Joshua 22

Chinese TTVR (現代台語譯本羅馬字版)

← Chapter 21 Jump to: Chapter 23 →

1Hit-sî, Iok-su-a tiàu-chi̍p Lū-piān chi-cho̍k, Ka-tek chi-cho̍k, kap Má-ná-se pòaⁿ chi-cho̍k ê lâng,

2tùi in kóng, “Siōng Chú ê po̍k-jîn Mô͘-se bēng-lēng lín--ê, lín lóng ū chun-siú; góa bēng-lēng lín--ê, lín mā ū thiaⁿ-thàn.

3It-ti̍t kàu kin-á-ji̍t, lín chiah-ni̍h kú lóng bô pàng-sak lín ê tông-pau; lín ū chun-siú Siōng Chú — lín ê Siōng-tè só͘ bēng-lēng lín--ê.

4Taⁿ Siōng Chú — lín ê Siōng-tè ū chiàu I ê èng-ún, hō͘ lín ê tông-pau hióng-siū thài-pêng; hiān-chāi lín thang tò-tńg-khì lín tau, tńg-khì Siōng Chú ê po̍k-jîn Mô͘-se tī Iok-tàn-hô tang-pêng sù hō͘ lín chòe ke-gia̍p ê tōe.

5M̄-kú lín it-tēng tio̍h kín-sīn, chun-hêng Siōng Chú ê po̍k-jîn Mô͘-se só͘ bēng-lēng lín ê kài-bēng kap lu̍t-hoat, thiàⁿ Siōng Chú — lín ê Siōng-tè, kiâⁿ I it-chhè ê tō-lō͘, siú I ê kài-bēng, tiong-sêng bô lī-khui I, choân-sim choân-ì ho̍k-sāi I.”

6Iok-su-a kā in chiok-hok, sàng in khì; in chiū tò-khì in tau.

7Má-ná-se pòaⁿ chi-cho̍k í-keng tī Pa-san tùi Mô͘-se pun-tio̍h ke-gia̍p; lēng-gōa pòaⁿ chi-cho̍k, tī Iok-tàn-hô sai-pêng kap in ê hiaⁿ-tī chòe-hé tùi Iok-su-a pun-tio̍h ke-gia̍p. Iok-su-a sàng in tò--khì ê sî, kā in chiok-hok,

8hoan-hù in kóng, “Lín tio̍h chiong chhiúⁿ--tio̍h ê chiàn-lī-phín, chiū-sī chin chōe ê cheng-siⁿ, kim, gûn, tâng, thih, kap hui-siông chōe ê i-ho̍k, the̍h tò-khì lín tau, pun hō͘ lín ê tông-pau.”

9Tùi án-ni, Lū-piān chi-cho̍k, Ka-tek chi-cho̍k, kap Má-ná-se pòaⁿ chi-cho̍k ê lâng, chiū tùi Ka-lâm -tōe ê Sī-lô chhut-hoat, kap kî-tha ê Í-sek-lia̍t -lâng saⁿ-sî, tò-khì in tit--tio̍h ê Ki-lia̍t -tōe; chiū-sī Mô͘-se chiàu Siōng Chú ê bēng-lēng, pun hō͘ in chòe ke-gia̍p ê tōe.

10Lū-piān -lâng, Ka-tek -lâng, kap Má-ná-se pòaⁿ chi-cho̍k ê lâng, tī Ka-lâm -tōe ê Iok-tàn-hô tōe-khu, óa-kūn hô ê só͘-chāi, khí chi̍t chō tōa koh hiáⁿ-ba̍k ê chè-tôaⁿ.

11Í-sek-lia̍t -lâng thiaⁿ-kìⁿ Lū-piān -lâng, Ka-tek -lâng, kap Má-ná-se pòaⁿ chi-cho̍k ê lâng tī Ka-lâm -tōe tùi-bīn Iok-tàn hô-piⁿ, Í-sek-lia̍t pian-kài, khí chi̍t chō chè-tôaⁿ,

12Í-sek-lia̍t choân hōe-chiòng chiū tī Sī-lô chū-chi̍p, beh khì kā in kong-táⁿ.

