu góa thong-kè Mô͘-se kā lín kóng--ê, ūi lín ka-kī siat-li̍p pī-lān-siâⁿ,

3hō͘ bô-ì-tiong gō͘-sat-lâng--ê thang cháu-khì hia. Hiah-ê siâⁿ thang chòe lín siám-pī pò oan-siû ê lâng ê só͘-chāi.

4Gō͘-sat-lâng--ê thang cháu-khì hiah-ê siâⁿ, khiā tī siâⁿ-mn̂g-kháu, chiong i ê sū-chêng kóng hō͘ hit-ê siâⁿ ê tiúⁿ-ló thiaⁿ; in chiū thang chiap i ji̍p-siâⁿ, hō͘ i chi̍t ê só͘-chāi, tòa tī in tiong-kan.

5Pò oan-siû ê lâng nā jip kàu hit-ê siâⁿ, siâⁿ-lāi ê lâng bōe-ēng-tit chiong thâi-sí-lâng--ê kau--chhut-khì; in-ūi i sī bô-ì-tiong thâi-sí lâng, kap sí--khì ê lâng bô oan-siû.

6I tio̍h tòa tī hit-ê siâⁿ, tī hōe-chiòng ê bīn-chêng siū sím-phòaⁿ. Kàu hit-sî ê tōa-chè-si sí, i chiah thang tò-khì i cháu--chhut-lâi ê pún-siâⁿ pún-ke.”

7In chiū koat-tēng siat-li̍p pī-lān-siâⁿ tī Ná-hut-tha-lī soaⁿ-khu Ka-lī-lī ê Ki-te-su, kap tī Í-hoat-liân soaⁿ-khu ê Sī-kiàm, í-ki̍p tī Iû-tāi soaⁿ-khu ê Ki-lia̍t A-pa, chiū-sī Hi-pek-lûn.

8Koh tī Iok-tàn-hô tang-pêng siat-li̍p pī-lān-siâⁿ, tī Iâ-lī-ko tang-pêng sio̍k Lū-piān chi-cho̍k ê khòng-iá pêng-goân ê Pí-sek, kap sio̍k Ka-tek chi-cho̍k Ki-lia̍t ê La-boa̍t, í-ki̍p sio̍k Má-ná-se chi-cho̍k Pa-san ê Ko-lân.

9Chiah-ê sī ūi-tio̍h Í-sek-lia̍t chèng-lâng, kap tòa tī in tiong-kan ê gōa-cho̍k-lâng siat-li̍p ê pī-lān-siâⁿ, hō͘ bô-ì-tiong gō͘-sat-lâng--ê lóng thang cháu-khì hia, bián hō͘ pò oan-siû ê lâng thâi-sí, thèng-hāu i kong-khai siū sím-phòaⁿ.

← Chapter 19 Jump to: Chapter 21 →