Joshua 9

Chinese TTVR (現代台語譯本羅馬字版)

← Chapter 8 Jump to: Chapter 10 →

1Tòa tī Iok-tàn-hô sai-pêng ê soaⁿ-khu, soaⁿ-po͘, í-ki̍p Tōe-tiong-hái iân-hōaⁿ kàu Lê-pa-lūn tōe-khu ê Hek -lâng, A-mô͘-lī -lâng, Ka-lâm -lâng, Pí-lī-sé -lâng, Hi-bī -lâng, Iâ-pò͘-su -lâng, chiah-ê ông chi̍t-ē thiaⁿ-tio̍h Í-sek-lia̍t -lâng thâi-iâⁿ ê siau-sit,

2chiū lóng chū-chi̍p, tâng-sim-ha̍p-ì, beh kap Iok-su-a, í-ki̍p Í-sek-lia̍t -lâng kau-chiàn.

3Ki-piàn ê chū-bîn thiaⁿ-tio̍h Iok-su-a án-chóaⁿ tùi-thāi Iâ-lī-ko kap Ai -siâⁿ,

4chiū siat kè-bô͘, ké-chòe sù-chiá, ēng lû-á chài tóe mi̍h-kiāⁿ ê kū pò͘-tē, kap pó͘--kè ê kū chiú-tē;

5chhēng pó͘--kè ê kū-ôe kap kū-saⁿ, tòa ta koh chhùi-chhùi ê piáⁿ.

6In lâi kàu Kiat-kah ê iâⁿ-tōe kìⁿ Iok-su-a, tùi i kap Í-sek-lia̍t -lâng kóng, “Goán sī tùi chin hn̄g ê só͘-chāi lâi--ê; taⁿ chhiáⁿ kap goán li̍p-iok.”

7Í-sek-lia̍t -lâng tùi chiah-ê Hi-bī -lâng kóng, “Lín khó-lêng sī chit só͘-chāi ê chū-bîn, goán ná ōe-tàng kap lín li̍p-iok?”

8Ki-piàn -lâng tùi Iok-su-a kóng, “Goán sī lí ê lô͘-po̍k.” Iok-su-a mn̄g in kóng, “Lín sī sím-mi̍h-lâng, sī tùi tó-ūi lâi--ê?”

9In tùi i kóng, “Lí ê lô͘-po̍k tùi chin hn̄g ê só͘-chāi lâi; goán ū thiaⁿ-kìⁿ Siōng Chú — lí ê Siōng-tè ê miâ-siaⁿ, chiū-sī I tī Ai-ki̍p it-chhè ê só͘-chòe,

10í-ki̍p I tī Iok-tàn-hô tang-pêng tùi A-mô͘-lī nn̄g ê ông, Hi-si̍t-pún -ông Se-hông kap tòa tī A-su-tha-lio̍k ê Pa-san -ông Go̍k, it-chhè ê só͘-chòe.

11Goán ê léng-siù kap goán hia ê lâng lóng kā goán kóng, ‘Lín tio̍h tòa lō͘-tiong su-iàu ê chia̍h-mi̍h khì gêng-chiap Í-sek-lia̍t -lâng, kā in kóng: Goán sī lín ê lô͘-po̍k, chhiáⁿ kap goán li̍p-iok.’

12Goán chhut-hoat beh lâi lín chia ê sî, tòa--chhut-lâi ê piáⁿ iáu sio-sio, m̄-kú taⁿ í-keng lóng ta koh chhùi-chhùi--khì lah;

13in-ūi lō͘ chin hn̄g, chiah-ê chiú-tē, tóe chiú ê sî iáu-sī sin--ê, m̄-kú taⁿ í-keng phòa-li̍h; goán ê saⁿ kap ôe mā lóng kū--khì lah.”

14Í-sek-lia̍t -lâng kiám-cha in ê chia̍h-mi̍h, bô mn̄g Siōng Chú.

15Iok-su-a chiū kap in tēng hô-pêng tiâu-iok, bô thâi in; hōe-chiòng ê léng-siù mā tùi in chiù-chōa.

16Í-sek-lia̍t -lâng kap in li̍p-iok liáu-āu, kè saⁿ ji̍t, chiah chai in goân-lâi tòa tī hù-kūn.

17Í-sek-lia̍t -lâng chhut-hoat, tē-saⁿ ji̍t lâi kàu in tòa ê siâⁿ; hiah-ê siâⁿ chiū-sī Ki-piàn, Ki-hui-la, Pí-lio̍k, Ki-lia̍t Iâ-lîm.

18In-ūi hōe-chiòng ê léng-siù í-keng chí Siōng Chú — Í-sek-lia̍t ê Siōng-tè tùi in chiù-chōa, Í-sek-lia̍t -lâng chiū bô kā in thâi; in-ūi án-ni, bîn-chiòng chiū put-boán in ê léng-siù.

19Hiah-ê léng-siù tùi bîn-chiòng kóng, “Goán í-keng chí Siōng Chú — Í-sek-lia̍t ê Siōng-tè tùi in chiù-chōa, só͘-í lán m̄-thang kā in kha̍p--tio̍h.

20Lán tio̍h lâu in ê sìⁿ-miā, chiah bián lán in-ūi ûi-pōe chiù-chōa, hō͘ Siōng-tè kā lán hêng-hoa̍t.”

21Léng-siù koh tùi in kóng, “Tio̍h hō͘ in oa̍h--teh.” Tùi án-ni, Ki-piàn -lâng chiū chiàu léng-siù kóng ê ōe, ūi-tio̍h bîn-chiòng phòa-chhâ chhiūⁿ-chúi.

22Iok-su-a kiò in lâi, kā in kóng, “Lín sī-án-chóaⁿ phiàn goán kóng ‘Goán sī tùi chin hn̄g ê só͘-chāi lâi--ê’? Kî-si̍t lín sī chit só͘-chāi ê chū-bîn.

23Só͘-í lín tio̍h siū Siōng Chú chek-hoa̍t, lín tiong-kan put-toān ū lâng ōe chòe lô͘-lē, ūi-tio̍h goán Siōng-tè ê chhù chòe phòa-chhâ chhiūⁿ-chúi--ê.”

24In ìn Iok-su-a kóng, “In-ūi khak-si̍t ū lâng kā lí ê lô͘-po̍k kóng, Siōng Chú — lí ê Siōng-tè ū èng-ún I ê po̍k-jîn Mô͘-se, beh chiong chit-ê choân-tōe siúⁿ-sù lín, koh tī lín ê thâu-chêng châu-bia̍t chit-ê tōe só͘-ū ê chū-bîn; goán in-ūi kiaⁿ hō͘ lín thâi-sí chiah án-ni chòe.

25Taⁿ goán tī lí ê chhiú-thâu; lí thang chiàu lí khòaⁿ-chòe hó, khòaⁿ-chòe tio̍h--ê tùi-thāi goán.”

26Iok-su-a chiū án-ni tùi-thāi in, kiù in bián hō͘ Í-sek-lia̍t -lâng thâi-sí.

27Tùi hit-ji̍t khí, Iok-su-a chiū hō͘ in tī Siōng Chú só͘ kéng-soán ê só͘-chāi, ūi-tio̍h bîn-chiòng kap chè-tôaⁿ phòa-chhâ chhiūⁿ-chúi, ti̍t-kàu kin-á-ji̍t.

← Chapter 8 Jump to: Chapter 10 →