13Í-sek-lia̍t -lâng phài chè-si Í-lī-a-sat ê kiáⁿ Hui-nî-hap khì Ki-lia̍t -tōe Lū-piān -lâng, Ka-tek -lâng, kap Má-ná-se pòaⁿ chi-cho̍k ê lâng hia;

14kap i chòe-hé khì--ê ū cha̍p ê chi-cho̍k ê léng-siù, in mā-sī Í-sek-lia̍t ta̍k chong-cho̍k ta̍k ka-cho̍k ê sī-tōa.

15In kàu Ki-lia̍t -tōe, kìⁿ Lū-piān -lâng, Ka-tek -lâng, kap Má-ná-se pòaⁿ chi-cho̍k ê lâng, tùi in kóng,

16“Siōng Chú ê choân hōe-chiòng án-ni kóng, ‘Lín sī-án-chóaⁿ pōe-poān Í-sek-lia̍t ê Siōng-tè? Kin-á-ji̍t lín oa̍t-thâu bô tè Siōng Chú, ūi ka-kī khí chi̍t chō chè-tôaⁿ, pōe-ge̍k Siōng Chú, hoān chiah tōa ê chōe!

17Í-chêng lán tī Pí-ní hoān-chōe, un-e̍k lîm-kàu Siōng Chú ê hōe-chiòng, kàu kin-á-ji̍t iáu-bē kiat-chēng, lán iáu khòaⁿ-chòe bô iàu-kín sī--bô?

18Lín kèng-jiân oa̍t-thâu bô tè Siōng Chú! Lín kin-á-ji̍t pōe-ge̍k I, bîn-á-chài I ōe tùi Í-sek-lia̍t choân hōe-chiòng hoat tōa siū-khì.

19Lín nā siūⁿ-kóng só͘ tit--tio̍h chòe ke-gia̍p ê tōe bô chheng-khì, thang kè-lâi Siōng Chú ê tōe, chiū-sī ū Siōng Chú hōe-bō͘ ê só͘-chāi, chiū ōe tī goán tiong-kan tit-tio̍h ke-gia̍p; chóng-sī m̄-thang pōe-ge̍k Siōng Chú, mā m̄-thang pōe-poān goán, m̄-thang tī Siōng Chú — lán ê Siōng-tè ê chè-tôaⁿ í-gōa, koh ūi ka-kī khí chè-tôaⁿ.

20Í-chêng Siā-la ê kan-á-sun A-kan kiám m̄-sī tī hit-ê eng-kai húi-bia̍t ê mi̍h hoān-chōe, Siōng Chú ê siū-khì chiū lîm-kàu Í-sek-lia̍t choân hōe-chiòng? In-ūi i hoān-chōe, sí ê lâng m̄-sī kan-ta i chi̍t ê lâng.’”

21Lū-piān -lâng, Ka-tek -lâng, Má-ná-se pòaⁿ chi-cho̍k ê lâng ìn Í-sek-lia̍t chong-cho̍k ê sī-tōa kóng,

22“Tōa koân-lêng ê Chú Siōng-tè! Tōa koân-lêng ê Chú Siōng-tè! I chai, goān Í-sek-lia̍t -lâng mā chai, goán nā ū pōe-poān á-sī pōe-ge̍k Siōng Chú, kin-á-ji̍t chiū hō͘ goán sí.

23Goán nā ūi ka-kī khí chè-tôaⁿ, oa̍t-thâu bô tè Siōng Chú, á-sī tī tôaⁿ-téng hiàn sio-hòa-chè, sò͘-chè, pêng-an-chè, goān Siōng Chú kā goán hêng-hoa̍t.

24M̄-kú m̄-sī án-ni! Goán chòe chit-ê tāi-chì sī kiaⁿ-liáu ū chi̍t ji̍t, lín ê hō͘-tāi tùi goán ê hō͘-tāi kóng, ‘Lín kap Siōng Chú — Í-sek-lia̍t ê Siōng-tè ū sím-mi̍h koan-hē?

25Siōng Chú siat chit-ê Iok-tàn-hô chòe lín kap goán tiong-kan ê keh-kài; Lū-piān -lâng, Ka-tek -lâng, lín bô koân thang chòe Siōng Chú ê chú-bîn.’ Án-ni, lín ê kiáⁿ-sun ōe hāi goán ê kiáⁿ-sun bô koh kèng-ùi Siōng Chú.

26Só͘-í, goán chiū koat-tēng beh ūi ka-kī khí chi̍t chō chè-tôaⁿ, m̄-sī ūi-tio̍h hiàn sio-hòa-chè á-sī kî-tha ê chè;

27sī ūi-tio̍h beh tī lín kap goán, í-ki̍p lín ê hō͘-tāi kap goán ê hō͘-tāi tiong-kan chòe chèng-kù, goán thang tī Siōng Chú ê hōe-bō͘ hiàn sio-hòa-chè, pêng-an-chè, kap pa̍t-khoán ê chè lâi ho̍k-sāi I; chiah bián lín ê kiáⁿ-sun chiong-lâi tùi goán ê kiáⁿ-sun kóng, ‘Lín bô koân thang chòe Siōng Chú ê chú-bîn.’

28Só͘-í goán kóng, ‘Chiong-lâi in nā tùi goán á-sī goán ê hō͘-tāi án-ni kóng, goán thang ìn kóng: Lín khòaⁿ goán lia̍t-chó͘ khí ê chè-tôaⁿ kap Siōng Chú ê chè-tôaⁿ hêng-thé oân-choân kâng-khoán; m̄-sī ūi-tio̍h beh hiàn sio-hòa-chè kap kî-tha ê chè, sī ūi-tio̍h beh chòe lín goán tiong-kan ê chèng-kù.’

29Kin-á-ji̍t, goán choa̍t-tùi bô chit-ê ì-sù, beh tī Siōng Chú — lán ê Siōng-tè hōe-bō͘ thâu-chêng ê chè-tôaⁿ í-gōa, koh lēng-gōa khí chi̍t chō chè-tôaⁿ hiàn sio-hòa-chè, sò͘-chè, kap kî-tha ê chè, lâi pōe-ge̍k Siōng Chú, oa̍t-thâu bô sūn-thàn I.”

30Chè-si Hui-nî-hap kap hōe-chiòng ê léng-siù, í-ki̍p kap i chòe-hé khì hiah-ê Í-sek-lia̍t chong-cho̍k ê sī-tōa, thiaⁿ-tio̍h Lū-piān -lâng, Ka-tek -lâng, kap Má-ná-se -lâng só͘ kóng ê ōe, chiū lóng chin boán-ì.

31Chè-si Í-lī-a-sat ê kiáⁿ Hui-nî-hap tùi Lū-piān -lâng, Ka-tek -lâng, kap Má-ná-se -lâng kóng, “Kin-á-ji̍t, goán chai Siōng Chú kap lán tông-chāi, in-ūi lín bô hoān chit-ê pōe-ge̍k ê chōe lâi tek-chōe I; lín si̍t-chāi ū kiù Í-sek-lia̍t -lâng thoat-lī Siōng Chú ê hêng-hoa̍t.”

32Chè-si Í-lī-a-sat ê kiáⁿ Hui-nî-hap kap hiah-ê léng-siù, lī-khui Ki-lia̍t tōe-khu ê Lū-piān -lâng, Ka-tek -lâng, tò-khì Ka-lâm -tōe Í-sek-lia̍t -lâng hia, kā in pò-kò chit-ê sū.

33Í-sek-lia̍t -lâng lóng chin boán-ì, chiū chheng-chàn Siōng-tè, bô koh thê-khí beh kong-táⁿ Lū-piān -lâng kap Ka-tek -lâng, húi-hoāi in khiā-khí ê tōe.

34Lū-piān -lâng kap Ka-tek -lâng chiū kā chit-ê chè-tôaⁿ kiò-chòe “Kiàn-chèng ê tôaⁿ”, sī kóng, “Chit-ê tôaⁿ tī lán tiong-kan kiàn-chèng Siōng Chú sī Siōng-tè.”

← Chapter 21 Jump to: Chapter 23 →